An bhfuair tú an méid a bhí á lorg agat?
An bhfuair tú a raibh á lorg agat?
Cabhraigh linn torthaí an chuardaigh IS a fheabhsú trí d'aiseolas a thabhairt anseo (3-5 nóim).
Leagann an tAire O'Brien amach fís don leictriú agus Éire ag glacadh le hUachtaránacht an Aontais Eorpaigh
- Foilsithe:
- An t-eolas is déanaí:
Óstáiltear saineolaithe fuinnimh na hÉireann agus na hEorpa i stáisiún cumhachta hidrileictreach Ard na Croise don chomhdháil leictriúcháin
Ós rud é go mbeidh Éire ag glacadh le hUachtaránacht Chomhairle an Aontais Eorpaigh, tháinig saineolaithe fuinnimh, iompair agus tionscail le chéile ag Ard na Croise i gContae an Chláir chun plé a dhéanamh ar an iarracht uaillmhianach i dtreo an leictrithe ar fud na mór-roinne. Ag déanamh machnaimh ar an ról a bhí ag Scéim na Sionainne ag Ard na Croise i leictriú tosaigh na hÉireann 100 bliain ó shin, d’éist an lucht freastail le saineolaithe Éireannacha agus Eorpacha faoi thionchair chlaochlaitheacha an leictreachais ghlain a ghintear sa bhaile.
Leag Darragh O'Brien, an tAire Aeráide, Fuinnimh agus Comhshaoil, amach tosaíochtaí fuinnimh na hÉireann dá hUachtaránacht ar an Aontas Eorpach agus d’iarracht na hÉireann a bheith ina leictreastát.
Agus é ag déanamh trácht ar thábhacht oidhreacht Ard na Croise, agus ar ról na hÉireann agus muid ag glacadh le hUachtaránacht Chomhairle an Aontais Eorpaigh, dúirt an tAire O'Brien:
"Is meabhrúchán cumhachtach é Ard na Croise, nuair a smaoiníonn muintir na hÉireann ar bhealach misniúil, gur féidir linn cor a chur inár gcinniúint féin. Inniu, tá Éire ag an tairseach maidir le claochlú atá chomh domhain céanna le tráth ar bith inár scéal náisiúnta.
"Ní tionscadal teicniúil amháin atá i gceist leis an turas i dtreo sochaí atá leictrithe go hiomlán. Ní bhaineann sé le sreanga, eangacha, tuirbíní, cadhnraí nó bonneagar amháin. Is athshamhlú é ar an gcaoi a mairfidh Éire, ar an gcaoi a n-éireoidh linn, agus ar an gcaoi a mbeimid i gceannas.
"Tá tábhacht níos mó fós ag baint leis an tráth seo agus Éire ag glacadh le hUachtaránacht Chomhairle an Aontais Eorpaigh. Tá an dúshlán atá romhainn difriúil ó dhúshlán Ard na Croise, ach tá deis níos mó fós ag baint leis.
"Ní córas fuinnimh amháin atá in Éirinn iomlán leictrithe agus in Eoraip iomlán leictrithe. Is conradh sóisialta nua é: ceann atá bunaithe ar an athléimneacht, ar an gcothroime agus ar an rath coiteann. Is deis é Eoraip a chruthú atá níos glaine, níos cliste agus níos nasctha ná aon rud a bhí againn roimhe seo. Eoraip ina gcumhachtaítear pobail, ina bhfuil tithe níos teo, ina bhfuil tionscail níos iomaíche, ina bhfuil fuinneamh níos sláine, agus ina n-oibríonn an t-aistriú do dhaoine i ngach réigiún.
"Céad bliain ó shin, chonaic na físithe a thóg Ard na Croise agus a bhrúigh an chéad chlár náisiúnta leictrithe in Éirinn chun cinn leictreachas mar inneall i náisiún nua-aimseartha, neamhspleách agus níos rathúla. Tá an rialtas seo anois ag iarraidh uaillmhian den chineál céanna a bheith againn do ré nua. Tá leictreachas glan ginte sa tír seo á úsáid againn chun iompar, tithe agus fiontar a athrú ó bhonn – dlús a chur le feithiclí leictreacha, teaschaidéil, stóráil agus leictriú tionsclaíoch, agus an eangach agus an geilleagar á n-ullmhú againn le haghaidh leictriú níos doimhne ar thionscal dianfhuinnimh sna blianta amach romhainn. Go simplí, táimid chun Éire a leictriú."
