Foilsiú
Treoir maidir le clúdaigh aghaidhe a úsáid go sábháilte
Foilsithe
An t-eolas is déanaí
Moltar clúdach aghaidhe éadaigh a chaitheamh i gcásanna ina mbíonn sé deacair scaradh sóisialta a chleachtadh, mar shampla, i siopaí nó ar iompar poiblí gnóthach. D’fhéadfadh clúdaigh aghaidhe éadaigh a chaitheamh cuidiú le cosc a chur ar dhaoine nach bhfuil a fhios acu go bhfuil an víreas orthu é a scaipeadh chuig daoine eile.
Má chaitheann tú ceann, ba cheart duit na rudaí tábhachtacha a dhéanamh atá riachtanach chun scaipeadh an víris a chosc.
Áirítear orthu sin:
- do lámha a ní i gceart agus go minic
- do bhéal agus do shrón a chlúdach le ciarsúr páipéir nó le do mhuinchille agus tú ag casacht agus ag sraothartach
- gan do lámh a leagan ar do shúile, do shrón ná do bhéal mura bhfuil do lámha glan
- scaradh sóisialta (coinnigh 2 mhéadar ar a laghad amach ó dhaoine eile)
Is éard atá i gclúdach aghaidhe éadaigh ná ábhar a chaitheann tú a chlúdaíonn an srón agus an béal.
Má chaitear clúdach aghaidhe éadaigh go poiblí, féadfar leathadh COVID-19 (Coróinvíreas) sa phobal a laghdú. D’fhéadfadh sé cabhrú le scaipeadh braoiníní riospráide ó dhaoine atá ionfhabhtaithe le COVID-19 (Coróinvíreas) a laghdú.
D’fhéadfadh clúdach aghaidhe éadaigh cuidiú le daoine nach bhfuil a fhios acu go bhfuil an víreas acu ón víreas a scaipeadh.
Má tá COVID-19 (Coróinvíreas) ort nó má tá comharthaí an víris agat, caithfidh tú féin-aonrú. Déan é seo fiú má tá clúdach aghaidhe á chaitheamh agat.
D'fhéadfá roghnú clúdach aghaidhe éadaigh a chaitheamh:
- nuair a bhíonn sé deacair coinneáil 2 mhéadar amach ó dhaoine - mar shampla, i siopaí, in ionaid siopadóireachta nó ar iompar poiblí
- nuair a bhíonn tú i spás dúnta le daoine eile
Déantar clúdaigh aghaidhe éadaigh as ábhair cosúil le cadás, síoda nó línéadach.
Is féidir leat iad a cheannach nó iad a dhéanamh sa bhaile ag úsáid earraí cosúil le scaifeanna, t-léinte, léinte aclaíochta, nó tuáillí.
Níl clúdaigh aghaidhe éadaigh oiriúnach do leanaí faoi bhun 13 bliana d’aois agus d’aon duine:
- a bhfuil trioblóid análaithe acu
- atá gan aithne nó faoi éagumas
- nach bhfuil in ann é a bhaint gan chabhair
- a bhfuil riachtanais speisialta aige agus a d’fhéadfadh a bheith trína chéile nó an-míchompordach ag caitheamh an chlúdaigh aghaidhe
Ná cáin agus ná tabhair breithiúnas ar dhaoine nach bhfuil in ann clúdach aghaidhe a chaitheamh.
Ba chóir go gclúdódh clúdach aghaidh éadaigh an srón agus go rachadh sé faoin smig agus:
- go mbeadh sé teann ach compordach ar thaobh d'aghaidh
- go mbeadh sé daingnithe le ceangail nó lúba cluaise
- go mbeadh 2 shraith fabraice ann ar a laghad
- go mbeifeá in ann análú gan srian
Nigh go laethúil in uisce te os cionn 60 céim le glantach.
Má tá meaisín níocháin á úsáid agat, ba cheart go mbeifeá in ann é a ní agus a thriomú gan damáiste nó athrú ar chruth.
Ní gá duit clúdaigh aghaidhe éadaigh a steiriliú. Nigh é i meaisín níocháin nó de láimh mar a dhéanfá le haon earra éadaigh eile.
