An bhfuair tú an méid a bhí á lorg agat?
An bhfuair tú a raibh á lorg agat?
Cabhraigh linn torthaí an chuardaigh IS a fheabhsú trí d'aiseolas a thabhairt anseo (3-5 nóim).
Léirítear sa Suirbhé ar Dhearcthaí Poiblí maidir le Foraoiseacht 2026 go bhfuil tacaíocht láidir ann chun an cumhdach foraoise in Éirinn a mhéadú
- Foilsithe:
- An t-eolas is déanaí:
Léiríonn an taighde is déanaí tacaíocht láidir phoiblí don fhoraoiseacht in Éirinn, mar aon le rannpháirtíocht an phobail le foraoisí atá ag dul i méid
D'fhoilsigh an Roinn Talmhaíochta, Bia agus Mara inniu torthaí an tSuirbhé ar Dhearcthaí Poiblí maidir le Foraoiseacht 2026, a rinne IPSOS B&A, ina léirítear aitheantas forleathan ar na tairbhí comhshaoil, sóisialta agus eacnamaíocha a bhaineann le foraoisí, agus tacaíocht láidir chun níos mó foraoisí a chur ar fud na tíre.
Ag fáiltiú dó roimh fhoilsiú an tsuirbhé, dúirt an tAire Talmhaíochta, Bia agus Mara, Martin Heydon TD:
“Tugann an foilseachán seo léargas luachmhar ar dhearcthaí an phobail i leith na foraoiseachta in Éirinn. Is cuid lárnach í an fhoraoiseacht den fheirmeoireacht chomhaimseartha agus de bhainistiú na húsáide talún chomh maith le cuidiú linn ár spriocanna náisiúnta aeráide agus bithéagsúlachta a bhaint amach. Cuid thábhachtach de bheartas éifeachtach a fhorbairt is ea éisteacht le tuairimí an phobail, agus cuideoidh an suirbhé seo lenár gcur chuige i leith na foraoiseachta a threorú. Léirítear go soiléir sna torthaí sin go n-aithníonn an pobal go láidir luach na foraoiseachta agus an t-ailíniú idir tuairimí an phobail agus ár n-uaillmhian leanúint d’earnáil bheoga foraoiseachta a fhorbairt a dhéanfaidh beart d’fheirmeoirí, do phobail agus don tír ina hiomláine.”
Is é an Suirbhé ar Dhearcthaí Poiblí maidir le Foraoiseacht 2026 an chéad cheann i sraith staidéar taighde a fhoilseoidh an Roinn Talmhaíochta, Bia agus Mara in 2026, ina dtabharfar tuilleadh léargais shóisialta agus iompraíochta.
Agus é ag trácht ar na torthaí, dúirt Niall Collins, an tAire Stáit a bhfuil freagracht air maidir le Foraoiseacht, Sábháilteacht Feirme agus Gairneoireacht:
“Léiríonn an taighde seo go n-aithníonn daoine in Éirinn an tábhacht a bhaineann le foraoiseacht agus go dtacaíonn siad lenár n-eastát foraoise a fhás. Is é an rud a sheasann amach i ndáiríre ná nach mbreathnaítear ar fhoraoiseacht a thuilleadh ó pheirspictíocht amháin. Tá méadú ag teacht ar an aitheantas a thugann daoine d’fhoraoisí mar leas poiblí a théann chun tairbhe do chách – ó fhoinse adhmaid inbhuanaithe a chur ar fáil, tacú leis an mbithéagsúlacht agus le gníomhú ar son na haeráide chun folláine a fheabhsú”
Fuarthas an méid seo a leanas sa taighde ionadaíoch náisiúnta sin:
- Creideann 89% go gcuideoidh tuilleadh foraoisí agus coillearnach le hÉirinn spriocanna aeráide a bhaint amach,
- Creideann 93% díobh go dtacófar leis an mbithéagsúlacht agus go bhfeabhsófar gnáthóga plandaí agus fiadhúlra trí chumhdach foraoise a mhéadú,
- Creideann 89% go bhfuil foraoisí tábhachtach chun tacú le meabhairshláinte agus folláine
- Creideann 82% go gcabhraíonn foraoisí le poist a chruthú i gceantair thuaithe agus go dtacaíonn siad le pobail áitiúla, agus
- Ba mhaith le 73% go mbeadh níos mó foraoisí agus coillearnacha ar fáil go háitiúil ina gcontae.
