An bhfuair tú an méid a bhí á lorg agat?
An bhfuair tú a raibh á lorg agat?
Cabhraigh linn torthaí an chuardaigh IS a fheabhsú trí d'aiseolas a thabhairt anseo (3-5 nóim).
Lárphointe tábhachtach bainte amach ag an gComhdháil um Oideachas agus í ag bailiú nirt i gcónaí
- Foilsithe:
- An t-eolas is déanaí:
Tá garsprioc thábhachtach bainte amach ag an gComhdháil um Oideachas agus rannpháirtithe anois leath bealaigh trí phróiseas cinniúnach breithniúcháin atá daonlathach agus suntasach agus atá ag cuidiú le fís fhadtéarmach a mhúnlú don oideachas in Éirinn.
Tá ullmhúcháin ar siúl don chéad Chomhdháil eile, a bheidh ar siúl ar an 26 agus 27 Meán Fómhair. Le roinnt míonna anuas, tá baill den Chomhdháil tagtha le chéile ar dhá ócáid chun fianaise a chloisteáil ó réimse leathan saineolaithe náisiúnta agus idirnáisiúnta agus plé a dhéanamh ar phríomhcheisteanna atá roimh an oideachais agus chun moltaí a fhorbairt a chabhróidh le bonn eolais a chur faoin treo ina rachaidh córas scoile na hÉireann amach anseo. Go sainiúil, is é seo an chéad phróiseas den chineál sin a chuimsíonn leanaí agus daoine óga mar rannpháirtithe iomlána i ngach plé.
Bhí plé fairsing ar chuimsiú, folláine scoláirí, intleacht shaorga, teicneolaíochtaí digiteacha, ceannaireacht scoile agus rannpháirtíocht phobail le feiceáil ag na Comhdhálacha deireadh seachtaine roimhe seo. I measc na gcainteoirí bhí taighdeoirí, oideoirí, daoine óga, abhcóidí pobail agus saineolaithe teicneolaíochta, rud a léiríonn tiomantas na Comhdhála maidir le dearcthaí éagsúla a chloisteáil agus fís chomhroinnte á forbairt aici do thodhchaí an oideachais. Thug na cuir i láthair sin léargas luachmhar ar na dúshláin agus na deiseanna atá roimh fhoghlaimeoirí, oideoirí agus an córas oideachais i gcoitinne agus spreag siad mórán plé ag cruinnithe na Comhdhála.
Tá taifeadtaí ó sheisiúin deireadh seachtaine na Comhdhála roimhe seo ar fáil fós ar gov.ie, rud a thugann deis do gach duine féachaint ar an bhfianaise, ar an bplé agus ar na dearcthaí a chuir bonn eolais faoin bpróiseas go dtí seo.
Ag an deireadh seachtaine Comhdhála atá ar na bacáin, díreofar ar théamaí a d’aithin na rannpháirtithe féin – an curaclam, an measúnú agus cultúr agus luachanna na scoile. D’iarr na rannpháirtithe freisin go ndíreofaí ar an todhchaí ag an deireadh seachtaine sin agus go mbainfí leas as taithí idirnáisiúnta agus as fianaise taighde. Beidh teacht ag an bpobal i gcoitinne ar na cuir i láthair ar fad don Chomhdháil tríd an mbeoshruth, ar féidir féachaint air anseo.
Tá sraith podchraoltaí ina bhfuil rannpháirtithe na Comhdhála páirteach ar fáil don phobal chomh maith. Tugann na podchraoltaí léargas uathúil ar an eispéireas a bhaineann le bheith páirteach sa phróiseas, rud a ligeann d’éisteoirí cloisteáil go díreach ó bhaill faoina gcuid machnaimh, faoin méid atá foghlamtha acu agus faoina bhfuil súil acu leis do thodhchaí an oideachais in Éirinn. San eagrán is déanaí, déanann an cúigear leas-chathaoirleach machnamh ar an bplé go dtí seo.
Dúirt an tOllamh Anne Looney, Cathaoirleach na Comhdhála um Oideachas:
"Is tráth tábhachtach don Chomhdháil a bheith leath bealaigh tríd. Tá tiomantas iontach léirithe ag ár rannpháirtithe i leith an phróisis breithniúcháin agus iad ag plé ceisteanna casta ar bhealach machnamhach, measúil agus tairbheach. Gné shainiúil den phróiseas go dtí seo ab ea éisteacht ní hamháin le hionchur ó shaineolaithe, ach leis an réimse tuairimí a bhí sa seomra. Chuaigh an chodarsnacht idir cáilíocht an chomhrá sa seomra agus ‘díospóireachtaí’ eile a bhfuil cleachtadh againn orthu, áit nach mbíonn éisteacht ná mórán measa i gceist, go mór i bhfeidhm orm.
"Agus muid ag breathnú chun cinn chuig an gcéad deireadh seachtaine Comhdhála eile agus an plé atá le déanamh fós, mothaítear go láidir go bhfuiltear ag bailiú fuinnimh agus féidearthachtaí ag teacht chun cinn maidir leis an obair seo.”
Tá físeán ó Chathaoirleach na Comhdhála - agus í ag labhairt ag an bpointe leath bealaigh - ar fáil anseo.
Dúirt an tAire Oideachais agus Óige, Hildegarde Naughton:
“Agus an Chomhdháil um Oideachas leath bealaigh tríd an obair, ba mhaith liom buíochas ó chroí a ghlacadh le gach rannpháirtí as an am, an fuinneamh agus an tiomantas a chuir siad leis an gcomhrá náisiúnta tábhachtach seo.
"Rud a bhí thar a bheith spreagúil ná chomh toilteanach agus a bhí daoine ó chúlraí agus ó thaithí éagsúla, leanaí agus daoine óga san áireamh, teacht le chéile chun todhchaí an oideachais a phlé ar bhealach machnamhach agus cuiditheach.
"Agus an saol ag athrú go tapa, idir intleacht shaorga agus teicneolaíochtaí nua, agus riachtanais na bhfoghlaimeoirí ag athrú, tá an Chomhdháil ag cabhrú linn machnamh dána a dhéanamh ar na deiseanna atá romhainn agus ar an gcaoi ar féidir linn córas oideachais a fhorbairt a thacaíonn le gach foghlaimeoir a lánacmhainneacht a bhaint amach. Táim ag tnúth go mór leis an gcéad chéim eile den obair thábhachtach seo.”