Foilsiú
Easpa Dídine
Ó An Roinn Tithíochta, Rialtais Áitúil agus Oidhreachta
Foilsithe
An t-eolas is déanaí
Ó An Roinn Tithíochta, Rialtais Áitúil agus Oidhreachta
Foilsithe
An t-eolas is déanaí
Tá an easpa dídine a laghdú agus a chosc ina phríomhthosaíocht don Rialtas fós. Le ‘Tithíocht do Chách’, plean tithíochta an rialtais go dtí 2030, aithnítear na dúshláin áirithe a bhaineann leis an easpa dídine do theaghlaigh agus do dhaoine aonair. Tá an Rialtas tiomanta deireadh a chur leis an easpa dídine faoi 2030.
In ‘Tithíocht do Chách’ dírítear ar líon na dteaghlach agus na ndaoine aonair atá gan dídean a laghdú. Oibríonn sé le húdaráis áitiúla, le hEagraíochtaí Neamhrialtasacha, le Comhlachtaí Tithíochta Ceadaithe agus le Feidhmeannacht na Seirbhíse Sláinte, chun tacú le daoine atá gan dídean cóiríocht inbhuanaithe fhadtéarmach a bheith acu.
Tá tacaíocht ó idirghníomhaireachtaí ríthábhachtach chun an easpa dídine a mhaolú agus chun aghaidh a thabhairt ar na riachtanais tithíochta, sóisialta, sláinte agus eacnamaíocha atá ag daoine gan dídean agus acusan atá san earnáil cíosa príobháidí atá i mbaol a bheith gan dídean. Tá gealltanas tugtha ag ‘Tithíocht do Chách’ do réimse beart cuimsitheach chun tacú le daoine atá gan dídean. Tá tuilleadh eolais maidir leis an mbeart atá á ghlacadh le fáil ar láithreán gréasáin Thithíocht do Chách.
Is cur chuige atá dírithe ar thithíocht é Tithíocht do Chách a chuireann ar chumas daoine a bhíonn ag codladh amuigh nó a d’úsáid cóiríocht éigeandála go fadtéarmach, agus a bhfuil riachtanais chasta acu, cóiríocht bhuan sheasmhach a fháil. Is é ceann de na príomhbhearta é chun deireadh a chur leis an easpa dídine fadtéarmach. Cuireann an clár diantacaíochtaí ar fáil chun cuidiú leo a dtionóntachtaí a chothú. Cuireann sé teach feadh an tsaoil ar fáil do na daoine gan dídean is leochailí chomh maith le timtacaíochtaí sláinte agus sóisialta a chur ar fáil dóibh.
Faoin bplean, cuirfidh an Rialtas 1,319 tionóntacht sa bhreis a bhfuil tacaíocht leis ar fáil sna cúig bliana atá amach romhainn. Cinnteoidh sé seo go leanann Tithíocht do Chách ar aghaidh ag feidhmiú agus ag fás i ngach contae in Éirinn. Beidh 264 tionóntacht nua i gceist leis gach bliain, agus leagtar amach na spriocanna bliantúla sonracha do gach réigiún sa phlean anois. Tá na spriocanna seo bunaithe ar anailís riachtanais, a raibh baint ag príomhpháirtithe leasmhara leis agus a thacaigh an Ghníomhaireacht Tithíochta leis. Chuidigh Clár Thithíocht do Chách cheana féin le breis agus 600 duine atá gan dídean go fadtéarmach a n-árais chónaithe feadh an tsaoil féin a fháil, agus timtacaíochtaí á gcur ar fáil dóibh chun iad a choinneáil sna hárais chónaithe sin.
De réir gealltanas i dTithíocht do Chách, bunaíodh an Coiste Náisiúnta Gnímh um Easpa Dídine (NHAC) i R4 2021. Is é cuspóir foriomlán NHAC a chinntiú go gcuirtear béim nua ar chomhoibriú ar fud an Rialtais chun gníomhaíochtaí a chur chun feidhme in ‘Tithíocht do Chách’, in éineacht le comhleanúnachas agus comhordú níos fearr a chur ar fáil i seirbhísí a bhaineann leis an easpa dídine agus i mbearta beartais agus i ngníomhaíochtaí chun aghaidh a thabhairt ar an easpa dídine a sheachadadh. Taobh amuigh de sin, beidh ról ag an gCoiste in aghaidh a thabhairt ar fhadhbanna a bhaineann le heaspa dídine agus i dtuilleadh freagairtí a fhorbairt.
Tá an tAire Tithíochta, Rialtais Áitiúil agus Oidhreachta ina chathaoirleach ar an gCoiste a bhuaileann le chéile ar bhonn ráithiúil.
Is é atá i gcomhlachas an Choiste ionadaithe ó Phríomhranna Rialtais, ó ghníomhaireachtaí Stáit agus ó chomhlachtaí a bhfuil baint acu in aghaidh a thabhairt ar an easpa dídine.
Tá Clár an Rialtais ‘Ár dTodhchaí Comhroinnte’ tiomanta do Straitéis Easpa Dídine don Aos Óg a fhorbairt. Bhí an tiomantas seo ar cheann de na gníomhartha i dTithíocht do Chách freisin. Foilsíodh an Straitéis Easpa Dídine don Aos Óg i Ráithe 4 2022. Tá sé mar aidhm aige cabhrú le daoine óga idir 18-24 bliana d’aois atá gan dídean nó atá i mbaol a bheith gan dídean. Tá Grúpa Stiúrtha bunaithe anois chun cur i gcrích na ngníomhartha atá sa Straitéis a bhrú chun cinn.
Má tá tú gan dídean nó má tá tú i mbaol a bheith gan dídean, déan teagmháil le Feidhmeannach Easpa Dídine do Réigiún Bhaile Átha Cliath má tá tú i mBaile Átha Cliath, nó le d’údarás áitiúil má tá tú lasmuigh de Bhaile Átha Cliath, chun eolas a fháil maidir leis na seirbhísí atá ar fáil.
Má tá cónaí ort i gcóiríocht phríobháideach ar cíos agus má tá tú i mbaol a bheith gan dídean déan teagmháil le Threshold.
Má tá tú i mbaol d’áras cónaithe a chailleadh de bharr riaráistí morgáiste déan teagmháil le do Sheirbhís Buiséadaithe agus Comhairle Airgid (MABS) áitiúil nó tabhair cuairt ar láithreán gréasáin na Scéime Morgáiste go Cíos.