Ceiliúrann an tAire chéad lá breithe na Scéime Aisíoca Éarlaise
Ó An Roinn Comhshaoil, Aeráide agus Cumarsáide
Foilsithe
An t-eolas is déanaí
Ó An Roinn Comhshaoil, Aeráide agus Cumarsáide
Foilsithe
An t-eolas is déanaí
Inniu, cheiliúir Darragh O’Brien, an tAire Aeráide, Comhshaoil agus Fuinnimh, comóradh bliana thabhairt isteach na Scéime Aisíoca Éarlaise.
Agus í deartha chun dramhaíl aon úsáide a laghdú go mór, tá an Scéim Aisíoca Éarlaise ar cheann de na tionscnaimh iompraíochta tomhaltóirí is dearfaí a tharla sa tír seo leis na cianta, agus tá tionchar claochlaitheach aige cheana féin. Sa chéad sé mhí dá hoibriú, tugadh 350 milliún coimeádán ar ais agus, faoi dheireadh na chéad bhliana, bailíodh níos mó ná 980 milliún coimeádán tríd an scéim, agus na milliúin buidéal plaisteach agus cannaí alúmanaim a n-atreorú ar shiúl ó líonadh talún agus ó bhruscar.
Tá an pobal ag glacadh go mór leis an scéim freisin, agus eagraíochtaí pobail agus carthanachta ag baint úsáid aisti le haghaidh airgead a chruinniú. Cruinníodh €90,000 le haghaidh an tionscnaimh ‘Return for Children’, agus chláraigh i bhfad níos mó ná 2,000 ceann de scoileanna, de chlubanna agus d’eagraíochtaí pobail leis an scéim dá ngníomhaíochtaí cruinnithe airgid féin.
Dúirt an tAire O’Brien:
"Sa chéad 12 mhí dá hoibriú, rinneadh níos mó ná 980 milliún coimeádán, idir bhuidéil agus channaí, a bhailiú agus a athchúrsáil faoin Scéim Aisíoca Éarlaise, agus tháinig laghdú ollmhór ar an líon ceann de na coimeádáin sin a caitheadh mar bhruscar nó a cuireadh i líonadh talún. Ba mhaith liom buíochas a ghabháil le gach duine a ghlac páirt sa scéim sa chéad bhliain. Bíonn na hiarrachtaí sin ag déanamh fíordhifir maidir le dramhaíl a laghdú agus maidir le hathchúrsáil a chur chun cinn, agus táim ag tnúth le difear níos mó fós a fheiceáil sa bhliain 2025.
"Gné ríthábhachtach atá taobh thiar de rath na scéime is ea tionscal deochanna agus miondíoltóirí na hÉireann, a tháinig le chéile trí Re-turn chun samhail lán-nua athchúrsála a thógáil. Agus níos mó ná 3,000 pointe aisíoca ann ar fud na tíre, cinntítear leis an Scéim Aisíoca Éarlaise go bhfuil an cumhdach is mó is féidir ann do phobail uirbeacha agus do phobail tuaithe araon."
Dúirt Alan Dillon, an tAire Stáit don Gheilleagar Ciorclach:
"Tá an Scéim Aisíoca Éarlaise ina beart eile cruinnithe airgid do chuid mhór grúpaí áitiúla agus pobail. Trí pháirt a ghlacadh sa scéim, ní hé amháin go mbíonn scoileanna, clubanna spóirt agus grúpaí eile ag cruinniú airgid a bhfuil géarghá leis trí bhruscar a laghdú agus trína bpobail féin a ghlanadh, ach bíonn siad ag rannchuidiú ar bhonn comhchoiteann freisin le hÉirinn a dhéanamh níos glaise agus níos inbhuanaithe."
Dúirt Ciaran Foley, Príomhoifigeach Feidhmiúcháin ar Re-turn:
"B’fhearr feidhmíocht Scéim Aisíoca Éarlaise na hÉireann sa chéad bhliain dá hoibriú ná mar a bhíothas ag súil leis. Athchúrsáladh níos mó ná 980 milliún coimeádán deochanna tríd an scéim. Más rud é go leanfaidh na rátaí reatha ar aghaidh, tiocfaidh méadú de thart ar 630 milliún ceann ar an líon buidéal plaisteach agus cannaí a athchúrsálfaimid sa dá mhí dhéag atá romhainn i gcomparáid leis an líon ba ghnách linn a athchúrsáil roimh thabhairt isteach na scéime. Mar aon leis an tionchar comhshaoil, bíonn éarlaisí aisíoctha á n-úsáid ag níos mó ná 2,000 ceann de chlubanna, de scoileanna agus d’eagraíochtaí anois chun cúiseanna ríthábhachtacha a chistiú. Cé go bhfuil tuilleadh oibre le déanamh againn, is léir go bhfuilimid ar an mbóthar ceart, agus is ar rannpháirtíocht agus tionchar a mhéadú a dhíreoimid sa bhliain 2025."
CRÍOCH