Nigh do lámha roimh agus tar éis ceann a úsáid.
Chun clúdach éadaigh a dhéanamh sa bhaile:
- gearr dhá dhronuilleog de chadás dlúthfhite thart ar 25cm x 15cm
- fill agus fuaigh na himill ar bharr agus ar bhun
- fill agus fuaigh na himill ar na taobhanna, ag fágáil bearna atá mór go leor chun leaisteach a shnáithiú tríd
- snáithigh dhá phíosa leaisteach 15cm trí na himill agus ceangail go docht iad. Oibreoidh ceangail gruaige nó sreangán, gearrtha níos faide agus ceangailte taobh thiar den cheann
- sáigh snaidhmeanna leaisteacha taobh istigh d’imill an mhaisc agus fuaigh iad le go mbeidh siad deas néata
Ba chóir duit clúdach aghaidhe éadaigh a chaitheamh amach:
- nuair nach gclúdaíonn sé an srón agus an béal a thuilleadh
- nuair atá na ceangail tarraingthe amach nó damáistithe
- nuair nach bhfanfaidh siad ar aghaidh an duine
- nuair atá poill nó stróiceadh san fhabraic
Déan
- glan do lámha i gceart sula gcuireann tú ort é
- cleachtadh é a úsáid ionas go mbeidh tú compordach é a chur ort agus é a bhaint díot
- cinntigh go bhfuil sé déanta as fabraic atá compordach
- clúdaigh do bhéal agus do shrón leis agus déan cinnte nach bhfuil aon bhearnaí idir do chlúdach aghaidhe éadaigh
- ceangail go docht é
- iompair maisc neamhúsáidte i mála glan uiscedhíonach séalaithe (mar shampla, mála ziplock)
- iompair an dara mála den chineál céanna chun maisc úsáidte a chur ann
Ná déan:
- ná leag lámh ar do chlúdach aghaidhe agus tú á chaitheamh - má dhéanann tú sin, glan do lámha i gceart
- ná úsáid masc leighis tais nó fliuch agus ná athúsáid masc leighis
- ná roinn maisc
- ná ísligh do masc chun labhairt, ithe agus tobac nó galtoitín a chaitheamh - más gá duit do shrón nó do bhéal a nochtadh bain an masc de agus cuir sa mhála é le haghaidh masc úsáidte
- ná caith uait maisc in áiteanna poiblí
Chun é a bhaint díot i gceart:
- bain díot é ón gcúl - ná leag lámh ar thosaigh an mhaisc
- ná leag lámh ar do shúile, do shrón agus do bhéal
- glan do lámha i gceart
- cuir maisc aon uaire i mbosca bruscair láithreach
Is d’oibrithe cúram sláinte na maisc leighis (máinliachta agus riospráide). Úsáideann roinnt oibrithe i bpoist ar leith iad freisin. Is soláthairtí fíorthábhachtacha iad agus níl siad beartaithe lena n-úsáid ag an bpobal. Ba mhaith linn iarracht a dhéanamh a chinntiú go gcoinnítear maisc aghaidhe leighis d’oibrithe cúraim sláinte.
Ná caith lámhainní aon uaire in ionad do lámha a ní.
Téann an víreas orthu ar an mbealach céanna agus a dtéann sé ar do lámha. Chomh maith leis sin, d'fhéadfá do lámha a éilliú agus tú á mbaint díot.
Caitear lámhainní aon uaire i suíomhanna leighis. Níl siad chomh héifeachtach sa saol laethúil.
Má bhíonn lámhainní aon uaire á gcaitheamh agat d'fhéadfá mothú go bhfuil tú sábháilte nuair nach amhlaidh an cás.
D'fhéadfá:
- sraothartach nó casacht isteach sna lámhainní - cruthaíonn sé seo dromchla nua gur féidir leis an víreas maireachtáil air
- tú féin a éilliú agus tú ag baint na lámhainní díot nó nuair a leagann tú lámh ar dhromchlaí
- gan do lámha a ní chomh minic agus is gá duit agus do lámh a leagan ar d’aghaidh le lámhainní éillithe