Dúirt Paddy Hayes, Príomhfheidhmeannach BSL:
"Bhí ríméad ar BSL fáilte a chur roimh an Aire O'Brien agus roimh thoscairí fuinnimh, iompair agus tionscail chuig Ard na Croise inniu.
"Tá Ard na Croise ag giniúint leictreachas glan le beagnach 100 bliain anuas. Sa lá atá inniu ann, tá deis ollmhór ann cur leis an leictreachas in-athnuaite agus leis an leictriú; deis chun custaiméirí a chumhachtú, chun neamhspleáchas fuinnimh a fheabhsú, chun teas, iompar agus an tsochaí a dhícharbónú, agus chun tacú le todhchaí shlán fuinnimh d’Éirinn agus don Eoraip."
Tosaíochtaí don fhuinneamh, don aeráid agus don chomhshaol – le linn Uachtaránacht na hÉireann
Leag an tAire O'Brien béim roimhe seo ar thosaíochtaí d’Uachtaránacht na hÉireann ar Chomhairle an Aontais Eorpaigh maidir le slándáil fuinnimh, inbhuanaitheacht agus inacmhainneacht – áit a bhfeicfimid fócas ar leith ar phríomhshruthanna oibre an Aontais Eorpaigh. Áirítear orthu sin an Pacáiste Eorpach maidir le hEangacha (chun bonneagar fuinnimh an Aontais a neartú) agus an Teachtaireacht AccelerateEU (chun aghaidh a thabhairt ar chostais fuinnimh atá ag ardú agus chun spleáchas an Aontais ar mhargaí luaineacha breoslaí iontaise a laghdú a thuilleadh).
Maidir le hábhair aeráide, beidh ról ceannasach ag an Aire O'Brien agus an tAontas ag déileáil le tograí le haghaidh athbhreithnithe ar an gCóras Trádála Astaíochtaí (CTA). Beidh an tAire i gceannas freisin ar ullmhúcháin an Aontais do CP31 – an chéad Chomhdháil eile de chuid na Náisiún Aontaithe maidir leis an Athrú Aeráide, a bheidh ar siúl in Antalya na Tuirce i mí na Samhna.
Beidh cosaint an chomhshaoil agus an t-aistriú chuig Geilleagar Ciorclach ina bpríomhábhair don Aire O'Brien agus don Roinn Aeráide, Fuinnimh agus Comhshaoil – le linn na hUachtaránachta 6 mhí. Díreofar go háirithe ar Chomhad an Ghnímh um an nGeilleagar Ciorclach de chuid an Aontais. Tá sé beartaithe an Gníomh a ghlacadh i mbliana agus tá sé mar aidhm aige Margadh Aonair a bhunú d’amhábhair thánaisteacha, soláthar ábhar athchúrsáilte ardchaighdeáin a mhéadú agus an t-éileamh ar na hábhair sin laistigh den AE a spreagadh.
CRÍOCH
Nótaí don Eagarthóir
Uachtaránacht na hÉireann ar Chomhairle an Aontais Eorpaigh
Ghlac Éire le ceann de na róil is mó tionchair san Aontas Eorpach – agus Uachtaránacht Chomhairle an Aontais Eorpaigh aici (ón 1 Iúil go dtí an 31 Nollaig 2026).
Go ceann 6 mhí, beidh Éire i gcroílár chinnteoireacht an Aontais Eorpaigh, ina stiúrfaidh sí idirbheartaíochtaí casta a mhúnlaíonn dlíthe agus beartais do thart ar 450 milliún duine. Tagann sé seo ag tráth dúshlánach don Aontas, agus cogadh na Rúise san Úcráin fós ar siúl, an imirce fós ina hábhar íogair ó thaobh polaitíochta de, brú ar iomaíochas, agus an gá le spriocanna aeráide a bhaint amach ag dul i méid. D’éirigh le hÉirinn an Uachtaránacht a shealbhú 7 n-uaire cheana féin, go minic le linn tréimhsí ina raibh athruithe suntasacha ar siúl. Tugann téarma 2026 deis eile don tír ceannaireacht a dhéanamh ar an Aontas, agus sinn ag brath ar thaithí agus ar thaidhleoireacht, agus le tiomantas láidir don chomhpháirtíocht.