Seolann Comhpháirtíocht Trasteorann do Sheirbhísí Fostaíochta Feachtas chun Tacú le Cuardaitheoirí Poist i Réigiúin Teorann

• Feachtas nua cur chun cinn ar fud príomhshuíomhanna teorann chun feasacht a mhúscailt ar na tacaíochtaí agus na deiseanna atá ar fáil do chuardaitheoirí poist agus d’fhostóirí

Sheol an Roinn Coimirce Sóisialaí, i gcomhar leis an Roinn Pobail i dTuaisceart Éireann agus an Chomhpháirtíocht Trasteorann do Sheirbhísí Fostaíochta, feachtas cur chun cinn nua inniu ar fud réigiún na teorann chun feasacht a mhúscailt ar na tacaíochtaí agus na deiseanna atá ar fáil do chuardaitheoirí poist agus d’fhostóirí.

Tá sé mar aidhm ag an bhfeachtas aird a tharraingt ar na seirbhísí fostaíochta saor in aisce atá ar fáil tríd an gComhpháirtíocht Trasteorann, lena n-áirítear treoir do chuardaitheoirí poist, deiseanna oiliúna agus forbartha scileanna, agus tacaíocht d’fhostóirí atá ag iarraidh foireann a earcú agus a choinneáil.

Beidh fógraíocht le feiceáil i réimse suíomhanna, a áiritheoidh go sroichfidh an teachtaireacht pobail áitiúla ina gcónaíonn, ina dtaistealaíonn agus ina n-oibríonn daoine.

Trí na seirbhísí seo a chur chun cinn, tá sé mar aidhm ag an gcomhpháirtíocht ceangal a dhéanamh le daoine aonair a d’fhéadfadh leas a bhaint as tacaíocht bhreise fostaíochta agus naisc a neartú le gnólachtaí ar fud réigiún na teorann.

Dúirt urlabhraí thar ceann na Comhpháirtíochta Trasteorann do Sheirbhísí Fostaíochta:

“Tá an feachtas seo dírithe ar a chinntiú go bhfuil a fhios ag daoine ar fud ár bpobail teorann go bhfuil tacaíocht ar fáil. Cibé acu atá duine ag lorg oibre, ag smaoineamh ar oiliúint, nó fostóir ag lorg tallann nua, tá ár gcomhpháirtíocht anseo chun cabhrú leat.”

Reáchtálfar an feachtas cur chun cinn sna seachtainí amach romhainn, agus taispeánfar fógraíocht in áiteanna ard-infheictheachta ar fud réigiún na teorann.

Is comhoibriú idir an Roinn Coimirce Sóisialaí seo agus an Roinn Pobail i dTuaisceart Éireann í an Chomhpháirtíocht Trasteorann do Sheirbhísí Fostaíochta (CBPES).

Bunaíodh an CBPES chun an próiseas earcaíochta do chuardaitheoirí poist a éascú trí thacaíocht a thabhairt d’fhaisnéis agus seirbhísí earcaíochta a sholáthar.

Tá Coiste Stiúrtha i gceannas ar an CBPES, atá comhdhéanta d’ionadaithe óna chomhpháirtithe i.e., Seirbhísí Fostaíochta Poiblí (an Roinn Coimirce Sóisialaí agus an Roinn Pobail), Ceardchumainn, Comhlachtaí Fostóirí agus Seomraí Tráchtála. Tá foireann Chomhairleoirí Trasteorann oilte fostaithe chun tacú le hoibrithe teorann, le cuardaitheoirí poist agus le fostóirí i réigiún na teorann Thuaidh-Theas.

Má tá tuilleadh eolais uait, déan teagmháil le:

Barbara Gibson, Comhordaitheoir CBPES - barbara.gibson@communities-ni.gov.uk

Aine Bohan, Príomhoifigeach Cúnta, An Roinn Coimirce Sóisialaí – aine.bohan@welfare.ie