Fógraíonn an tAire Humphreys laghdú ar thairseach uaireanta an chloig don Scéim Fóirdheontais Pá d’Fhostaithe faoi Mhíchumas

• Íostairseach uaireanta seachtainiúla ar ar féidir le fostóirí leas a bhaint as an Scéim Fóirdheontas Pá laghdaithe ó 21 go 15 uair ón 1 Aibreán
• Maoiniú breise €3.7 milliún don Scéim Fóirdheontais Pá mar chuid de Bhuiséad 2024

D’fhógair an tAire Coimirce Sóisialaí, Heather Humphreys TD, laghdú inniu ar thairseach na n-uaireanta an chloig don Scéim Fóirdheontais Pá d’fhostaithe faoi mhíchumas.

Tá na huaireanta seachtainiúla ar ar féidir le fostóirí leas a bhaint as an Scéim Fóirdheontas Pá laghdaithe ó 21 go 15 uair ón 1 Aibreán.

Is tacaíocht fostaíochta í an Scéim Fóirdheontais Pá a bhfuil sé mar aidhm aici fostú daoine faoi mhíchumas a spreagadh sa mhargadh saothair oscailte.

Tugann an scéim dreasachtaí airgeadais d’fhostóirí ón earnáil phríobháideach chun daoine faoi mhíchumas a fhostú. Is é an bunráta fóirdheontais ná €6.30 in aghaidh na huaire, rud a fhágann gurb ionann fóirdheontas iomlán bliantúil agus €12,776 in aghaidh na bliana bunaithe ar sheachtain 39 uair an chloig.

Ón 1 Aibreán ní mór an obair a thairgtear a bheith ar feadh 15 uair an chloig ar a laghad in aghaidh na seachtaine (laghdaithe ó 21 uair an chloig mar thoradh ar an mbeart seo) agus tá an fóirdheontas ar fáil suas le 39 uair sa tseachtain.

Is féidir tuilleadh eolais faoin Scéim Fóirdheontais Pá a fháil ag Gov.ie Scéim Fóirdheontais Pá.

Agus an t-athrú a thiocfaidh i bhfeidhm an tseachtain seo chugainn á fhógairt aici, dúirt an tAire Coimirce Sóisialaí, Heather Humphreys TD:

Tá gealltanas i gClár an Rialtais scéimeanna fostaíochta spriocdhírithe a mhionchoigeartú agus a leathnú, amhail an Scéim Fóirdheontais Pá, chun cabhrú le níos mó daoine faoi mhíchumas fanacht san fhórsa saothair. Tá athbhreithniú á dhéanamh ag an Roinn Coimirce Sóisialaí ar an scéim faoi láthair agus táthar ag súil go mbeidh sí tugtha chun críche sna míonna amach romhainn.

Áiríodh san athbhreithniú comhairliúchán poiblí ceithre seachtaine anuraidh le daoine faoi mhíchumas, fostóirí agus an pobal i gcoitinne, rud a fuair os cionn 1,000 aighneacht.

Nótaí don Eagarthóir

Is scéim faoi stiúir éilimh í an Scéim Fóirdheontais Pá agus faoi láthair tá 1,512 fostóir san earnáil phríobháideach ag baint leas as an bhfóirdheontas i leith 2,441 fostaí rannpháirtí.

Tá na tacaíochtaí airgeadais d’fhostóirí struchtúrtha faoi thrí shnáithe ar leith agus d’fhéadfadh sé dul chun sochair do chuideachtaí a bheith faoi shnáithe amháin nó faoi dhá nó trí shnáithe ag an am céanna ag brath ar líon na ndaoine faoi mhíchumas atá fostaithe: -

• Is fóirdheontas ginearálta é Snáithe I d’aon easnamh táirgiúlachta a mheastar a bheith níos mó ná 20% le haghaidh duine faoi mhíchumas, i gcomparáid le comhghleacaí gan mhíchumas. Tá an fóirdheontas bunaithe ar líon na n-uaireanta a oibríodh.
• Tá fóirdheontas Shnáithe II iníoctha nuair a fhostaíonn fostóir triúr nó níos mó faoi mhíchumas a fhaigheann tacaíocht ó íocaíocht Shnáithe I den Scéim Fóirdheontais Pá. Tá sé i gceist go gcumhdóidh Snáithe II na costais bhreise mhaoirseachta, bhainistíochta agus costais obairbhunaithe eile a bhaineann leis na fostaithe sin. Is céatadán den fhóirdheontas Shnáithe I í an íocaíocht bhreisithe seo agus tá sí bunaithe ar líon foriomlán na bhfostaithe faoi mhíchumas atá fostaithe faoi Shnáithe I. Cuimsíonn sé 10% breise den fhóirdheontas i leith 3 go 6 fostaithe faoi mhíchumas go huasmhéid 50% den fhóirdheontas pá do 23+ fostaí faoi mhíchumas.
• Cuireann fóirdheontas Shnáithe III ar chumas fostóirí a fhostaíonn 25 oibrí nó níos mó faoi mhíchumas ar an Scéim Fóirdheontais Pá a bheith incháilithe le haghaidh deontas suas le €30,000 in aghaidh na bliana mar chúiteamh i leith an chostais a bhaineann le hOifigeach Cúnaimh Fostaíochta a fhostú chun tacú leis na fostaithe seo.