Foilsiú
Laethanta Saoire agus Íocaíochtaí Leasa Shóisialaigh
Foilsithe
An t-eolas is déanaí
Go ginearálta, is féidir leat a bheith ar laethanta saoire suas go dtí dhá sheachtain in aghaidh na bliana agus leantar le d'íocaíocht leasa shóisialaigh. Mar sin féin, ní mór duit dul i dteagmháil le d'Ionad Intreo, Oifig Brainse nó d'Oifigeach Leasa Pobail chun do theidlíochtaí a sheiceáil sula dtosaíonn tú ag pleanáil nó sula dtéann tú ar laethanta saoire.
Má tá do laethanta saoire níos faide ná 2 sheachtain nó má tá tú ag súil le bheith thar lear ar feadh tréimhse bhreisithe ama, tá seans ann nach n-íocfar d'íocaíocht leasa shóisialaigh.
Má fhaigheann tú Liúntas Cuardaitheora Poist, Sochar Cuardaitheora Poist nó Sochar Cuardaitheora Poist do Dhaoine Féinfhostaithe, is féidir leat dul ar laethanta saoire ar feadh dhá sheachtain i mbliain féilire ar a mhéad, agus an íocaíocht don dá sheachtain a fháil nuair a thagann tú ar ais.
Sula dtéann ar laethanta saoire, caithfidh tú d'Ionad Intreo nó Oifig Brainse áitiúil a chur ar an eolas.
Anuas air sin, más lúthchleasaí amaitéarach thú, is féidir leat d'íocaíocht leasa shóisialaigh a fháil nuair a thagann tú ar ais tar éis duit ionadaíocht a dhéanamh thar ceann na hÉireann ag imeachtaí spóirt idirnáisiúnta. Ní mór duit dearbhú i scríbhinn a fháil ón bhforas rialaithe spóirt faoin spórt agus faoin am atá i gceist. Is in éineacht le do shaoire dhá sheachtain le pá a thagann sé seo.
Más cuardaitheoir poist thú agus má tá cuntas fíoraithe MyGovID agat, is féidir a chur in iúl don roinn go bhfuil i gceist agat dul ar saoire ar MyWelfare.ie.
Más cuardaitheoir poist thú agus mura bhfuil cuntas fíoraithe MyGovID agat, ní mór duit an fhoirm thíos a líonadh agus í a thabhairt chuig d'Ionad Intreo nó Oifig Brainse áitiúil.
Caithfidh tú d'fhoirm iarratais saoire (UP30) a líonadh agus a chur isteach 2 sheachtain ar a laghad sula dtéann tú ar do laethanta saoire. Ní féidir leat iarratas a dhéanamh níos mó ná 21 lá sula dtéann tú.
