Imeachtaí agus Tionscnaimh trí Ghaeilge

The Anam Sessions ag Áras an Uachtaráin ar an Déardaoin 1 Deireadh Fómhair

Tá áthas ar Oifig na nOibreacha Poiblí a fhógairt go mbeidh an eipeasóid dheireanach den sraith The Anam Sessions ag Áras an Uachtaráin ar an Déardaoin 1 Deireadh Fómhair ar RTÉ2 ag 11.10 i.n. go hiomlán as Gaeilge. Gheobhaidh an lucht féachana deis ceol iontach a chloisteáil ó na hamhránaithe Aibhse, Huartan, Dairena Ní Chinnéide, Damien Dempsey, Cuas, Pauline Scanlon agus Ruth McGinley.

Fógraíonn Oifig na nOibreacha Poiblí agus Other Voices go mbeidh na léirithe The Anam Sessions ar ais ar RTE2 i mí Meán Fómhair

Gaelathon i bPáirc an Fhionnuisce ar an 11ú Deireadh Fómhair

Tá Gaelathon díolta amach ag an bpointe seo ach fáilte roimh éinne atá ag iarraidh tacú leis an imeacht ar an lá!

Tá Oifig na nOibreacha Poiblí ag comhoibriú le Baile Átha Cliath le Gaeilge agus Club Reatha – Céim ar Chéim chun Gaelathon a eagrú, an chéad rás trí Ghaeilge riamh! An sprioc ná an Ghaeilge a cheiliúradh i rás 5km i bPáirc an Fhionnuisce, i gcroílár Bhaile Átha Cliath. Is cuma más reathaí le seantaithí thú, más reathaí réchúiseach thú, nó má tá tú díreach ag iarraidh an t-atmaisféar a shú isteach agus tacú le himeacht as Gaeilge, beidh fáilte roimh chách.

Reáchtálfar an rás ag suíomh álainn i bPáirc an Fhionnuisce in aice leis an ionad stairiúil, Dún na hArmlainne. Bronnfar bonn speisialta ar gach rannpháirtí in ómós na hócáide agus beidh ceol, craic agus go leor eile ag an gcríochlíne ar an lá.

Cuirfear fáilte roimh chainteoirí Gaeilge cibé leibhéal cumais atá acu.

Cad atá san áireamh le clárúchán?

• Bonn speisialta deartha ag ealaíontóir Nine Arrow do Gaelathon
• Sóláistí agus féiríní iontacha ag an gcríochlíne
• Deis grianghraf a ghlacadh ar an bpóidiam
• Atmaisféar den scoth

Ticéid: €15 (+ táille áirithinte)

Dáta: 11/10/2026

Am: 9.30 r.n.

Suíomh: Páirc an Fhionnuisce

Tuilleadh eolais: eolas@baclegaeilge.ie