An bhfuair tú an méid a bhí á lorg agat?
An bhfuair tú a raibh á lorg agat?
Cabhraigh linn torthaí an chuardaigh IS a fheabhsú trí d'aiseolas a thabhairt anseo (3-5 nóim).
Molann an tAire O’Donnell do dhaoine scothaosta aire a thabhairt dá sláinte le linn tréimhse eile d’aimsir bhrothallach
- Foilsithe:
- An t-eolas is déanaí:
Chomhairligh an tAire um Dhaoine Scothaosta, Kieran O’Donnell TD, do dhaoine scothaosta inniu céimeanna praiticiúla a ghlacadh chun fanacht slán le linn na tréimhse eile d’aimsir bhrothallach atá in Éirinn faoi láthair, lena n-áirítear solas díreach na gréine a sheachaint agus fanacht hiodráitithe.
De réir na réamhaisnéise náisiúnta is déanaí ó Met Éireann, táthar ag súil go mbeidh tréimhse fhada d’aimsir an-te nó bhrothallach in Éirinn sa tseachtain atá romhainn.
Ag labhairt dó faoin rabhadh aimsire a d’eisigh Met Éireann, thug an tAire O’Donnell an rabhadh seo a leanas:
“Tá seachtain eile de theochtaí an-arda in Éirinn. Is féidir le strus teasa, tnáitheadh ó theas agus stróc teasa iarmhairtí tromchúiseacha sláinte a bheith acu ar dhaoine le linn toinne teasa.
"Molaim do dhaoine scothaosta, agus dóibh siúd atá ag tabhairt aire do dhuine eile, réamhchúraimí a ghlacadh chun iad féin a chosaint, amhail fanacht fionnuar agus hiodráitithe, agus a bheith ag faire amach do chomharthaí tnáite ó theas agus díhiodráitithe.
“Is féidir le gníomhartha beaga difríocht shuntasach a dhéanamh: daoine a spreagadh chun uisce a ól go rialta, tithe a choinneáil chomh fionnuar agus is féidir, gan am neamhriachtanach a chaitheamh amuigh faoin aer le linn na coda is teo den lá, agus a bheith ag faire amach do chomharthaí go bhfuil duine ag éirí tinn. Má bhíonn aon chúis imní ann, ba cheart do dhaoine comhairle a lorg ó dhochtúir teaghlaigh nó ó chógaiseoir agus, i gcás éigeandála, glaoch ar 112 nó 999.
“B’fhéidir nach n-iarrfadh go leor daoine scothaosta cabhair, nó nach dtuigfidís cé chomh tapa is féidir leis an teas dul i bhfeidhm ar a sláinte. Is féidir le glao gutháin gairid, cuairt nó tairiscint earraí grósaera nó cógais a bhailiú difríocht mhór a dhéanamh. Molaim do gach duine súil a choinneáil ar ghaolta scothaosta, ar chairde scothaosta agus ar chomharsana scothaosta le linn na haimsire brothallaí seo.
"Tá sé tábhachtach a mheabhrú go mbeidh do dhochtúir teaghlaigh nó do chógaiseoir in ann comhairle a chur ort má d’fhéadfadh aon cheann de do chógais an baol go n-éireofá tinn ón teas a mhéadú."
Moltar an chomhairle seo a leanas do dhaoine leochaileacha:
- Fan fionnuar: Caith am sa chuid is fuaire de do theach. Coinnigh na cuirtíní dúnta i rith an lae agus oscail na fuinneoga istoíche nuair a bhíonn sé níos fuaire.
- Fan hiodráitithe: Ól uisce go minic i rith an lae, fiú mura bhfuil tart ort. Seachain alcól agus cuir teorainn le do thomhaltas caiféine.
- Seachain teas an lae: Cuir teorainn leis an am a chaitheann tú amuigh faoin aer, go háirithe idir 11am agus 3pm, agus fan sa scáth nuair is féidir. Cuir sciath ghréine ar a bhfuil SPF 30+ ar a laghad do dhaoine fásta ort go rialta agus go flúirseach.
- Caith éadaí oiriúnacha: Caith éadaí éadroma, scaoilte agus hata le himill leathana nuair a bhíonn tú amuigh.
- Coinnigh do chorp fionnuar: Glac cithfholcadáin fhionnuara nó cuir éadach tais ar do chraiceann chun teocht do choirp a laghdú.
- Bí ag faire amach do chomharthaí tinnis: D’fhéadfadh meadhrán, tinneas cinn, masmas nó mearbhall tnáitheadh ó theas a léiriú — faigh cabhair leighis mura n-airíonn tú ar fónamh.
- Fan ceangailte: Coinnigh i dteagmháil le teaghlach, le cairde nó le comharsana agus iarr cabhair más gá duit í.
Tá tuilleadh comhairle sláinte poiblí maidir le fanacht sábháilte le linn aimsire brothallaí ar fáil ón FSS, ón Ionad Faireachais um Chosaint Sláinte agus ó threoir Bí Réidh don Samhradh de chuid an Rialtais.
Tá sé tábhachtach gníomhú go tapa má éiríonn duine tinn mar gheall ar thnáitheadh ó theas, stróc teasa nó díhiodráitiú. Téigh i dteagmháil le do dhochtúir teaghlaigh nó iarr cabhair leighis má bhíonn meadhrán ort, má bhíonn mearbhall ort, mura bhfuil fual déanta agat nó má bhíonn ráta croí ardaithe agat.
I gcás éigeandála, déan teagmháil leis na seirbhísí éigeandála ar an toirt trí ghlaoch a chur ar 112 nó 999.
Nótaí don Eagarthóir
Tá treoirlínte foilsithe ag an Roinn Sláinte do ghrúpaí daonra leochaileacha le linn tonnta teasa mar chuid dá fheachtas 'Bí Réidh don Samhradh'. Tá sé sin ar fáil anseo.