An bhfuair tú an méid a bhí á lorg agat?
An bhfuair tú a raibh á lorg agat?
Cabhraigh linn torthaí an chuardaigh IS a fheabhsú trí d'aiseolas a thabhairt anseo (3-5 nóim).
Comhairliúchán Poiblí maidir le Sonraíocht Táirge Fuisce Éireannach
- Foilsithe:
- An t-eolas is déanaí:
D’fhógair an Roinn Talmhaíochta, Bia agus Mara inniu seoladh comhairliúcháin phoiblí maidir le hathbhreithniú a dhéanamh ar Shonraíocht Táirge Fuisce Éireannach (comhad teicniúil).
Is táirge tábhachtach d'oileán na hÉireann é fuisce Éireannach. Comhcheanglaíonn an tionscal inniu ceardaíocht stairiúil, seanbhunaithe le nuálaíocht nua-aimseartha. Aithnítear a thábhacht ar leith mar gheall ar a stádas mar thásc geografach (GI).
Deonaítear stádas tásc geografach faoi chosaint do tháirgí a bhfuil cáilíocht, clú nó tréith eile ar leith acu is inchurtha i leith limistéar geografach ar leith, i gcás ina dtarlaíonn céim amháin ar a laghad den táirgeadh, den phróiseáil nó den ullmhúchán sa limistéar sin.
Dúirt an tAire Talmhaíochta, Bia agus Mara, Martin Heydon TD:
“Tugann an comhairliúchán seo deis thábhachtach do tháirgeoirí, do ghnólachtaí, do thomhaltóirí agus do pháirtithe leasmhara eile a gcuid tuairimí a chur in iúl ar an gcomhad teicniúil. Cuidíonn tásca geografacha le hoidhreacht bhia réigiúnach a chosaint, le geilleagair áitiúla a chothú agus muinín a thabhairt do thomhaltóirí maidir le barántúlacht táirgí.
Dúirt Aire Talmhaíochta, Comhshaoil agus Gnóthaí Tuaithe Thuaisceart Éireann, Andrew Muir MLA:
“Is táirge aitheanta ar fud an domhain é Fuisce Éireannach, atá fréamhaithe sa traidisiún agus ríthábhachtach dár n-earnáil agraibhia agus deochanna. Tugann an comhairliúchán seo deis thábhachtach chun éisteacht le tuairimí maidir leis an tsonraíocht theicniúil, agus ar an gcaoi sin a chinntiú go leanann sí de bheith ag cosaint sláine, cáilíochta agus clú an tásc gheografaigh.”
Osclófar an comhairliúchán poiblí Dé hAoine, an 26 Meitheamh ó 09:00 r.n. agus tugtar cuireadh do gheallsealbhóirí athbhreithniú a dhéanamh ar shonraíocht an táirge agus ar an doiciméadacht tacaíochta agus tuairimí, breathnuithe nó agóidí a chur isteach i gcás inarb iomchuí. Beidh an comhairliúchán seo mar chuid den phróiseas chun sonraíocht an táirge a athbhreithniú ag na húdaráis ábhartha.
Nótaí d’Eagarthóirí
Sonraí Comhairliúcháin:
Osclaíonn an comhairliúchán: 09:00 R.N., 26/06/2026
Dúnann an comhairliúchán: 4:00 I.N., 09/04/2026
Tréimhse chomhairliúcháin: 10 seachtaine
Conas páirt a ghlacadh: Ba cheart aighneachtaí a sheoladh trí ríomhphost agus tagairt “Public Consultation Irish Whisky” chuig: spiritdrinksconsultation@agriculture.gov.ie
Ba chóir achoimre ghearr nach mó ná 300 focal a bheith i ngach aighneacht, ina leagtar amach na príomhphointí. Ba cheart go mbeadh cúlra gairid ar bhallraíocht, aidhmeanna agus cuspóirí na heagraíochta nó an ghrúpa sin in aighneachtaí ó eagraíochtaí nó grúpaí.
Tabhair faoi deara le do thoil go mbeidh gach aighneacht a gheofar ar fáil faoin Acht um Shaoráil Faisnéise agus go bhféadfaí iad a fhoilsiú ar shuíomh Gréasáin na Roinne.
Beidh doiciméid chomhairliúcháin, lena n-áirítear leasuithe molta ar an tsonraíocht agus fianaise tacaíochta a cuireadh isteach cheana, ar fáil Dé hAoine, 26 Meitheamh ó 09:00R.N. ar gréasáin na Roinne.
Breithneofar aighneachtaí a gheofar le linn na tréimhse comhairliúcháin mar chuid de mheasúnú na Roinne ar an iarratas. Féadfar achoimre ar na freagraí a fhoilsiú tar éis an chomhairliúcháin a thabhairt chun críche, faoi réir na gceanglas is infheidhme maidir le cosaint sonraí agus rúndacht.