Ó An Roinn Comhshaoil, Aeráide agus Cumarsáide
Foilsithe
An t-eolas is déanaí
Is foilsithe anois atá na téarmaí agus coinníollacha do chéim onnmhairiúcháin na Scéime Tacaíochta Leictreachais In-athnuaite Beagscála (SRESS). Fógraíodh na taraifí agus na príomhghnéithe eile den scéim i mí na Bealtaine 2024. Dearadh téarmaí agus coinníollacha SRESS chun bealach níos fusa chun an mhargaidh a sholáthar do thionscadail phobail agus bheagscála, agus is é is aidhm dóibh a bheith níos ailínithe le taithí agus acmhainn na hearnála seo. Tá an scéim le hoscailt le haghaidh iarratas an 27 Eanáir 2025.
Tá téarmaí agus coinníollacha SRESS, achoimre neamhtheicniúil, agus Paca Iarratais SRESS ar fáil anois ar shuíomh gréasáin na roinne.
Ag fáiltiú dó roimh fhoilsiú théarmaí agus coinníollacha SRESS, dúirt Eamon Ryan, an tAire Comhshaoil, Aeráide agus Cumarsáide:
"Cloch mhíle thábhachtach do phobail, do FBManna [Fiontair Bheaga agus Mheánmhéide], d’fheirmeoirí agus do dhaoine eile chun a rannpháirtíocht san aistriú fuinnimh a uasmhéadú is ea ceadú théarmaí agus choinníollacha SRESS. Le SRESS, cabhrófar le spriocanna fuinnimh in-athnuaite na hÉireann a chomhlíonadh. Áirítear leo sin sprioc go soláthrófaí 80% de leictreachas ó fhoinsí in-athnuaite faoin mbliain 2030, lena n-áirítear 8 GW d’fhuinneamh ó ghrianphainéil fhótavoltacha agus 500 MW d’fhuinneamh pobail thar an tréimhse chéanna.
"Tá SRESS ar cheann de na bunchlocha is tábhachtaí de straitéis an rialtais chun giniúint fuinnimh in-athnuaite a mhéadú i measc Pobail Fuinnimh In-athnuaite, FBManna, feirmeoirí agus daoine eile. Tacóidh an chéim seo de SRESS le gach tionscadal fuinnimh in-athnuaite atá dírithe ar onnmhairí agus gach tionscadal fuinnimh beagscála agus pobail ar mó a dtoilleadh ná 50 kW agus nach mó a dtoilleadh ná 6 MW. Tairgfidh sí bealach níos simplí chun an mhargaidh do na tionscadail sin, nach dtagann faoi raon feidhme na gcatagóirí den Scéim Tacaíochta Micrighiniúna (MSS), ar scéim níos lú í, ná den Scéim Tacaíochta Leictreachais In-athnuaite (RESS), ar scéim níos mó ar leibhéal na heangaí í. Go bunúsach, líonfaidh SRESS an bhearna idir an dá scéim sin."
Beidh an chéim seo den scéim tacaíochta leictreachais ina feabhsú suntasach sna tacaíochtaí margaidh do Phobail Fuinnimh In-athnuaite agus do FBManna, agus taraifí socraithe ar fáil do na grúpaí sin le haghaidh tionscadail fuinnimh gréine agus gaoithe ar mó a dtoilleadh ná 50 kW agus nach mó a dtoilleadh ná 6 MW. Chun sainmhíniú an Aontais Eorpaigh ar FBM a chomhlíonadh, ní mór d’fhiontair agus d’fheirmeoirí níos lú ná 250 fostaí a bheith acu agus ní mór a láimhdeachas bliantúil a bheith níos lú ná €50 milliún nó cothrom leis an bhfigiúr sin nó ní mór iomlán a gcláir comhardaithe a bheith níos lú ná €43 mhilliún nó cothrom leis an bhfigiúr sin.
Ina theannta sin, féadfaidh gach tionscadal onnmhairiúcháin nach mó a dtoilleadh ná 1 MW leas a bhaint as an tacaíocht taraife atá ar fáil do FBManna faoi SRESS. Ní gá gur thionscadail de chuid Pobal Fuinnimh In-athnuaite, FBManna ná feirmeoirí a bheadh sna tionscadail sin, nach mó a dtoilleadh ná 1 MW.
Le SRESS, is ann do raon leathan roghanna lena gcuirtear ar chumas an phobail páirt a ghlacadh i nginiúint leictreachais in-athnuaite a sholáthar. Áirítear leo sin an Scéim Tacaíochta Leictreachais In-athnuaite, ar scéim ar scála fóntais í, agus, ag an taobh eile den scála, an Scéim Tacaíochta Micrighiniúna (MSS).
CRÍOCH