Cuireann na hAirí fáilte roimh thiomantas dearfach ó chumann Cluichí Gaelacha don Lánpháirtiú

Inniu (9 Meán Fómhair), bhuail an tAire Cultúir, Cumarsáide agus Spóirt Patrick O’Donovan agus an tAire Stáit a bhfuil freagracht air as Spórt agus Beartas Poist, Charlie McConalogue, leis an gCumann Lúthchleas Gael, le Cumann Camógaíochta agus leis an LGFA chun dul chun cinn i dtreo lánpháirtiú na dtrí eagraíocht Chluichí Gaelacha a phlé.

D'athdhearbhaigh na trí eagraíocht a dtiomantas do lánpháirtiú a bhaint amach agus go bhfuil an próiseas seo ar siúl i gcónaí.

Dhearbhaigh na heagraíochtaí go leanfar le hobair an Ghrúpa Stiúrtha um Lánpháirtiú (SGI), agus go bhfuil a chéad chruinniú eile socraithe do thús mhí Dheireadh Fómhair, mar aon lena rá gur príomhthosaíocht é Cathaoirleach nua a cheapadh a luaithe is féidir. Leagfaidh an SGI amach amchlár soiléir foriomlán don lánpháirtiú sna míonna amach romhainn.

Aithníonn gach eagraíocht go bhfuil gá le trédhearcacht níos mó agus cumarsáid shoiléir maidir le conas atá an próiseas lánpháirtíochta ag tarlú, idir laistigh dá n-eagraíochtaí féin agus níos leithne.

Tá na hAirí tar éis iarraidh ar Spórt Éireann dul i dteagmháil ar bhealach struchtúrtha leis an SGI agus aon chomhairle agus cúnamh a thairiscint a d'fhéadfadh tacú le seachadadh an phróisis lánpháirtíochta.

Aithníonn na hAirí an cheannaireacht agus an tiomantas iontach a léirigh an Dr. Mary McAleese le linn di a bheith ina Cathaoirleach ar an SGI ar feadh ceithre bliana, agus measann siad go dtugann an obair atá déanta faoina stiúir ardán an-láidir do sheachadadh an lánpháirtíochta.