“Táim ar bís an phrintíseacht nua Ghnó agus Oibríochtaí seo a sheoladh inniu. Léiríonn sé an cineál cur chuige nua-aimseartha, oscailte agus uaillmhianach atáimid ag iarraidh a ghlacadh i leith scileanna agus gairmeacha beatha in Éirinn

“Is minic a chuireann daoine cumasacha iad féin as an áireamh do dheiseanna toisc nach bhfeiceann siad conair a oibríonn dóibh. Athraíonn an phrintíseacht seo é sin. Osclaíonn sé fostaíocht do dhaoine ó chúlraí éagsúla chomh maith leo siúd atá ag céimeanna difriúla den saol nó le heispéiris éagsúla, agus tugann sé fuinneamh nua, smaointe nua agus peirspictíochtaí nua isteach in eagraíochtaí.

“I mBuiséad 2026, rinne mé buaic-infheistíocht de €79 milliún i maoiniú printíseachta, rud a thug an infheistíocht iomlán go dtí os cionn €410 milliún - dhá oiread leibhéil 2020. Tá an infheistíocht sin ag cur ar ár gcumas dul níos faide ná múnlaí printíseachta traidisiúnta agus bealaí nua, inchreidte a chruthú isteach i róil ghairmiúla agus ceannaireachta.

“Is í an phrintíseacht Ghnó agus Oibríochtaí ár n-81ú printíseacht náisiúnta agus is céim shuntasach í i dtreo printíseachtaí a chur i lár an aonaigh mar chonair iontaofa trínar féidir gairmeacha beatha fiúntacha a bhaint amach.”

“Is príomhaidhm de chuid mo Roinne é leathnú printíseachtaí ar fud na Státseirbhíse faoin Straitéis Chlaochlaithe 2030 Seirbhísí Poiblí Níos Fearr, áit a leagtar amach ár bhfís do lucht saothair oilte, spreagtha agus ionchuimsitheach don todhchaí, a mbeidh forbairt ghairme dhinimiciúil agus cultúir ionchuimsitheacha san ionad oibre mar thaca dóibh. Cuirim fáilte mhór roimh an bprintíseacht nua cheannródaíoch Ghnó & Oibríochtaí seo, a osclóidh an Státseirbhís do linn tallainne níos leithne agus níos uilechineálaí, ag cur bealach malartach ar fáil le teacht isteach i ngairm bheatha bhríomhar agus luachmhar. Cinnteoidh an phrintíseacht seo chomh maith gur léiriú í an Státseirbhís ar an tsochaí ar a bhfuil sí ag déanamh freastal agus go bhfuil na scileanna praiticiúla a theastaíonn uaithi chun dul i ngleic le dúshláin amach anseo ar fáil di.”

“Cuirim fáilte roimh sheoladh na Printíseachta Ghnó agus Oibríochtaí, a forbraíodh trí chomhoibriú idir chomhghleacaithe san earnáil phoiblí, fostóirí san earnáil phríobháideach agus comhpháirtithe oideachais Bord Oideachais agus Oiliúna Mhaigh Eo, Shligigh agus Liatroma. Tá clár nua-aimseartha, praiticiúil agus freagrach do riachtanais an ionaid oibre mar thoradh ar an tiomantas comhroinnte seo.

"Is suntasach an rud é freisin go mbeidh deis ag printísigh, a thagann ar shocrúchán chuig mo Roinnse Forbartha Tuaithe agus Pobail agus Gaeltachta, tuilleadh forbartha a dhéanamh ar a gcuid scileanna Gaeilge mar chuid den taithí ar an láthair a bhfaighidh siad, rud a chinntíonn tacaíocht láidir do sholáthar leanúnach seirbhísí i bpobail Ghaeltachta.

“Léiríonn an phrintíseacht seo fíorluach an chomhair tras-earnála agus ár n-uaillmhian chomhroinnte chun lucht saothair oilte a thógáil don todhchaí.”

“Is céim thábhachtach í seoladh na printíseachta Ghnó agus Oibríochtaí chun leathnú a dhéanamh ar a bhfuil le tairiscint ag printíseachtaí, ag oscailt doirse do róil nua agus féidearthachtaí nua. Léiríonn sé cur chuige nua-aimseartha, uaillmhianach i leith forbairt scileanna a ligeann do dhaoine pá a shaothrú fad agus atá siad ag foghlaim agus muinín acu go bhfuil gairmeacha bríomhara á bhforbairt acu. Ag an am céanna, cabhróidh sé le heagraíochtaí tallann a mhealladh, a chothú agus a fhorbairt trí chonair níos inrochtana.”

“Ba é Lidl ceann feadhna na printíseachta seo, tar éis dóibh dul i dteagmháil le BOOMESL ar dtús chun í a chruthú, agus a chinntiú go raibh sí ailínithe le riachtanais tionscail. Ag obair i ndlúthchomhar le geallsealbhóirí tábhachtacha ar fud na n-earnálacha poiblí agus príobháideacha araon, chruthaíomar clár atá praiticiúil agus bunaithe ar an gcaoi a n-oibríonn gnólachtaí ó lá go lá. Mar Chathaoirleach ar Ghrúpa Stiúrtha an Chuibhreannais, ba dheis uathúil é chun tacú le dearadh tionscnamh a oibríonn go forleathan i siopaí, i dtrádstórais agus in oifigí, agus a léiríonn an saol mar atá i ngnó oibríochtúil a ghluaiseann go tapa. Ag Lidl, táimid i gcónaí ag infheistiú inár ndaoine a fhorbairt, agus neartaíonn an clár seo an tiomantas sin trí dhíriú ar na cumais is tábhachtaí inár dtimpeallacht: ceannaireacht, réiteach fadhbanna agus barr feabhais oibríochtúil. Is sampla láidir é den bhealach ar féidir leis an gcomhoibriú fíordheiseanna gairme a chruthú chomh maith le forbairt a dhéanamh ar na scileanna atá de dhíth ar ghnólachtaí chun feidhmiú agus fás.”

“Is cloch mhíle mhór í an phrintíseacht Ghnó agus Oibríochtaí seo agus í ina chéad shampla de chomhpháirtíocht phoiblí agus phríobháideach ar a leithéid, rud a thugann saineolas tionscail agus ceannaireacht oideachais le chéile chun clár atá dírithe ar an todhchaí a sheachadadh. Ag obair leis an Státseirbhís agus an tseirbhís phoiblí araon chomh maith leis an earnáil phríobháideach, tá printíseacht deartha againn a chomhlíonann riachtanais ionad oibre an lae inniu go beacht.

“Forbraíonn sé scileanna bainistíochta gnó agus oibríochtúla a bhfuil éileamh orthu trí mheascán láidir de thaithí ar an láthair oibre agus foghlaim struchtúrtha, rud a imríonn tionchar láithreach ar an ionad oibre. Faigheann foghlaimeoirí scileanna inaistrithe i réiteach fadhbanna, feabhsú próisis, agus éifeachtúlacht eagraíochtúil, agus iad ag baint tairbhe as conairí soiléire chun dul chun cinn a dhéanamh. Sa deireadh thiar, cabhróidh an clár seo leis na ceannairí gnó a bheidh le teacht a mhúnlú.”

---

Notaí