Áirítear leis an straitéis náisiúnta Litearthacht agus Uimhearthacht don Fhoghlaim agus don Saol raon gníomhartha chun cur ar chumas tuismitheoirí agus pobal tacú le foghlaim leanaí. Aithnítear sa straitéis go n-imríonn tuismitheoirí a mbíonn páirteach i bhfoghlaim a linbh ról dearfach suntasach ar ghnóthachtáil oideachais an linbh – go háirithe sa litearthacht agus san uimhearthacht.
Mar chuid den straitéis seo, d’iarr an Roinn ar an Áisíneacht Náisiúnta Litearthachta d’Aosaigh (NALA) béim a leagan ar an ról a imríonn tuismitheoirí agus pobail maidir le feabhas a chur ar litearthacht agus uimhearthacht leanaí trí úsáid a bhaint as na meáin, as acmhainní ar líne agus as formhuinithe ó iomráitigh.
D’fhonn é sin a bhaint amach, d’fhorbair NALA Help My Kid Learn – ar suíomh gréasáin simplí é a thugann faisnéis ábhartha do thuismitheoirí agus don phobal níos leithne le chéile chun tacú le forbairt litearthachta agus uimhearthachta leanaí.
Is é cuspóir an tsuímh ghréasáin seo gníomhaíochtaí spraoi a chur ar fáil is féidir le tuismitheoirí a dhéanamh lena gcuid leanaí chun a scileanna litearthachta agus uimhearthachta a fhorbairt. Cuimsíonn sé faisnéis ghinearálta, gníomhaíochtaí spraoi agus leideanna úsáideacha. Tá an suíomh Help My Kid Learn ina shuíomh gréasáin inar féidir le daoine a fheiceáil gur gníomhaíocht nádúrtha, éasca agus spraoi é tacú le forbairt litearthachta agus uimhearthachta linbh agus gur féidir í a chomhtháthú in aon chuid dá lá.
Tá raon leathan grúpaí reachtúla agus deonacha ag leibhéal an phobail cheana féin a thacaíonn le forbairt litearthachta agus uimhearthachta leanaí agus daoine fásta. Is é aidhm an tsuímh seo a bheith ag obair leo, agus tacaíocht a thabhairt do gach ceann de na hiarrachtaí sin, trí phointe tagartha aonair a chur ar fáil do thuismitheoirí agus do chaomhnóirí ionas gur féidir leo tuiscint níos fearr a fháil ar an ról atá acu i bhforbairt litearthachta agus uimhearthachta a gcuid leanaí.