“Mar a fógraíodh níos luaithe inniu, dhíol an Stát leas 2.06% in AIB ar phraghas €6.94 in aghaidh na scaire, rud a ghinfidh €305.3 milliún don Státchiste tráth an ghlanta. Fágfaidh sé sin go mbeidh thart ar €19.8 billiún san iomlán tugtha ar ais don Stát go dtí seo óna infheistíocht in AIB. Gach uair a chuir an Stát idirbheart luathaithe leabharbhunaithe i gcrích go rathúil, d’éirigh linn feabhsuithe incriminteacha a bhaint amach ar an bpraghas láithriúcháin agus an lascaine a chiorrú an tráth céanna. Glacadh go maith arís eile leis an idirbheart seo, agus éileamh suntasach ann ó líon mór infheisteoirí institiúideacha idirnáisiúnta ardchaighdeáin.

“Tá an t-idirbheart luathaithe leabharbhunaithe seo ár an seachtú diúscairt den sórt seo i leith AIB, agus laghdófar scairsheilbh ordaithe an Stáit sa bhanc go nialas dá bharr. Is garsprioc thábhachtach é seo maidir le déanamh de réir bheartas an rialtais i ndáil leis an earnáil baincéireachta a chur ar ais faoi úinéireacht phríobháideach.

“Nuair a d’fhógair mé seoladh an phlean trádála scaireanna i mí na Nollag 2021, dúirt mé gurb ionann baincéireacht agus gníomhaíocht a bhfuil riosca creidmheasa ag baint léi agus, dá bhrí sin, gur cheart don earnáil phríobháideach í a sholáthar. Dá réir sin, ba cheart cistí cáiníocóirí a úsáideadh chun bainc na hÉireann a tharrtháil a aisghabháil agus a úsáid chun críocha níos táirgiúla. Trí infheistíocht an Stáit in AIB a dhiúscairt de réir a chéile i margadh a bhíonn ag fás, d’éirigh linn an cuspóir sin a chomhlíonadh dár saoránaigh.

“Ar bhonn foriomlán, bunaithe ar phraghsanna reatha margaidh, déanfaidh an Stát brabús is fiú thart ar €0.6 billiún ar an infheistíocht €29.4 billiún a rinne sé in AIB, i mBanc na hÉireann agus in PTSB.

“Sealbhaíonn an Stát barántais in AIB freisin, a eisíodh tamaillín tar éis na tairisceana tosaigh don phobal a sheol an banc sa bhliain 2017. Tá oifigigh na Roinne Airgeadais ag déanamh breithniú ar roghanna ina leith sin, lena n-áirítear na barántais sin a dhíol ar ais le AIB.”