Ó An Roinn Turasóireachta, Cultúir, Ealaíon, Gaeltachta, Spóirt agus Meán
Foilsithe
An t-eolas is déanaí
Inniu d’fhógair an tAire Turasóireachta, Cultúir, Ealaíon, Gaeltachta, Spóirt agus Meán, Catherine Martin TD, €10.5m de mhaoiniú breise do scéim Fuaime agus Físe Údarás Craolacháin na hÉireann in 2022.
Cuirfidh an maoiniú nua seo ar chumas Udarás Craolacháin na hÉireann tús a chur le babhta speisialta €5m do thionscadail chraolacháin a ardóidh feasacht ar athrú aeráide, a chuirfidh gníomh aeráide chun cinn agus a thacóidh le hathrú iompraíochta. Áiríonn sé €2.5m a cheadaigh an tAire Comhshaoil, Aeráide agus Cumarsáide, Eamon Ryan.
Ina theannta sin, d’iarr an tAire ar an Údarás €2m a imfhálú do thionscadail chraolacháin cheol beo, agus €2m eile d’ábhar craolacháin Ghaeilge. Chuir an maoiniú breise a chuir an tAire ar fáil freisin ar chumas an Údaráis €1.5m breise a leithdháileadh ar thionscadail faoi Bhabhta 42 den scéim Fuaime agus Físe.
Athrú Aeráide agus Gníomhú ar son na hAeráide
Mar chuid den Phlean Gníomhaíochta Aeráide 2021, gheall an Rialtas tacaíocht a thabhairt d’fhorbairt ábhar meán a ardaíonn feasacht ar athrú aeráide, agus a chuireann gníomh agus athrú iompraíochta chun dul i ngleic leis chun cinn chun. Mar sin, tá €5m á chur ar fáil anois don Údarás do bhabhta Fuaime agus Físe chun tacú le forbairt an ábhair agus na gclár sin. Tá sé seo á chómhaoiniú ag an Roinn Comhshaoil, Aeráide agus Cumarsáide agus an Roinn Turasóireachta, Cultúir, Ealaíon, Gaeltachta, Spóirt agus Meán.
Ag labhairt inniu, dúirt an tAire Martin:
“Tugaim tús áite i gcónaí do dhul i ngleic leis an athrú aeráide agus táim bródúil as an ngealltanas seo i bPlean Gníomhaíochta Aeráide 2021 a chomhlíonadh. Cruthóidh maoiniú Fuaime agus Físe cláir a fheabhsaíonn inniúlacht aeráide agus a chuireann maolú ar an athrú aeráide chun cinn.
“Tá sé ríthábhachtach go gcuirimid daoine ar an eolas faoi na bagairtí a bhaineann le hathrú aeráide agus go spreagaimid daoine chun dul i ngleic leis. Taispeánfaidh an clár Fuaime agus Físe seo do dhaoine cad atá ag tarlú dár n-aeráid agus conas é a stopadh.”
Dúirt an tAire Comhshaoil, Aeráide agus Cumarsáide, Éamon Ryan, TD:
“Chun ár spriocanna aeráide a bhaint amach, beidh orainn go léir an chaoi a n-oibrímid; a dtéimid ár dtithe; a dtaistealaímid; a úsáidimid earraí agus seirbhísí; agus a bhainistímid ár ndramhaíl a athrú. Trí inniúlacht aeráide a fheabhsú, cuirfimid ar chumas daoine athruithe a dhéanamh ina saol laethúil agus dul i ngleic le gníomhaíocht aeráide ar leibhéal áitiúil agus náisiúnta.
“Tá lúcháir orm go bhfuil mo Roinnse ag cur €2.5m ar fáil do mhaoiniú an bhabhta speisialta aeráide seo den Scéim Fuaime & Físe. Trí shaineolas Údarás Craolacháin na hÉireann, agus fís lucht déanta clár na hÉireann, is féidir linn raon de chláir nuálacha agus chruthaitheacha a chinntiú chun feasacht aeráide a ardú, inniúlacht a fheabhsú agus daoine a chumasú ar fud na tíre.”
Ceol Beo
Tá €2m á chur ar fáil faoin scéim Fuaime agus Físe chun tacú le tionscadail chraolacháin cheoil bheo.
Dúirt an tAire Martin: “Tá lúcháir orm an maoiniú seo a leithdháileadh ar thionscadail chraolacháin cheoil bheo. Anuraidh, thacaigh maoiniú breise €1.4m a chuir mé ar fáil d’Údarás Craolacháin na hÉireann le 8 dtionscadal spreagúla ceoil bheo, ar nós Mhí Cheol na hÉireann agus gradam Laoch Áitiúil Nua. Táim ag tnúth le go leor tionscadail spreagúla dá leithéid a fhorbairt i mbliana tríd an tacaíocht atá á fhógairt agam inniu.”
Dúirt an tAire chomh maith: “Tá an ceol an-tábhachtach domsa go pearsanta agus do mhuintir na hÉireann, agus tá sé riachtanach go dtugaimid gach deis do cheoltóirí seinm os comhair lucht féachana. D’ainneoin shrianta COVID-19 a mhaolú, tá tacaíocht leanúnach an Rialtais don earnáil seo ríthábhachtach agus í ag dul trí na tréimhsí deacra seo. Comhlánaíonn an maoiniú breise seo an pacáiste tacaíochta €50m don earnáil tabhaithe beo i gcoitinne a d’fhógair mé i mí na Nollag anuraidh.”
Gaeilge
As an maoiniú a fógraíodh inniu, leithdháilfear €2m ar léiriú ábhar Gaeilge i mbliana. Cabhróidh sé seo le tiomantas Chlár an Rialtais don Ghaeilge agus do Straitéis 20 Bliain don Ghaeilge a chomhlíonadh.
Agus í cur fáilte roimh chinneadh an Údaráis an maoiniú seo a imfhálú, dúirt an tAire Martin:
“Tacaím go láidir leis an nGaeilge i gcónaí. I mbuiséad mhí Dheireadh Fómhair seo caite, fuair mé €4.2m breise do TG4, an t-ardú aonair is mó riamh i stair an chraoltóra, agus chuir an rialtas €1m eile ar fáil freisin do léiriú ábhar Gaeilge i dTuaisceart Éireann.
“Tá lúcháir orm a bheith in ann €2m breise a leithdháileadh chun cláir Ghaeilge ar ardchaighdeán a chruthú tríd an scéim Fuaime agus Físe, agus táim ag tnúth le féachaint ar agus ag éisteacht leis an ábhar a léireofar leis an maoiniú breise seo.”
Nótaí don Eagarthóir
Tá an maoiniú a fógraíodh inniu sa bhreis ar mhaoiniú reachtúil na Scéime Fuaime agus Físe, a mhaoinítear ó 7% de ghlanfháltais an Cheadúnais Teilifíse.
Tá sonraí iomlána na scéime (agus na dtionscadail ráthúla) ar fáil ar láithreán gréasáin Údarás Craolacháin na hÉireann ar www.bai.ie .
Foilseoidh Udarás Craolacháin na hÉireann sonraí faoi conas iarratas a dhéanamh ar an maoiniú a fógraíodh inniu nuair a osclaítear gach babhta d’iarratais.