“Tugann Money 20/20 ardán ríthábhachtach do chuideachtaí teicneolaíochta airgeadais Éireannacha a gcumas a thaispeáint, nascadh le geallsealbhóirí domhanda agus comhpháirtíochtaí breise a áirithiú. Is fíorshócmhainn don tír í earnáil teicneolaíochta airgeadais na hÉireann mar gheall ar an rath a bhain cuideachtaí amhail Fexco, Stripe agus TransferMate amach, i dteannta cuideachtaí eile atá ag fás ina ngníomhaithe idirnáisiúnta. Tá rún daingean ag an rialtas seo agus ag ár gcuid gníomhaireachtaí a chinntiú go leanfar leis an teicneolaíocht airgeadais a fhorbairt agus go leanfar le hinfheistiú a dhéanamh inti. Is í Fiontraíocht Éireann an tríú hinfheisteoir is gníomhaí sa teicneolaíocht airgeadais san Eoraip, agus níos mó ná €90 milliún infheistithe aici i mbreis agus 200 ceann de ghnólachtaí teicneolaíochta airgeadais agus de ghnólachtaí airgeadais a bunaíodh in Éirinn.

“Is mór an onóir dom ionadaíocht a dhéanamh do Rialtas na hÉireann ag Money20/20, áit a bhfeicfidh mé le mo shúile féin an rian a bhíonn á fhágáil ag ár gcuideachtaí ar an ardán idirnáisiúnta. Bainfidh mé leas as an deis seo freisin chun Éire a chur chun cinn mar rogha-cheann scríbe don nuálaíocht airgeadais. Is fórsa iomaíoch san Eoraip sinn mar gheall ar na scileanna atá againn agus ar an rochtain atá againn ar roinnt margaí éagsúla, agus coinneoidh mé an méid sin ar bun tríd an obair atá le teacht ar Éire d’Airgeadas, a bheidh ar an gcéad straitéis eile ón rialtas maidir le seirbhísí airgeadais idirnáisiúnta.”