Tionólann an Tánaiste Simon Harris, an tAire Airgeadais, cruinniú cuiditheach leis an Seansailéir Reeves

Bhí cruinniú croíúil cuiditheach ag an Tánaiste Simon Harris, an tAire Airgeadais, agus ag an Seansailéir Rachel Reeves i Londain inniu, áit ar athdhearbhaigh siad an dlúthchaidreamh buan atá ann idir an Ríocht Aontaithe agus Éire agus an tábhacht a bhaineann le comhar dearfach marthanach idir an dá thír.

Phléigh siad an t-ionchas buiséadach agus eacnamaíoch sa dá thír agus sa mhórthimpeallacht dhomhanda, lenar áiríodh na himpleachtaí eacnamaíocha a bhaineann leis an gcoinbhleacht leanúnach sa Mheánoirthear.

Thug siad faoi deara gur rannchuidigh an choinbhleacht reatha cheana féin le luaineacht i margaí domhanda fuinnimh agus leis an méadú ar bhrúnna boilscitheacha. D’athdhearbhaigh siad an tábhacht a bhaineann le hiarrachtaí taidhleoireachta maidir le teannas a laghdú agus maidir le maolú a dhéanamh ar na mórthionchair eacnamaíocha ar theaghlaigh agus ar ghnólachtaí.

Thug an Tánaiste agus an Seansailéir faoi deara an t-idirspleáchas eacnamaíoch domhain atá ann idir Éire, an Ríocht Aontaithe agus an tAontas Eorpach. Chomhaontaigh an bheirt airí go bhfuil sé mar thosaíocht chomhroinnte acu go fóill airgeadas poiblí inbhuanaithe a choinneáil ar bun agus, an tráth céanna, tacú le fás, le hinfheistíocht agus le hiomaíochas.

Phléigh siad deiseanna le haghaidh comhar níos doimhne i réimsí amhail trádáil, seirbhísí airgeadais, slándáil fuinnimh agus an t-aistriú glas.

D’athdhearbhaigh an Tánaiste agus an Seansailéir an tiomantas atá acu an caidreamh idir Éire agus an Ríocht Aontaithe a neartú, lena n-áirítear trí na hinstitiúidí de chuid na Breataine-na hÉireann a bunaíodh faoi Chomhaontú Aoine an Chéasta. Labhair siad faoin toradh rathúil a bhí ar an dara cruinniú mullaigh idir an Ríocht Aontaithe agus Éire a tionóladh i gCorcaigh an Aoine seo caite. D’fháiltigh siad roimh an móiminteam dearfach leantach atá ann i gcaidreamh déthaobhach.

Agus é ag féachaint chun cinn ar Uachtaránacht na hÉireann ar Chomhairle an Aontais Eorpaigh atá le teacht, thug an Tánaiste breac-chuntas ar thosaíochtaí na hÉireann, lena n-áirítear athléimneacht eacnamaíoch a neartú, iomaíochas na hEorpa a mhéadú, agus comhpháirtíochtaí idirnáisiúnta a dhoimhniú.

Chomhaontaigh an Seansailéir agus an Tánaiste coinneáil i ndlúth-theagmháil agus leanúint le hobair i gcomhar le chéile chun an chomhpháirtíocht eacnamaíoch idir Éire agus an Ríocht Aontaithe a neartú sna míonna atá le teacht.