Beartas fógraíochta na Roinne Coimirce Sóisialaí

Riarann an Roinn níos mó ná 100 scéim agus seirbhís ar leith, a théann i bhfeidhm ar shaol beagnach gach duine sa Stát. Táimid tiomanta go hiomlán dá chinntiú go bhfuil baill den phobal ar an eolas faoi na tacaíochtaí agus na seirbhísí leasa shóisialaigh atá ar fáil dóibh agus go gcuirtear ar an eolas iad faoi aon athruithe scéime a d’fhéadfadh difear a dhéanamh dóibh.

Is cuid thábhachtach dár gcuid oibre iad feachtais faisnéise poiblí agus fógraíochta. Táimid tiomanta dá chinntiú go bhfuil ár gcinntí ceannaigh fógraíochta bunaithe ar chritéir thrédhearcacha, oibiachtúla, chomhréireacha agus neamh-idirdhealaitheacha. Tá sé seo i gcomhréir lenár n-oibleagáidí faoi Airteagal 25 den Ghníomh Eorpach um Shaoirse na Meán (GESM). Is rialachán de chuid an AE é GESM a bhfuil sé mar aidhm aige saoirse agus iolrachas na meán a chosaint.

Seo a leanas na nósanna imeachta atá i bhfeidhm againn chun tacú le cinnteoireacht i ndáil le fógraíocht stáit:

• déantar ár bhfeachtais fógraíochta a phleanáil bunaithe ar achoimre straitéiseach. Sainaithnítear sa cháipéis seo na spriocanna cumarsáide don fheachtas agus an lucht féachana ar mian linn teacht orthu.
• forbraítear gach feachtas fógraíochta i gcomhar le gníomhaireacht speisialaithe. Ceapadh an ghníomhaireacht seo i ndiaidh phróiseas soláthair i dtaca le Straitéis agus Pleanáil na Meán agus Seirbhísí Ceannaigh, ag baint úsáid as creat lárnach arna bhunú ag an Oifig um Sholáthar Rialtais agus i gcomhréir le treoirlínte soláthair phoiblí agus treoirlínte soláthair an AE.
• oibrímid leis an ngníomhaireacht seo lena chinntiú go n-úsáideann an feachtas meascán oiriúnach de chainéil fógraíochta agus caiteachais chun a chinntiú go sroicheann teachtaireachtaí baill den phobal go héifeachtach, agus luach ar airgead á chinntiú ag an am céanna.
• socraítear príomhtháscairí feidhmíochta (PTFanna) do gach feachtas bunaithe ar sprioc agus ar chuspóirí an fheachtais. tuairiscímid i gcoinne na PTFanna seo agus úsáidimid léargais a fhaightear in anailís iar-fheachtais chun tacú le cinntí fógraíochta amach anseo.

Agus muid ag obair lenár ngníomhaireacht chun cinneadh a dhéanamh maidir le suíomh agus bronnadh fógraíochta stáit, cuirimid roinnt critéar san áireamh:

• Sonraí maidir le tomhaltas meán agus an cumas chun lucht féachana spriocdhírithe a bhaint amach
• Luach ar Airgead
• Scaipead geografach cuí
• Ceanglais reachtúla maidir le fógraí poiblí
• Ceanglais reachtúla maidir le fógraíocht i nGaeilge
• Infhaighteacht na meán, agus am tosaigh i dtaca le feachtas ar leith
• An buiséad foriomlán agus na hacmhainní foriomlána atá ar fáil

Déanaimid iarracht a chinntiú, nuair is féidir, go ndáiltear ár gcaiteachas foriomlán ar fhógraíocht ar réimse leathan meán, ag brath ar riachtanais shonracha gach feachtas. Beidh minicíocht agus fad na bhfeachtas éagsúil ó bhliain go bliain ag brath ar raon agus líon na dtionscnamh nua nó ar na teachtaireachtaí riachtanacha.