Fuair beagnach 60,000 duine ocht mbliana déag d'aois Sochar Linbh tar éis síneadh ama a fháil
- Foilsithe: 7 Lúnasa 2024
- An t-eolas is déanaí: 12 Aibreán 2025
- Ó mhí na Bealtaine 2024, leathnaítear Sochar Linbh chuig daoine atá ocht mbliana déag d'aois in oideachas lánaimseartha nó faoi mhíchumas tar éis athruithe a thug an tAire Humphreys isteach
D’fhógair an tAire Coimirce Sóisialaí, Heather Humphreys TD, inniu go bhfuil Sochar Linbh íoctha anois i leith beagnach 60,000 duine ocht mbliana déag d'aois den chéad uair riamh.
Fuair an tAire Humphreys faomhadh an Rialtais chun Sochar Linbh a shíneadh chuig daoine ocht mbliana déag d'aois ón 1 Bealtaine 2024.
Tá Sochar Linbh á íoc anois le haon duine atá 18 agus in oideachas lánaimseartha, nó atá faoi mhíchumas, suas go dtí a 19ú breithlá. Íoctar Sochar Linbh ag ráta €140 in aghaidh na míosa.
Go dtí seo, chuaigh an beart chun sochair do bhreis agus 58,000 duine óg atá in oideachas lánaimseartha nó atá faoi mhíchumas.
Ag labhairt inniu, dúirt an tAire Humphreys:
“Tá lúcháir orm an oiread sin daoine óga agus a dteaghlaigh a fheiceáil ag baint leasa as an síneadh seo ar shochar leanaí, tacaíocht ríthábhachtach do theaghlaigh atá ag obair go dian.
“Tá an beart seo a d’éirigh liom a thabhairt tríd an Rialtas le brath anois i dteaghlaigh áirithe ar fud na tíre.
“Tá leanaí ag tosú ar an mbunscoil beagán níos déanaí ag aois a 5 agus tá go leor acu ag déanamh na hidirbhliana mar chuid dá n-oideachas meánscoile. Is athrú fadtéarmach chun feabhais é síneadh an tSochair Linbh go dtí Daoine ocht mbliana déag d'aois in Oideachas Lánaimseartha nó faoi mhíchumas a thacóidh le gach teaghlach ar fud na hÉireann amach anseo.”
Notaí d'Eagarthóirí:
Tá miondealú contae tugtha thíos:
I gcás linbh a bhfuil ocht mbliana déag d'aois slánaithe aige/aici tar éis mhí na Bealtaine 2023 agus atá fós in oideachas lánaimseartha, beidh sé/sí incháilithe arís ó mhí na Bealtaine 2024 go dtí go bhfuil naoi mbliana déag d'aois slánaithe aige/aici.
Ní gá don tuismitheoir/caomhnóir athiarratas a dhéanamh má tá an leanbh in oideachas lánaimseartha agus má tá deimhniú oideachais reatha ag an Roinn. Déanfar an íocaíocht a chur i bhfeidhm arís ó mhí na Bhealtaine 2024 fad is atá an deimhniú bailí agus leanfar leis an íocaíocht go dtí go mbeidh deimhniú oideachais bailí i bhfeidhm nó go mbeidh naoi mbliana déag d'aois slánaithe ag an leanbh, cibé acu is túisce.
I gcásanna ina mbeidh an deimhniú oideachais as feidhm roimh an 19ú breithlá, eiseofar deimhniú oideachais nua don tuismitheoir/don chaomhnóir sula rachaidh sé as feidhm. Ní mór é seo a chomhlánú agus a sheoladh ar ais ionas gur féidir íocaíocht an tSochair Linbh a atosú.
Má bhí an leanbh ocht mbliana déag d'aois tar éis Bealtaine 2024, déanfar an Sochar Linbh a shíneadh go huathoibríoch go dtí an 19ú breithlá nó dáta éaga an deimhnithe reatha.
Beidh an Roinn i dteagmháil dhíreach le tuismitheoir/caomhnóir más gá di deimhniú oideachais nuashonraithe a chur ar fáil.
I gcás na ndaoine sin ar gá dóibh a gcuid sonraí íocaíochta a nuashonrú, is é an bealach is tapúla agus is éasca chun sonraí íocaíochta a athrú ná ar líne ag MyWelfare.ie.