An Ciste Saoráidí Spóirt Pobail – Conas iarratas a dhéanamh ar Íocaíocht

Caithfidh príomhtheagmhálaí ainmnithe d'eagraíochta gach iarratas ar Íocaíocht a chur isteach tríd an ríomhphost. Tá mionsonraí teagmhála oifigigh ainmnithe na Roinne thíos.

Cuir ainm agus contae d'eagraíochta i líne ábhair an ríomhphoist.

Ba cheart uimhir thagartha an deontais a chur i gcorp an ríomhphoist (i.e. CAS-XXXXX-XXXXXX), má tá fáil uirthi, mar aon le hUimhir Chlárúcháin Chánach (TRN) d'eagraíochta.

Ba cheart na doiciméid agus an fhaisnéis seo a leanas a sheoladh chuig an Roinn tríd an ríomhphost.

Tabhair do d'aire, ní mór gach doiciméad a chur ar aghaidh nó diúltófar do d'iarratas.

Ní mór sonrasc mionsonraithe CBL ón soláthraí faofa a chur isteach agus ní mór seoladh na heagraíochta a bheith luaite air. Tabhair do d'aire nach nglacfar le sonraisc nó orduithe pro forma.

Ní mór ráiteas bainc a thaispeánann go soiléir an t-idirbheart ábhartha leis an gconraitheoir/soláthraí a chur ar fáil. I gcás ina ndearnadh an íocaíocht le seic, ní mór cóip den seic a chur ar fáil freisin.

Ní mór Deimhniú um Chomhlíonadh a chomhlánú go hiomlán le haghaidh gach iarratas ar íocaíocht. Tá an doiciméad sin ar fáil lena íoslódáil thíos.

D'fhonn íocaíocht dheireanach an deontais do d'eagraíocht a tharraingt anuas, éilíonn an Roinn ceann amháin nó an dá cheann de na nithe seo a leanas, chomh maith leis na doiciméid a luadh thuas:

Comhartha/Greamán an Tairbhí

Éilítear ar gach faighteoir maoiniú deontais comhartha tairbhí a chur in airde. Má bhaineann do dheontas le trealamh agus sin amháin, ní gá duit an comhartha iomlán a chur in airde, ach éilítear ort greamán tairbhí beag a chur ar cheann de na píosaí trealaimh a maoiníodh nó in áit fheiceálach i do chlubtheach. Is féidir an chomharthaíocht a ordú ach ríomhphost a sheoladh chuig sports.signage@lottery.ie. I gcás nach bhfuil an comhartha/na greamáin faighte agat fós, is leor cóip den ríomhphost a sheol an Crannchur Náisiúnta chun an t-ordú a dheimhniú.

Deimhniú Críochnaithe

Éilítear Deimhniú Críochnaithe le haghaidh deontas caipitil os cionn €25,000. Caithfidh maoirseoir teicniúil neamhspleách é sin a eisiúint, seachas an conraitheoir a chuir na hoibreacha i gcrích. Caithfidh an maoirseoir teicniúil a bheith ina innealtóir/ailtire/shuirbhéir cainníochta deimhnithe. Caithfidh an litir a bheith ar pháipéar ceannteidil ón maoirseoir teicniúil, agus ní mór na hoibreacha a cuireadh i gcrích, an dáta agus síniú a bheith inti, mar aon le ráiteas go bhfuil an tionscadal curtha i gcrích go sásúil de réir an chaighdeáin riachtanaigh agus go bhfuil gach ní in ord. Ní mór a dheimhniú go bhfuil an tréimhse dliteanais lochtanna thart (más ann di).

Seol na doiciméid go léir a éilítear tríd an ríomhphost chuig an oifigeach ábhartha le haghaidh do chontae. Má fhaigheann tú an teachtaireacht "as an oifig" ón oifigeach, seol an ríomhphost ar aghaidh chuig sportscapitalprogrammes@ccs.gov.ie