Foilsíonn an rialtas Plean Gníomhaíochta chun Córas Cánachais na hÉireann le haghaidh Úis a Athchóiriú
- Foilsithe: 27 Eanáir 2026
- An t-eolas is déanaí: 27 Eanáir 2026
Inniu (an 7 Deireadh Fómhair), d’fhoilsigh an rialtas Plean Gníomhaíochta chun córas cánachais na hÉireann le haghaidh úis a athchóiriú.
Tá an Plean Gníomhaíochta bunaithe ar na freagraí a fuarthas ar an gcomhairliúchán poiblí fairsing ar an déileáil cánach le hús in Éirinn, rud a foilsíodh i mí Mheán Fómhair 2024 agus inar tarraingíodh aird ar an ngá atá le hathchóiriú ó bhonn a dhéanamh ar an gcreat bunúsach le haghaidh cáin a ghearradh ar ús agus le haghaidh inasbhainteacht úis.
Leagtar amach sa Phlean Gníomhaíochta cur chuige céimnithe i leith athchóirithe a chur chun cinn ar shlí a soláthróidh córas simplithe lena dtacófar le hiomaíochas agus lena gcosnófar an bonn cánach. Foilseofar ráiteas aiseolais i mí na Samhna ina lorgófar freagraí ó gheallsealbhóirí ar thograí chun aghaidh a thabhairt ar na príomh-shaincheisteanna a sainaithníodh mar chuid den chomhairliúchán, d’fhonn aghaidh a thabhairt ar na saincheisteanna sin mar chuid de Bhille Airgeadais na bliana seo chugainn. Is i gcéimeanna ina dhiaidh sin a thabharfar aghaidh ar réimsí breise athchóirithe.
Dúirt Paschal Donohoe, an tAire Airgeadais:
“Tá sé ríthábhachtach go leanfaimis le dul sa tóir ar bhealaí nua chun a chinntiú go bhfuil ár gcód cánach iomaíoch, tarraingteach d’infheisteoirí agus ailínithe leis an dea-chleachtas idirnáisiúnta. Dá réir sin, tá áthas orm a fhógairt gur foilsíodh Plean Gníomhaíochta inniu chun córas cánachais na hÉireann le haghaidh úis a athchóiriú.
“Is é is aidhm don athchóiriú beartaithe ar chóras cánachais na hÉireann le haghaidh úis cabhrú le hiomaíochas a chosaint trí bhonn fónta cobhsaí a sholáthar le haghaidh infheistíocht intíre agus le haghaidh infheistíocht isteach in Éirinn araon. Toradh eile a bheidh air is ea simpliú riaracháin a sholáthar agus tuilleadh cinnteachta a thabhairt do ghnólachtaí Éireannacha, mar aon le leanúint lena chinntiú go bhfuil córas cánach corparáide na hÉireann le haghaidh úis cóir agus inbhuanaithe.”