Scéim an Liúntais Forlíontaigh Leasa (LFL)

Cuireann an scéim Liúntas Forlíontach Leasa líontán sábháilteachta ar fáil laistigh den chóras leasa shóisialaigh foriomlán trí chúnamh a sholáthar do dhaoine sa Stát nach bhfuil dóthain acmhainní acu chun freastal ar a riachtanais agus ar riachtanais a gcleithiúnaithe.

Is é príomhchuspóir na scéime cúnamh láithreach agus solúbtha a sholáthar dóibh siúd atá i ngátar.

Tá roinnt íocaíochtaí laistigh den scéim agus tá tuilleadh eolais ar fáil thíos.

Déanann Seirbhís Leasa Pobail na roinne an Liúntas Forlíontach Leasa a riaradh.

Is íocaíocht sheachtainiúil í an Liúntas Forlíontach Leasa Bunúsach a íoctar le daoine nach bhfuil dóthain acmhainní acu chun freastal ar a riachtanais féin ná ar riachtanais a d(h)uine fhásta cháilithe ná a leanaí cáilithe. Féadfar é a íoc le daoine atá ag fanacht le toradh éilimh nó achomhairc i leith príomhíocaíocht leasa shóisialaigh nó leo siúd nach bhfuil incháilithe le haghaidh íocaíochta faoi scéimeanna Stáit eile.

Is íocaíocht de réir tástála acmhainne í an Forlíonadh Cíosa do dhaoine áirithe atá ina gcónaí i gcóiríocht phríobháideach ar cíos nach féidir leo íoc as costas a gcóiríochta as a gcuid acmhainní féin.

Is íocaíocht aonuaire í Íocaíocht ar Riachtanas Breise atá ar fáil duit má tá costais agat nach féidir leat a íoc as d’ioncam seachtainiúil

Íoctar Forlíontaí Liúntais Fhorlíontaigh Leasa Shóisialaigh go seachtainiúil nó go míosúil chun cabhrú le costais riachtanacha leanúnacha a chomhlíonadh nach bhféadfaí a bheith ag súil go réasúnta go n-íocfadh duine as a n-ioncam seachtainiúil.

Bronntar na híocaíochtaí seo de réir rogha oifigeach na Seirbhíse Leasa Pobail tar éis breithniú a dhéanamh ar gach imthosca ábhartha den chás.

Seo a leanas samplaí d’íocaíochtaí a rinneadh faoin scéim seo:

• Féadfar forlíonadh téimh a íoc i gcás ina bhfuil costais téimh riachtanacha eisceachtúla ag duine mar gheall ar dhrochshláinte nó easláine.
• Féadfar forlíonadh taistil a íoc i gcás ina mbíonn costas taistil athfhillteach ann, mar shampla i gcás ina mbíonn costais taistil leanúnacha ag duine le haghaidh cuairteanna ospidéil.
• D’fhéadfaí forlíonadh aiste bia a íoc chun cabhrú le costas aiste bia speisialta atá forordaithe ag do dhochtúir nó ag comhairleoir ospidéil. (Tá sé sin dúnta anois roimh iarratasóirí nua.)

Faigh tuilleadh eolais faoi conas rochtain a fháil ar Leas Pobail agus iarratas a dhéanamh ar Liúntas Forlíontach Leasa lena n-áirítear Íocaíochtaí Riachtanas Breise.