An bhfuair tú an méid a bhí á lorg agat?
An bhfuair tú a raibh á lorg agat?
Cabhraigh linn torthaí an chuardaigh IS a fheabhsú trí d'aiseolas a thabhairt anseo (3-5 nóim).
Fáiltíonn an tAire Séamus Ó Ceallacháin roimh fhianú 206 Gharda nua
- Foilsithe:
- An t-eolas is déanaí:
- Cuireadh 206 Gharda ar promhadh chuig rannáin de chuid an Gharda Síochána ar fud na tíre
- Is é seo an tríú fianú Gardaí i mbliana, agus an earcaíocht leanúnach fós ag méadú líon na nGardaí
- An rang fianaithe aonair is mó ó bhí an bhliain 2019 ann
- Le leithdháileadh na nGardaí nua-fhianaithe, soláthrófar níos mó acmhainní le haghaidh seirbhísí póilíneachta túslíne agus tacófar le hoibríochtaí póilíneachta na hUachtaránachta ar an Aontas Eorpach
- Tá breis agus 200 Garda nua faoi oiliúint le dul isteach i gColáiste an Gharda Síochána an tseachtain seo chugainn
24 Iúil 2026
D’fháiltigh Séamus Ó Ceallacháin an tAire Dlí agus Cirt, Gnóthaí Baile agus Imirce, roimh fhianú 206 Gharda nua i gColáiste an Gharda Síochána ar an Teampall Mór inniu.
Cuirfidh Coimisinéir an Gharda na Gardaí nua atá ar promhadh chuig Rannáin de chuid an Gharda Síochána ar fud na tíre. Thug 142 fhear agus 64 bhean fianú inniu.
Ag labhairt dó ag an searmanas fianaithe, dúirt an tAire Ó Ceallacháin:
“Tá an-áthas orm go bhfuil 206 Gharda ag tabhairt an fhianaithe inniu ar an Teampall Mór agus go gcuirfear chuig stáisiúin ar fud na tíre iad anois. Tá sé seo ar cheann de na grúpaí is mó a thug fianú le blianta beaga anuas, agus tógann sé ar an sruth seasta comhaltaí fianaithe ó Choláiste an Gharda Síochána.
“Tá sé mar thosaíocht againn fórsa saothair an Gharda Síochána a fhás chun ár bpobail a chosaint agus chun tacú leo. Beidh tionchar fíor inbhraite ag na Gardaí nua sin atá ag tabhairt an fhianaithe inniu ar ár sráideanna agus inár bpobail. Agus an earcaíocht ag dul ar aghaidh go tapa, táim ag súil le fás breise ar an nGarda Síochána a fheiceáil ar fud na bliana seo.”
Imscarfar 94 Gharda ar promhadh ar fud Réigiún Cathrach Bhaile Átha Cliath, cuirfear 25 Gharda ar promhadh chuig Réigiún an Deiscirt, cuirfear 56 Gharda ar promhadh chuig Réigiún an Oirthir agus cuirfear 31 Gharda ar promhadh chuig Réigiún an Iarthuaiscirt.
Dúirt an tAire Ó Ceallacháin freisin:
“Ba mhaith liom comhghairdeas a dhéanamh le gach duine dár n-earcaigh nua agus buíochas a ghabháil leo as an gcinneadh a dhéanamh dul isteach sa Gharda Síochána. Tá gealltanas pearsanta á thabhairt acu go gcomhlíonfaidh siad seirbhís phoiblí agus go gcoinneoidh siad ár bpobail sábháilte."
Maidir le hUachtaránacht na hÉireann ar an Aontas Eorpach, dúirt an tAire Ó Ceallacháin freisin:
“Is deis uathúil í seo gairmiúlacht agus cumas ár seirbhíse póilíneachta a léiriú ar an ardán Eorpach. Chaith an Garda Síochána na míonna ar phleanáil, comhordú agus ullmhúchán a dhéanamh chun reáchtáil rianúil ár nUachtaránachta ar an Aontas Eorpach a chinntiú. Tugtar deis d’Éirinn leis freisin an comhar i bpóilíneacht na hEorpa a mhúnlú tráth atá an choireacht eagraithe, an chibearchoireacht, agus na bagairtí slándála ag méadú i gcónaí.”
CRÍOCH...///
Nótaí d’Eagarthóirí
Reáchtáladh trí fheachtas earcaíochta de chuid an Gharda Síochána sna hocht mí dhéag seo a chuaigh thart. Rinne breis agus 15,000 duine iarratas ar dhul isteach sa Gharda Síochána.
Cuireann an fianú is déanaí seo leis an sreabhadh seasta earcach nua, a leanfaidh le dul isteach sa Choláiste ag eatraimh thráthrialta i rith na bliana.
Tá an rialtas tiomanta do phobail níos láidre agus níos sábháilte a thógáil, agus tá neartú an Gharda Síochána i gcroílár na hoibre sin. Léirítear é sin sa leithdháileadh gan fasach ab ionann agus breis agus €2.74 billiún ar an nGarda Síochána i mBuiséad 2026. Leis an gcistiú sin, beifear in ann leanúint le comhaltaí agus baill foirne an Gharda Síochána a earcú.
Líon Foirne an Gharda Síochána (24 Iúil 2026)
- 14,733 Gharda faoi Mhionn
- 3,683 Bhall Foirne den Gharda Síochána
- 304 Chomhalta de Chúltaca an Gharda Síochána
- 604 Gharda faoi Oiliúint