An bhfuair tú an méid a bhí á lorg agat?
An bhfuair tú a raibh á lorg agat?
Cabhraigh linn torthaí an chuardaigh IS a fheabhsú trí d'aiseolas a thabhairt anseo (3-5 nóim).
Reáchtálfaidh Uachtaránacht na hÉireann ar an gComhairle Cruinniú Tábhachtach maidir le Cumarsáid ag Ospidéal Ríoga Chill Mhaighneann
- Foilsithe:
- An t-eolas is déanaí:
Reáchtálfaidh Uachtaránacht na hÉireann ar Chomhairle an Aontais Eorpaigh an chéad chruinniú de chuid Ard-Stiúrthóirí Cumarsáide ó bhí 2019 ann in Ospidéal Ríoga Chill Mhaighneann i mBaile Átha Cliath ar an 17 agus an 18 Meán Fómhair.
Tabharfaidh an ócáid le chéile oifigigh shinsearacha cumarsáide agus saineolaithe ó gach cearn den Aontas Eorpach agus den Limistéar Eorpach Eacnamaíoch, mar aon le hionadaithe ón gCoimisiún Eorpach, ó Chomhlacht na Rialtóirí Eorpacha um Chumarsáid Leictreonach agus ón nGrúpa um Beartas Speictrim Raidió.
I gcroílár an phlé beidh an tAcht atá beartaithe, is é sin le rá an tAcht Líonraí Digiteacha. Tionscnamh mór nua de chuid an Aontais Eorpaigh é seo a dearadh chun bonneagar cumarsáide na hEorpa a nuachóiriú agus chun a chinntiú go mbainfidh saoránaigh agus gnólachtaí leas as nascacht dhigiteach atá slán, athléimneach agus ar ardchaighdeán.
Agus muintir na hEorpa ag brath níos mó agus níos mó ar sheirbhísí digiteacha don obair, don oideachas, don chúram sláinte agus don tsiamsaíocht, scrúdóidh toscairí conas is féidir líonraí cumarsáide amach anseo a dhéanamh níos athléimní agus conas is féidir speictream raidió, an bonneagar dofheicthe a thugann cumhacht d’fhóin phóca agus do theicneolaíochtaí gan sreang, a bhainistiú ar bhealach níos éifeachtaí ar fud na hEorpa.
Díreofar ag an gcruinniú ar dhá phríomhthéama: athléimneacht líonra agus beartas speictrim. Beidh an plé ina chuidiú dul chun cinn a dhéanamh ar chaibidlíocht maidir leis an reachtaíocht atá beartaithe agus comhar níos fearr a chur chun cinn i measc na mBallstát agus an Eoraip ag ullmhú don chéad ghlúin eile de theicneolaíochtaí digiteacha.
Dúirt an tAire Cultúir, Cumarsáide agus Spóirt, Patrick O'Donovan TD:
Tá nascacht dhigiteach iontaofa ríthábhachtach anois don chaoi a maireann daoine, a n-oibríonn siad agus a ndéanann siad gnó. Tugann an cruinniú seo deis thábhachtach do na Ballstáit comhoibriú ar thodhchaí líonraí cumarsáide na hEorpa agus a chinntiú go mbeidh siad slán, athléimneach agus oiriúnach do na dúshláin atá romhainn. Cabhróidh sé freisin chun fuinneamh a chruthú roimh na Cruinnithe Neamhfhoirmiúla agus Foirmiúla de chuid na gComhairlí Teileachumarsáide atá le teacht.
CRÍOCH