Síneadh curtha ag an Aire le plean trádála scaireanna rathúil Bhanc na hÉireann
- Foilsithe: 5 Samhain 2021
- An t-eolas is déanaí: 12 Aibreán 2025
Mar thoradh ar a fhógra ar an 23 Meitheamh 2021, fógraíonn an tAire Airgeadais, Paschal Donohoe TD, inniu go bhfuil síneadh curtha le plean trádála scaireanna Bhanc na hÉireann. Is céim eile é seo chun beartas an Rialtais maidir leis na bainc a chur ar ais faoi úinéireacht phríobháideach a chur i gcrích.
Is ionann na fáltais a gineadh ón bplean trádála scaireanna ó seoladh é agus timpeall €249m. Tá beagnach €6.2bn d’airgead aisghafa ag an Rialtas anois óna infheistíocht €4.7bn i mBanc na hÉireann agus tacaíocht do Bhanc na hÉireann sa tréimhse 2009-2011.
Díoladh scaireanna tríd an bplean trádála scaireanna ar mheánphraghas €4.96 agus laghdaíodh scairsheilbh faoi threoir an Stáit sa bhanc ó 13.9% go 9.3%.
Bhí an plean trádála scaireanna le críochnú tráth nach déanaí ná an 7 Eanáir 2022. Ciallaíonn an síneadh a fógraíodh inniu go dtiocfaidh deireadh leis an bplean anois tráth nach déanaí ná an 20 Bealtaine 2022, mura gcuirfidh an tAire síneadh breise leis.
Agus síneadh an phlean trádála scaireanna á fhógairt, dúirt an tAire:
“Nuair a d’fhógair mé seoladh an phlean trádála scaireanna i mhí an Mheithimh, leag mé béim ar na buntáistí a bhaineann le hinfheistíocht an Stáit i mBanc na hÉireann a dhiúscairt de réir a chéile ag baint úsáid as an gcur chuige seo. Mar gheall ar an rath a bhí air go dtí seo, creidim go bhfuil sé ar mhaithe le leas an cháiníocóra an plean a leathnú ar feadh tréimhse eile”.
De réir thiomantas an Rialtais an luach is fearr a sholáthar don cháiníocóir, ní dhíolfar scaireanna faoi bhonnphraghas réamhchinntithe a choinneoidh an Roinn Airgeadais faoi athbhreithniú.
Leanfaidh Citigroup Global Capital Markets (“Citi”) de bheith ag gníomhú thar ceann an Aire chun an plean trádála scaireanna a chur i gcrích. Leanfaidh Citi ar aghaidh ag díriú ar 15%, ar a mhéad, den mhéid trádála iomlán comhiomlán ionchasach sa Chuideachta a dhíol thar thréimhse an phlean trádála scaireanna. Braithfidh líon na scaireanna a dhíoltar ar dhálaí an mhargaidh, i measc tosca eile.
Tá comhairle á cur ar an Roinn Airgeadais ag N.M. Rothschild & Sons Limited (“Rothschild &Co”) agus William Fry maidir leis an idirbheart seo.
CRÍOCH