Preasráitis
Fógraíonn an tAire Naughton sonraí maidir le maoiniú breise do scoileanna speisialta
Foilsithe
An t-eolas is déanaí
D'fhógair an tAire Stáit um Oideachas Speisialta agus Cuimsiú, Hildegarde Naughton T.D., sonraí inniu maidir leis na socruithe chun iarratas a dhéanamh ar chur i bhfeidhm na dtacaíochtaí spriocdhírithe breise do scoileanna speisialta a fógraíodh i mBuiséad 2024.
Cuireann scoileanna speisialta oideachas ar fáil do leanaí agus do dhaoine óga a bhfuil na riachtanais speisialta oideachais is suntasaí acu. Príomhghné de Bhuiséad 2024 is ea €11 milliún breise a chur ar fáil atá dírithe go sonrach ar na scoileanna sin. Foráiltear leis an maoiniú breise seo do na nithe seo a leanas:
- Deireadh a chur leis an tairseach reatha 15 mhúinteoir chun Phríomhoidí Tánaisteacha Riaracháin a cheapadh i scoileanna speisialta agus
- 100 post múinteoireachta eile dírithe ar scoileanna speisialta ina bhfuil daltaí in aois iar-bhunscoile.
Cuireann na cistí breise seo tuilleadh feabhais ar an infheistíocht inár gcóras oideachais agus léiríonn siad tiomantas an Rialtais do chóras scoile cuimsitheach ar ardchaighdeán agus torthaí foghlama feabhsaithe do gach dalta.
Beidh poist bhreise do Phríomhoidí Tánaisteacha Riaracháin ríthábhachtach chun cabhrú le príomhoidí a bhfuil feidhmeanna ceannaireachta agus bainistíochta acu agus chun tacú le foghlaim agus le rannpháirtíocht tuismitheoirí agus pobail.
Bainfidh 89 scoil speisialta tairbhe as na poist bhreise mar Phríomhoide Tánaisteach Riaracháin ó mhí Mheán Fómhair seo chugainn.
Tá os cionn 50% de na daltaí i scoileanna speisialta 13 bliana d'aois agus níos sine.
Éascóidh na poist bhreise teagaisc iar-bhunscoile scoileanna speisialta chun réimse níos mó ábhar curaclaim náisiúnta a sholáthar sa tsraith shóisearach agus sa tsraith shinsearach, ag soláthar rochtana ar chláir atá oiriúnach ó thaobh aoise agus céime de, agus a chuireann le láidreachtaí aonair agus a chuireann dul chun cinn agus aistriú chun tosaigh.
Tiontaíodh na poist bhreise ina mbanc d'uaireanta teagaisc iar-bhunscoile (uaireanta comhoibrithe) agus leithdháilfear iad ar scoileanna ar bhonn pro rata, de réir líon na ndaltaí atá 13 bliana d'aois agus os a chionn sa scoil.
Tá roinnt scoileanna speisialta ann a bhaineann tairbhe as uaireanta comhoibrithe iar-bhunscoile agus/nó uaireanta speisialtóireachta páirtaimseartha iar-bhunscoile cheana féin agus a bhfuil rochtain acu orthu.
Ar mhaithe le cothroime agus dáileadh cothrom ar an leithdháileadh foriomlán atá ar fáil, beidh aon leithdháileadh atá ann cheana mar chuid den bhreithniú chun aon leithdháileadh amach anseo do scoileanna a chinneadh.
Mar sin féin, má chinneann leithdháileadh na n-uaireanta breise dá dtagraítear thuas go bhfuil gá le leithdháileadh breise ar líon na ndaltaí iar-bhunscoile sna scoileanna sin, méadófar na huaireanta reatha atá ar fáil don scoil dá réir.
Ní chuirfear aon laghdú i bhfeidhm ar leithdháiltí atá ann cheana féin.
Bainfidh 88 scoil speisialta tairbhe as leithdháileadh nua nó méadaithe d'uaireanta teagaisc iar-bhunscoile.
Dúirt an tAire Naughton:
"Is é Buiséad 2024 an tiomantas is mó riamh, i dtéarmaí réadacha, airgeadais agus céatadáin, do scoláirí a bhfuil riachtanais speisialta oideachais acu agus dá dteaghlaigh. Ceapadh mionsonraí na mbeart spriocdhírithe do scoileanna speisialta a fógraíodh inniu chun tacú leis an 9,000 dalta i scoileanna speisialta a bheith rathúil ar scoil agus méid iomlán a gcumas a bhaint amach.
"Ba mhaith liom aitheantas a thabhairt go háirithe don tacaíocht a thug Boird Oideachais agus Oiliúna Éireann (BOOÉ) agus do gach ceann de na Boird Oideachais agus Oiliúna (BOO) ar fud na tíre a chuaigh i gcomhpháirtíocht, in éineacht leis an gComhairle Náisiúnta um Oideachas Speisialta (CNOS), le mo Roinn chun tacú le soláthar na bpost breise iar-bhunscoile i scoileanna speisialta.
"Beidh gach scoil speisialta ailínithe lena BOO áitiúil, ag soláthar rochtana ar mhúnla tacaíochta do sholáthar múinteoirí i gceantair churaclaim ábhartha. Is é an BOO ainmnithe a bhainisteoidh gach ábhar a bhaineann le hearcú, sannadh agus íocaíocht na múinteoirí lena mbaineann.
"Tá áthas ar leith orm faoi na deiseanna a chuirfidh an tsamhail tacaíochta seo ar fáil maidir leis an bhféidearthacht atá ann do mhúinteoirí agus do scoláirí oibriú ar fud scoileanna/ranganna speisialta agus príomhshrutha araon, rud a éascóidh an cumas chun acmhainn a fhorbairt agus saineolas a roinnt ar fud suíomhanna scoile príomhshrutha agus speisialta. Cuideoidh soláthar na bpost múinteoireachta iar-bhunscoile breise seo le scoileanna speisialta a bheith réidh chun modúil nua Leibhéal 1 agus Leibhéal 2 na Sraithe Sinsearaí atá á bhforbairt faoi láthair mar chuid d'athfhorbairt na Sraithe Sinsearaí a sholáthar. Tacóidh na poist nua agus na conairí curaclaim seo sa tSraith Shinsearach le daltaí inár scoileanna speisialta aistriú chuig deiseanna breisoideachais agus oiliúna atá ar fáil agus deiseanna fostaíochta tar éis na scoile."
Tá tuilleadh sonraí i gCiorclán 0028/2024 na Roinne maidir leis na bearta thuasluaite agus eiseofar iad chuig scoileanna speisialta agus a n-údaráis bhainistíochta inniu, an 22 Aibreán.
