An bhfuair tú an méid a bhí á lorg agat?
An bhfuair tú a raibh á lorg agat?
Cabhraigh linn torthaí an chuardaigh IS a fheabhsú trí d'aiseolas a thabhairt anseo (3-5 nóim).
Siúlbhealach ó Charraig Airt chun na nDúnaibh i nDún na nGall, ar fiú €500,000 é, oscailte go hoifigiúil ag an Aire Calleary
- Foilsithe:
- An t-eolas is déanaí:
- Maoiniú Áineasa Lasmuigh curtha ar fáil chun siúlbhealach úsáide comhroinnte a fhorbairt, a dearadh do shiúlóirí, reathaithe, teaghlaigh agus rothaithe
Inniu (Déardaoin, 24 Meán Fómhair 2026) d’oscail an tAire Forbartha Tuaithe agus Pobail agus Gaeltachta, Dara Calleary TD, conair chomhroinnte siúil agus rothaíochta 1.5km, lena gceanglaítear Carraig Airt agus na Dúnaibh i nDún na nGall, go hoifigiúil.
Bronnadh maoiniú €500,000 ón Scéim Bonneagair Áineasa Lasmuigh (SBÁL) ar an tsiúlbhealach nua seo, lena gcuirtear nasc sábháilte tiomanta easbhóthair ar fáil do mhuintir na háite agus do chuairteoirí araon, atá ag comaitéireacht nó i mbun áineasa idir an dá shráidbhaile i dTuaisceart Dhún na nGall.
Suite i mbaile fearainn Bhaile Uí Eochagáin, téann an siúlbhealach feadh an bhóthair réigiúnaigh R248 idir Charraig Airt agus na Dúnaibh. I measc na n-oibreacha a tugadh i gcrích, tá feabhsúcháin draenála comhtháite agus fál sábháilteachta feadh an stráice ghnóthaigh den R248.
Agus é ag labhairt ag an oscailt i gCarraig Airt, dúirt an tAire Calleary:
“Is cúis áthais dom a bheith anseo inniu chun críochnú na chéad céime den Siúlbhealach idir Charraig Airt agus na Dúnaibh a aithint agus a cheiliúradh. Eiseamláir é an tionscadal réabhlóideach seo den chineál infheistíochta ar dearadh SBÁL chun tacú léi – deiseanna sábháilte inrochtana inmharthana a chruthú chun gur féidir le daoine sult a bhaint as a bheith amuigh faoin aer, agus pobail tuaithe á neartú agus áiteanna cónaithe, oibre agus turasóireachta á bhfeabhsú ag an am céanna.
“Bíonn buntáistí i gceist le tionscadail dá leithéid seo, ar mó ar fad iad ná an bonneagar fisiciúil féin. Cuireann siad le sábháilteacht bóithre, spreagann siad taisteal gníomhach, agus ligeann sé do dhaoine de gach aois agus cumas sult a bhaint as a bheith amuigh faoin aer.
“Mar sin, ba mhaith liom aitheantas a thabhairt do dhíograis agus dúthracht Chomhairle Contae Dhún na nGall, foireann an tionscadail, ionadaithe tofa áitiúla, grúpaí pobail amhail Moving Mevagh Forward, Bailte Slachtmhara Charraig Airt agus na nDúnaibh, gnólachtaí, úinéirí talún agus conraitheoirí áitiúla, agus gach duine a chabhraigh leis an tionscadal seo a thabhairt chun críche.”
SBÁL
Cuirtear maoiniú ar fáil faoin Scéim Bonneagair Áineasa Lasmuigh (SBÁL) i gcomhair bonneagair áineasa lasmuigh nua a fhorbairt. Cuireann sé tacaíocht ar fáil freisin i gcomhair deisiú, cothabháil, feabhsú nó margaíocht a dhéanamh ar bhonneagar áineasa lasmuigh atá ann cheana i gceantair thuaithe ar fud Éireann. Ó 2020 i leith, bronnadh maoiniú de bhreis is €5.6 milliún ar Co. Dhún na nGall i gcomhair 74 dtionscadal.