Seachtain an Mhíchumais, na hOibre agus na Scileanna Deireadh Fómhair 2026

Tá Intreo ag eagrú Sheachtain an Mhíchumais, na hOibre agus na Scileanna ón 19 go dtí an 23 Deireadh Fómhair 2026.

I rith na seachtaine, eagróidh an Roinn Coimirce Sóisialaí réimse aontaí fostaíochta agus imeachtaí atá dírithe ar dhaoine faoi mhíchumas ar fud na tíre chun daoine faoi mhíchumas a nascadh le fostóirí, deiseanna fostaíochta, tacaíochtaí san ionad oibre agus roghanna oiliúna.

Is deis iontach í Seachtain an Mhíchumais, na hOibre agus na Scileanna do dhaoine faoi mhíchumas atá ag lorg deiseanna fostaíochta, oiliúna nó forbartha gairme. Trí fhreastal ar imeachtaí i rith na seachtaine, is féidir leat:

• bualadh le fostóirí atá tiomanta d’earcaíocht ionchuimsitheach
• eolas a fháil faoi fholúntais poist reatha agus deiseanna atá le teacht
• foghlaim faoi chláir oiliúna, oideachais agus forbartha scileanna
• rochtain a fháil ar eolas faoi thacaíochtaí san ionad oibre agus seirbhísí fostaíochta
• labhairt go díreach le baill foirne Intreo agus le heagraíochtaí tacaíochta eile
• muinín a chothú trí líonrú agus rannpháirtíocht le fostóirí
• eolas a fháil faoi na tacaíochtaí atá ar fáil chun cabhrú leat tosú ag obair nó filleadh ar an obair
• bealaí gairme agus tionscail éagsúla a fhiosrú

Níl aon chostas ag baint le freastal ar aon cheann dár n-imeachtaí.

Fostóirí – conas páirt a ghlacadh

Moltar d’fhostóirí de gach méid a bheith páirteach agus na tairbhí a bhaineann le hearcaíocht chuimsitheach a fháil amach. Trí bheith rannpháirteach, is féidir le fostóirí:

• Bualadh le daoine cumasacha agus le hiarrthóirí ionchasacha
• Folúntais a chur chun cinn
• Foghlaim faoi chleachtais earcaíochta atá cuimsitheach do dhaoine faoi mhíchumas
• Eolas a fháil faoi na tacaíochtaí airgeadais agus praiticiúla atá ar fáil agus foireann á hearcú
• Labhairt le baill foirne Intreo faoi na bealaí chun fostaíocht a bhaint amach

Níl aon chostas ar fhostóir as a bheith ag earcú ag ár n-imeachtaí.

Más mian leat páirt a ghlacadh mar fhostóir, seol ríomhphost chuig employer@welfare.ie