Tascfhórsa Náisiúnta um Inacmhainneacht Fuinnimh

Éileoidh an t-aistriú i dtreo geilleagair leictrithe agus ísealcharbóin leibhéil infheistíochta gan fasach i gcumas giniúna in-athnuaite agus traidisiúnta chomh maith le bonneagar líonra, rud a chuirfidh dúshláin bheartais agus rialála nua i láthair. Geallann Clár an Rialtais, Todhchaí na hÉireann a Dhaingniú, go ndéanfaidh an rialtas beartais a chur chun cinn a thabharfaidh aghaidh ar chostais arda fuinnimh do theaghlaigh agus do ghnólachtaí i gcomhthéacs an aistrithe seo.

Bunaíodh an Tascfhórsa Náisiúnta um Inacmhainneacht Fuinnimh chun tiománaithe costais a aithint agus moltaí a dhéanamh maidir le hathchóirithe struchtúracha a rachaidh chun tairbhe do thomhaltóirí sa mheántéarma (2026-2030) agus san fhadtéarma (i ndiaidh 2030) agus na príomhghealltanais in-athnuaite a shonraítear sa Phlean Gníomhaithe ar son na hAeráide á seachadadh ag an am céanna, agus slándáil an tsoláthair a chosaint. Áireofar ar chlár oibre an Tascfhórsa Plean Gníomhaíochta Inacmhainneachta Fuinnimh a ullmhú agus a fhoilsiú agus monatóireacht a dhéanamh ar a chur i bhfeidhm ar bhonn leanúnach.

Is iad seo a leanas príomhchuspóirí an Tascfhórsa:

• athbhreithniú a dhéanamh ar thiománaithe praghsanna laistigh d’earnáil fuinnimh na hÉireann d’fhonn athchóirithe struchtúracha a shainaithint agus meastóireacht a dhéanamh ar an gcaoi a ndáiltear costais laistigh den chóras fuinnimh
• plean eatramhach a dhréachtú chun bearta gearrthéarmacha a shainaithint chun tacú le tomhaltóirí fuinnimh roimh Bhuiséad 2026
• tabhairt faoi chomhairliúchán poiblí chun a chinntiú go ndéantar tosaíochtaí an Tascfhórsa a mhúnlú le hionchur ón bpobal agus ó pháirtithe leasmhara
• plean Gníomhaíochta Náisiúnta um Inacmhainneacht Fuinnimh a fhoilsiú, lena n-áireofar bearta meántéarmacha agus fadtéarmacha agus athchóirithe struchtúracha chun costais a ísliú do theaghlaigh agus do ghnólachtaí

Beidh an Tascfhórsa faoi chathaoirleacht na Roinne Aeráide, Fuinnimh agus Comhshaoil, agus tá sé comhdhéanta de chomhaltaí ó na heagraíochtaí seo a leanas:

• Roinn an Taoisigh
• An Roinn Fiontar, Turasóireachta agus Fostaíochta
• An Roinn Airgeadais
• An Roinn Caiteachais Phoiblí, Bonneagair, Athchóiriúcháin Seirbhíse Poiblí agus Digitiúcháin
• An Roinn Coimirce Sóisialaí
• An Roinn Tithíochta, Rialtais Áitiúil agus Oidhreachta
• An Coimisiún um Rialáil Fóntais (CRF)
• Údarás Fuinnimh Inmharthana na hÉireann (ÚFIÉ)
• An Institiúid Taighde Eacnamaíochta agus Sóisialta (ITES)
• ESB Networks
• EirGrid
• Líonraí Gáis Éireann

Beidh tacaíocht ag clár oibre an Tascfhórsa ó phróiseas rannpháirtíochta leanúnaí le páirtithe leasmhara ábhartha, lena n-áirítear comhlachtaí tionscail, soláthraithe agus eagraíochtaí neamhrialtasacha.