Preasráitis
Ráiteas ón Roinn Sláinte maidir le bainistíocht cásanna dlí
Foilsithe
An t-eolas is déanaí
Foilsithe
An t-eolas is déanaí
Tá an ráiteas seo a leanas eisithe ag an Roinn Sláinte mar fhreagairt ar imscrúdú RTE maidir le faisnéis a choinneáil i ndáil le caingne dlí i gcoinne an stáit;
Ba mhaith leis an Roinn Sláinte a chur in iúl do thuismitheoirí, do theaghlaigh agus do pháirtithe leasmhara nach raibh faisnéis leighis agus oideachasúil íogair riamh á coinneáil go neamhdhleathach ag an Roinn faoi leanaí a bhfuil baint acu le cásanna cúirte díomhaoine.
Is é misean na Roinne sláinte agus folláine daoine in Éirinn a fheabhsú agus na daoine is leochailí sa tsochaí a chosaint. Tuigeann an Roinn an tionchar a bheidh ag na ceannlínte seo ar theaghlaigh a mbaineann an scéal seo leo agus rachaidh sí i dteagmháil le páirtithe leasmhara ar na hábhair seo sna laethanta amach romhainn chun aghaidh a thabhairt ar aon ábhar imní.
Is gnáthchleachtas é do chosantóirí dlíthíochta faisnéis iomchuí a bhailiú agus a choinneáil d’fhonn comhairle dlí a fháil agus/nó na himeachtaí a chosaint. Tá sé seo riachtanach chun leas an phobail a chosaint agus is gnáthchleachtas é chun dlíthíocht a bhainistiú.
Cuireadh ábhar imscrúdú RTE in iúl don Roinn anuraidh. Rinne an Roinn imscrúdú ar na hábhair seo go tráthúil agus choimisiúnaigh sí athbhreithniú neamhspleách saineolach ag Abhcóide Sinsearach seachtrach. Críochnaíodh an t-athbhreithniú seo i mí na Samhna 2020.
Níor shainaithin an t-athbhreithniú aon sárú ar na hAchtanna um Chosaint Sonraí. Fuair an t-athbhreithniú amach go bhfuil an fhaisnéis i gcomhaid ábhartha arna mbainistiú ag an Roinn i gcomhréir leis an gcineál faisnéise a thagann chun cinn i ndlíthíocht den sórt sin, agus tipiciúil di. Níor aimsigh an scrúdú aon bhunús chun éagóir a mhaíomh arna eascairt as an bhfaisnéis.