Fuarthas amach sa taighde freisin go raibh tacaíocht láidir ann do bhearta beartais atá ann faoi láthair chun cumhdach foraoise a mhéadú, le:
- 74% ag tacú le húsáid talún poiblí d'fhoraoisí nua, agus
- 68% ag tacú le dreasachtaí airgeadais d'fheirmeoirí agus d'úinéirí talún chun crainn a chur.
I gcomparáid le torthaí an tsuirbhé roimhe seo in 2021, aithníodh roinnt athruithe suntasacha ar dhearcthaí an phobail, cosúil le seo a leanas:
- Tá méadú suntasach tagtha ar an gcuairt ar fhoraoisí, agus dúirt 78% de dhaoine fásta gur thug siad cuairt ar fhoraois nó ar choillearnach le bliain anuas, méadú ó 58% in 2021.
- Tá méadú tagtha ar chion an phobail a bhfuil i bhfad níos mó foraoisí á n-iarraidh acu go háitiúil go 44%, méadú ó 38% in 2021.
- Tá an dúlra anois ar an tairbhe áitiúil is tábhachtaí a mheastar a bhaineann le foraoisí agus coillearnacha, ag 27%, suas ó 14% in 2021. Tá an aeráid sáraithe aige, atá ag 14% anois, síos ó 24% in 2021.
- Is cosúil go bhfuil méadú ag teacht ar an éileamh ar adhmad, leis na nithe seo a leanas:
- Dúirt 44% de na daoine gurbh fhearr leo cónaí i dteach a tógadh go príomha ó adhmad agus ábhair in-athnuaite a fhoinsítear go hinbhuanaithe, méadú ó 26% in 2021, agus
- níos mó teaghlach a úsáideann adhmad le haghaidh cócaireachta nó teasa, agus 58% ag úsáid foinse amháin breosla adhmaid ar a laghad anois le 12 mhí anuas, i gcomparáid le 41% in 2021.
Dúirt an tAire Collins:
“Is údar misnigh ar leith é go bhfuil méadú ag teacht ar líon na ndaoine a thugann cuairt ar fhoraoisí agus ar choillearnacha le blianta beaga anuas. Tá méadú ag teacht ar an meas atá ag daoine ar fhoraoisí mar áiteanna chun siúl, scíth a ligean agus nascadh leis an dúlra go háitiúil. Leagtar béim sna torthaí sin ar a thábhachtaí atá sé leanúint d’fhoraoisí a fhorbairt atá inrochtana, inbhuanaithe agus a dhéanann beart do phobail, don dúlra agus don gheilleagar i gcoitinne. Bainfidh mo Roinn úsáid as na torthaí chun bonn eolais a chur faoi bheartas foraoiseachta agus faoi fhorbairt clár amach anseo, rud a chinnteoidh go gcuideoidh tuairimí an phobail leis an gcaoi a ndéantar foraoiseacht a phleanáil agus a sheachadadh in Éirinn a mhúnlú.”
Tá an tuarascáil iomlán ón Suirbhé ar Dhearcthaí Poiblí maidir le Foraoiseacht 2026 ar fáil ar shuíomh gréasáin na Roinne.
Nótaí
- Choimisiúnaigh an Roinn Talmhaíochta, Bia agus Mara an Suirbhé ar Dhearcthaí Poiblí maidir le Foraoiseacht 2026.
- Rinneadh obair allamuigh idir an 13 agus an 30 Samhain 2025.
- Áiríodh sa suirbhé 1,216 freagróir a bhí ionadaíoch go náisiúnta agus atá 18+ bliana d’aois ar fud na hÉireann.
- Cuireann an taighde le staidéar tagarmhairc a rinneadh roimhe seo in 2021 chun athruithe ar dhearcthaí an phobail le himeacht ama a rianú.
- Rinneadh iniúchadh sa staidéar ar dhearcthaí an phobail ar fud na dtéamaí lena n-áirítear: an aeráid, an bhithéagsúlacht, áineas agus folláine, forbairt tuaithe, adhmad agus foirgníocht, inrochtaineacht, tairbhí áitiúla agus braistintí maidir le beartas foraoiseachta.
