Falscaithe

• Bí feasach ar an mbaol dóiteáin nuair a bhíonn tréimhsí triomaigh an earraigh agus an tsamhraidh ann.
• Is gnách gur mó an baol dóiteáin san earrach ná sa samhradh.
• Ar na cineálacha talún is mó a bhaineann baol falscaithe leo in Éirinn tá tailte portaigh, portaigh mhóna, ceantair ardtalún agus tailte foraoise neamhaibí in aice láimhe.
• I ndálaí tromchúiseacha triomaigh, is féidir le féar triomaithe agus bairr eile dul trí thine ar raon cineálacha talún feirme, fiú ar thalamh íseal.
• Is féidir le feirmeoireacht ghníomhach, beostoc a chur ag innilt go cuí agus bearta eile laghdaithe breosla an riosca dóiteáin a laghdú go héifeachtach.
• Eisítear fógraí contúirte dóiteáin le bainisteoirí talún a chur ar an eolas faoi na dálaí riosca dóiteáin a bhíonn ann idir mí an Mhárta agus mí Mheán Fómhair agus le go bhféadtar bearta ullmhachta a dhéanamh in am.

• Déan cinnte de go gcoimeádtar fásra inadhainte guaiseach amhail aiteann, raithneach agus féar ag leibhéil ísle le riosca dóiteáin a laghdú.
• Ba chóir 30m ar a laghad de spás saor ó bhreosla a choinneáil le struchtúir a chosaint
• Coinnigh saor bealaí rochtana. Déan sainaithint ar fhoinsí uisce, béil tuile agus foinsí uisce oscailte, agus coinnigh saor ó bhacainní iad.
• Tabhair cúnamh do chomharsana breacaosta nó leochaileacha rioscaí a bhainistiú agus fásra a choinneáil ar leibhéal sábháilte thart ar a n-áit chónaithe.
• Tuairiscigh rud ar bith atá amhrasach don Gharda Síochána. Tuairiscigh tinte neamhrialaithe nó tinte gan aon duine ina mbun do na seirbhísí éigeandála trí ghlaoch ar 112 nó 999.

• Ná las beárbaiciú in aon chás i bpáirceanna, i limistéir fiathalún ná in aon suíomh atá gar d'fhásra agus do chrainn.
• Ná las tine i bhforaoisí, i limistéir áineasa ná in áiseanna eile, ná gar dóibh.
• Páirceáil go freagrach. Coinnigh saor bealaí rochtana éigeandála.
• Tabhair aird ar chomharthaí agus ar threoracha ó úinéirí talún agus ó oifigigh údaraithe.

Is minic gur bealach iontach iad gníomhaíochtaí lasmuigh le do chuid ama fóillíochta a chaitheamh, ach tá a rioscaí dóiteáin uathúla féin ag baint leo ba chóir a cheart a thabhairt dóibh.

Ba cheart go mbeadh beárbaiciú ina eispéireas sábháilte agus taitneamhach ach is furasta d'aird a bhaint nuair a bhíonn cairde agus teaghlach thart ort agus tú ag cócaireacht. Le gortuithe, nó damáiste do mhaoin, a sheachaint, lean na réamhchúraimí simplí seo:

• Ná las beárbaiciú riamh ar bhalcóin.
• Cinntigh go bhfuil do bheárbaiciú ag feidhmiú go maith.
• Cinntigh go bhfuil an beárbaiciú ar shuíomh cothrom, i bhfad ón teach nó ón árasán, ó chrainn nó ó thoir.
• Coinnigh leanaí, cluichí gairdín agus peataí i bhfad amach ón limistéar cócaireachta
• Ná fág an beárbaiciú gan aon duine ina bhun riamh.
• Coinnigh buicéad uisce nó gainimh in aice láimhe le haghaidh éigeandálaí.
• Ná las beárbaiciú in aon chás i bpáirceanna, i limistéir fiathalún ná in aon suíomh atá gar d'fhásra, do chrainn.
• Cinntigh go bhfuil an beárbaiciú fuar sula ndéanann tú iarracht é a bhogadh.

Cuid mhaith de na falscaithe earraigh, tarlaíonn siad tar éis iarrachtaí ciotacha le dó rialaithe a dhéanamh sna hardtailte. Agus drochthriomach ann, is féidir le tinte neamhbheartaithe cur isteach ar ghníomhaíochtaí feirmeoireachta ísealchríche agus, b'fhéidir, ar an bpobal sa cheantar máguaird freisin:

• Tá sé mídhleathach fásra a dhó idir an 1 Márta agus an 31 Lúnasa.
• Féadfar fíneálacha, príosúnacht nó laghdú ar an aoníocaíocht feirme a ghearradh ar úinéirí talún a dhónn amhlaidh go mídhleathach.
• Ní mór d’úinéirí talún ar mian leo dóiteán forordaithe a dhéanamh le linn na tréimhse dleathaí fógra i scríbhinn a thabhairt do gach úinéir foraoise laistigh de mhíle amháin, don tseirbhís dóiteáin agus don Stáisiún Áitiúil Gardaí roimh an oibríocht dóiteáin.
• Meas cén chaoi a bhféadfadh an deatach cur isteach ar phobail in aice láimhe. Má bhíonn amhras ort, ná dóigh rud ar bith.
• Déan plean dóiteáin. Ullmhaigh bealaí éalaithe agus pointí tionóil d’oibrithe a oibríonn trealamh. Bíodh fáil ar thancaeir uisce i rith oibríochtaí an fhómhair agus triomach ann.

Foghlaim tuilleadh faoi shrianta ar bhearradh fálta sceach agus ar dhó.