“Tá sé i gceist agam tús feidhme a thabhairt don reachtaíocht seo a luaithe is féidir agus táim fíorbhuíoch de mo chomhghleacaí, an tAire Jennifer Murnane O’Connor, as an obair a rinne sí chun an Bille seo a thabhairt tríd an Oireachtas. Beidh sé mhí ag an tionscal agus ag miondíoltóirí ón tosach feidhme chun stoc neamhchomhlíontach a ghlanadh. Mar is amhlaidh i gcás gach reachtaíochta maidir le táirgí tobac agus táirgí gaolmhara, rachaidh Seirbhís Náisiúnta Sláinte Comhshaoil FSS i dteagmháil le gnólachtaí lena chinntiú go dtuigeann siad a n-oibleagáidí.

“Baineann an Bille seo le cosc. Trí thoirmeasc a chur ar ghaltoitíní aonúsáide, táimid ag cuidiú le handúil i nicitín a chosc sula dtosaíonn sí agus le timpeallacht níos glaine a chruthú do gach duine.”

“Tá áthas orm gur éirigh liom an reachtaíocht thábhachtach seo a thabhairt tríd an dá Theach den Oireachtas agus gabhaim buíochas leis an Aire Carroll MacNeill agus le mo chomhghleacaithe sa Roinn Sláinte as a dtacaíocht agus as a saothar dícheallach. Mar atá ráite agam le linn na ndíospóireachtaí ar fad, baineann an reachtaíocht seo le sláinte ár leanaí a chosaint agus fáil réidh leis na galtoitíní is mealltaí, is saoire agus is fusa le húsáid ar an margadh. Is maith don tsláinte phoiblí agus don chomhshaol é cosc a chur ar na táirgí diomailteacha seo.

“Tá sé mar chuid de shraith beart atá beartaithe ag an Rialtas seo a ghlacadh chun tarraingt galtoitíní agus táirgí nicitín ar dhaoine óga, agus rochtain daoine óga orthu, a laghdú tuilleadh. Rialálfaidh an Bille Sláinte Poiblí (Táirgí Tobac agus Táirgí Ionanálaithe Nicitín) (Leasú) blasanna agus cuma na ngaltoitíní, socróidh sé aois íosta díola 18 mbliana do gach táirge nicitín, agus cuirfidh sé srian lena dtaispeáint mhiondíola agus lena bhfógraíocht.”