Tá an Tánaiste, an tAire Airgeadais, tar éis labhairt le Christine Lagarde, Uachtarán an Bhainc Ceannais Eorpaigh

Bhí glao teileafóin ag an Tánaiste Simon Harris, an tAire Airgeadais nuacheaptha, le Christine Lagarde, Uachtarán an Bhainc Ceannais Eorpaigh, aréir.

Rinne siad plé ar raon nithe éagsúla, lenar áiríodh boilsciú san Aontas Eorpach, an gá atá le dul i ngleic leis an dúshlán iomaíochais atá roimh an Eoraip, agus teacht ar chomhdhearcadh ar shaincheisteanna amhail earnáil baincéireachta na hEorpa a chomhtháthú agus margaí caipitil a dhoimhniú.

Rinne siad plé freisin ar thabhairt isteach an ‘Euro Dhigitigh’, rud atá ina ábhar do phróiseas reachtach an Aontais Eorpaigh faoi láthair.

Tráth níos luaithe, bhí an Tánaiste i dteagmháil le Rachel Reeves MP, Seansailéir an Státchiste.

Thréaslaigh sí leis an Tánaiste faoina cheapachán mar Aire Airgeadais, agus chomhaontaigh siad bualadh le chéile i bpearsa ar ball beag.

Bhuail Simon Harris le Seamus Coffey, cathaoirleach Chomhairle Chomhairleach Bhuiséadach na hÉireann, sa Roinn Airgeadais inniu freisin.

Dúirt sé ina dhiaidh sin go ndéanann an Chomhairle Chomhairleach Bhuiséadach rannchuidiú tábhachtach maidir le cur le cáilíocht na díospóireachta poiblí ar cháilíocht buiséid.

Agus aréir, chuir an Tánaiste tús le sraith glaonna teileafóin le hAirí Airgeadais eile de chuid an Aontais Eorpaigh. Labhair sé ar dtús le Kyriakos Pierrakakis, Aire Airgeadais na Gréige, atá le cuairt a thabhairt ar Bhaile Átha Cliath Luan na seachtaine seo chugainn.