Ainmníonn an tAire McGrath an Ghníomhaireacht um Fhorbairt Talún chuig NewERA
- Foilsithe: 29 Eanáir 2024
- An t-eolas is déanaí: 12 Aibreán 2025
Shínigh Michael McGrath, an tAire Airgeadais, an Ionstraim Reachtúil iomchuí faoi alt 18(3) den Acht um Ghníomhaireacht Bainistíochta an Chisteáin Náisiúnta (Leasú), 2014, chun a fhoráil go mbeidh an Ghníomhaireacht um Fhorbairt Talún ina comhlacht ainmnithe ar ina leith a fhéadfaidh an tÚdarás um Gheilleagar Nua agus um Théarnamh (NewERA) seirbhísí áirithe comhairleacha airgeadais agus tráchtála a sholáthar d’Airí iomchuí.
Dar leis an Aire Airgeadais:
“Tá lúcháir orm an Ghníomhaireacht um Fhorbairt Talún a ainmniú chuig NewERA. Soláthraíonn NewERA seirbhís ríthábhachtach comhairle airgeadais agus tráchtála d’Airí agus ranna i ndáil leis na cuideachtaí earnála tráchtála Stáit a thagann faoina phunann, agus tugann sé eolas mionsonraithe comparáideach ar fud earnálacha éagsúla. Beidh an chomhairle ó NewERA an-úsáideach don Aire Tithíochta ar an gcéad ásc, ach rachaidh sí chun tairbhe ar deireadh do na hAirí eile a bhfuil freagrachtaí orthu i ndáil leis an nGníomhaireacht um Fhorbairt Talún.”
Nótaí
Leis an Acht um Ghníomhaireacht Bainistíochta an Chisteáin Náisiúnta (Leasú), 2014 (Acht GBCN), cuireadh na feidhmeanna atá ag GBCN i leith NewERA ar bhonn reachtúil. Áirítear leis na feidhmeanna sin, i measc nithe eile, seirbhísí comhairleacha airgeadais agus tráchtála a sholáthar d’Airí iomchuí maidir le feidhmiú a bhfeidhmeanna úinéireachta i gcuideachtaí ainmnithe áirithe earnála tráchtála Stáit. Ar an tslí sin, soláthraíonn NewERA seirbhís ríthábhachtach do scairshealbhóirí Aireachta i ndáil leis na cuideachtaí sin agus tugann sé eolas comparáideach ar fud earnálacha éagsúla, agus céim bhreise anailíse cáilíochtúla á cur aige le tionscadail agus tograí an tráth céanna.
Tar éis an ainmniúcháin, beidh NewERA in ann comhairle áirithe tráchtála agus airgeadais a sholáthar d’Airí maidir le nithe iomchuí airgeadais agus tráchtála a bhaineann leis an nGníomhaireacht um Fhorbairt Talún. Ar aon dul le hAcht GBCN, áfach, féadfaidh na hAirí aon chomhairle nó aon tosca eile is cuí leo a chur san áireamh freisin.
San am i láthair, is trí chomhaontú a sholáthraíonn NewERA comhairle airgeadais agus tráchtála don Aire Tithíochta, Rialtais Áitiúil agus Oidhreachta maidir le nithe sonraithe a bhaineann leis an nGníomhaireacht um Fhorbairt Talún.
Mar gheall ar an ról atá ag NewERA maidir le comhairle tráchtála agus airgeadais a sholáthar d’Airí/ranna iomchuí maidir le raon leathan cuideachtaí earnála tráchtála Stáit agus raon leathan sannachán (lena n-áirítear, mar shampla, comhairle a sholáthar maidir le ceapacháin bhoird agus maidir le luach saothair na bPríomhoifigeach Feidhmiúcháin ar chomhlachtaí ainmnithe), féadfaidh sé dearcadh agus saineolas leathan a chur i bhfeidhm agus comhairle á soláthar aige i leith na Gníomhaireachta um Fhorbairt Talún, rud a chuireann ar chumas an Stáit dearcadh punainne a ghlacadh i leith na sócmhainní atá ar úinéireacht aige.