Foilsithe
An t-eolas is déanaí
D'fhógair an tAire Sláinte Stephen Donnelly TD agus an tAire um Mheabhairshláinte agus Daoine Aosta, Mary Butler TD, bronnadh an chonartha chun seacht nAonad Altranais Pobail (CNU) a sheachadadh faoi chlár comhlíonta HIQA trí Chomhpháirtíocht Phríobháideach Phoiblí (Tionscadal PPP CNU).
Soláthróidh an Tionscadal CNU PPP na saoráidí cúraim chónaithe ina mbeidh leapacha do dhaoine aosta ar bhonn gearrthéarmach agus fadtréimhseach ag saoráidí ar fud na tíre.
Soláthrófar 530 leaba ar an iomlán i láithreacha ag Baile Átha Fhirdhia (50 leaba), Baile Átha Luain (50 leaba), Cluain Meala (50 leaba), Cill Airne (130 leaba), Mainistir na Corann (50 leaba), Naomh Fionnbarra, Corcaigh (105 leaba), agus Baile Mhic Andáin (95 leaba).
Tá líon áirithe teaghlach 25 leaba i ngach CNU, lena n-áirítear seomraí singil agus dhá leaba en-suite. Cruthaíonn an tsamhail seo cur chuige duine-lárnach a dhíríonn ar cháilíocht na beatha; rud a sholáthraíonn timpeallacht a léiríonn compord an bhaile, le cúnamh á chur ar fáil de réir mar is gá i ndáil le tascanna laethúla a chomhlíonadh. Cuimsíonn gach teaghlach seomra lae agus seomra gréine, láthair itheacháin, spásanna ar leithligh, spásanna gníomhaíochta, seomraí suaimhnis, spásanna seachtracha agus limistéir foirne agus altranais.
Ina theannta sin, tá áiteanna comhroinnte agus spásanna teiripe san áireamh le saoráidí lena n-áirítear seomra fanachta thar oíche do theaghlaigh, seomraí cóireála cliniciúla, seomraí fisiteiripe agus teiripe shaothair agus seomraí gruagairí.
Áirítear leapacha a bhaineann go sonrach le néaltrú i gCill Airne (trí theaghlach deich leaba), i Naomh Fhionnbarra (trí theaghlach deich leaba) agus i mBaile Mhic Andáin (dhá theaghlach deich leaba) chomh maith le hIonad Lae i mBaile Átha Luain.
Dúirt an tAire Donnelly:
"Tá ríméad orm bronnadh an chonartha seo a fhógairt. Díríonn na tionscadail seo ar sheirbhís sláinte agus cúraim shóisialta den scoth a sholáthar ar fud na tíre i suíomhanna cuí agus laistigh de chomhthéacs na gníomhaíochta aeráide.
“Is forbairt spreagúil, úrscothach í seo do dhaoine aosta agus dá dteaghlaigh. Léiríonn sé cuid shuntasach de chlár HIQA CNU, agus cumasóidh an meascán de leapacha fadtéarmacha agus gearrthéarmacha cur chuige duine-lárnach chun tacú le caighdeán saoil daoine aosta.
“Nuair a bhronnfar an conradh seo cuirfear tús láithreach leis an tógáil ar chúig cinn de na láithreáin seo, agus an dá cheann eile sa chéad ráithe de 2023, agus críochnófar an tógáil ar gach láithreán faoi 2024”.
Dúirt an tAire Butler:
“Ceann de phríomhthosaíochtaí an Rialtais seo is ea tacú le daoine aosta dul in aois agus maireachtáil le dínit agus neamhspleáchas ina dtithe agus ina bpobail féin chomh fada agus is féidir.
“Is cuid riachtanach agus luachmhar dár mbonneagar cúraim shóisialta iad Aonaid Altranais Pobail FSS. Dóibh siúd a bhaineann leas as cúram cónaithe fadtéarmach, tá sé riachtanach go gcoinnítear infheistíocht phoiblí sa bhonneagar seo ag leibhéal a thacaíonn leis an gcaighdeán cúraim is airde.
“Cuirfidh na seacht láithreán seo rogha bhreise de chúram cónaithe fadtéarmach ar fáil dár ndaoine aosta ar fud na tíre”.
Tosófar ag tógáil ar chúig cinn de na saoráidí roimh Nollaig 2022 (Baile Átha Fhirdhia, Cluain Meala, Cill Airne, Naomh Fionnbarra - Corcaigh agus Baile Mhic Andáin) agus an dá cheann eile (Baile Átha Luain agus Mainistir na Corann) go luath in 2023. Táthar ag súil go mbeidh an tógáil críochnaithe faoi dheireadh 2024.
Ceapadh Equisisk chun saoráidí CNU a dhearadh, a thógáil, a mhaoiniú agus a chothabháil ar feadh tréimhse 25 bliana sula dtugtar na saoráidí ar ais do FSS. Faoi théarmaí an chonartha, íocfaidh FSS íocaíochtaí bliantúla (muirear aonadach) €24 milliún leis an gcuideachta PPP don téarma 25 bliana.
Sholáthair FSS an tionscadal de réir Threoirlínte PPP agus déanfaidh sí maoirseacht ar a sheachadadh. Fanfaidh na láithreáin faoi úinéireacht an Stáit ar feadh na tréimhse ar fad, agus soláthróidh FSS na seirbhísí cúraim othar go léir.