Fógraíonn an tAire Calleary sraith Imeachtaí Oibre agus Scileanna Intreo a bheidh ar siúl i mí an Mhárta

• Imeachtaí Oibre agus Scileanna ar siúl ó 2 go 13 Márta
• Breis agus 40 imeacht ar fud na tíre ina ndíríear ar ghairmeacha beatha agus ar oiliúint
• Na céadta post ar fáil agus an deis casadh go díreach le fostóirí atá ag earcú

D’fhógair an tAire Coimirce Sóisialaí, Dara Calleary TD, inniu go mbeidh sraith imeachtaí Oibre agus Scileanna ar siúl i mbailte agus i gcathracha ar fud na hÉireann ó amárach ar aghaidh.

Beidh breis is 40 imeacht ar siúl ar fud na tíre ón 2 go dtí an 13 Márta, le réimse ollmhór deiseanna i réimse earnálacha, Cúram Sláinte, Iompar & Loighistic, Seirbhís Phoiblí, Miondíol, Fáilteachas, Cúram Leanaí, Agraibhia, Eitlíocht agus Oideachas san áireamh.

Tugann imeachtaí na hOibre agus na Scileanna deis do lucht cuardaigh poist nascadh le fostóirí atá ag earcú go gníomhach chun deiseanna fostaíochta lán‑aimseartha, páirt‑aimseartha agus solúbtha ina gceantar áitiúil a iniúchadh.

Is féidir le cuardaitheoirí poist foghlaim freisin faoi na roghanna oiliúna atá ar fáil, agus leas a bhaint as comhairle maidir le cuardach poist chun cabhrú leo an chéad chéim eile a ghlacadh ina ngairm bheatha.

Agus é ag trácht ar na himeachtaí, dúirt an tAire Calleary:

“Tá áthas orm sraith eile dár n-imeachtaí Oibre agus Scileanna a fhógairt. Tugann na himeachtaí seo deis ríthábhachtach do chuardaitheoirí poist bualadh go díreach le fostóirí agus foghlaim faoi phoist atá ar fáil chomh maith le fáil amach faoi na roghanna oiliúna atá ar fáil.

“Tugann siad deis iontach freisin do dhaoine tuilleadh eolais a fháil faoi na tacaíochtaí agus na seirbhísí atá ar fáil ón Roinn d’fhostóirí agus do chuardaitheoirí poist araon.

“Beidh fostóirí ó réimse earnálacha ag earcú go gníomhach ag na himeachtaí seo, agus is féidir iarratas a dhéanamh ar roinnt folúntas ar an lá féin fiú.”

“Tá breis is 40 imeacht ar siúl ar fud na tíre agus molaim do dhaoine cuairt a thabhairt gov.ie/workandskills orthu chun a fheiceáil cad atá ag tarlú ina gceantar.”

Príomhimeachtaí:

Aonach Earcaíochta & Oiliúna Il-Earnála Liffey Valley:

Beidh Aonach Earcaíochta & Oiliúna Il-Earnála ar siúl Dé Máirt, an, 3 Márta ó 10am – 1pm ag Ionad Siopadóireachta Liffey Valley.

Beidh réimse leathan fostóirí agus soláthraithe oiliúna i láthair ó earnálacha, miondíol, fáilteachas, cúram sláinte, tógáil, lóistíocht, riarachán agus seirbhís do chustaiméirí san áireamh.

Aonach Earcaíochta Cheatharlach:

Dé Céadaoin an 4 Márta, ó 10am go 1pm, beidh Aonach Earcaíochta Cheatharlach ar siúl in Ionad Siopadóireachta Faiche an Aonaigh, Ceatharlach.

Is é aidhm an imeachta seo tacú le cuardaitheoirí poist, le hathraitheoirí poist agus leo siúd atá ag filleadh ar an obair, agus deis a thabhairt dóibh bualadh le fostóirí duine le duine chun na folúntais atá ar fáil faoi láthair a phlé agus chun faisnéis a sholáthar faoi oiliúint agus uas-sciliú.

I measc na bhfostóirí a bheidh i láthair ag an ócáid seo tá Dovida Ireland, Bluebird Care, Mount Wolseley Hotel Spa & Golf Resort, Delta Centre CLG, Integrated Communications Ltd, McDonalds agus go leor eile.

Imeacht Earcaíochta na Gaillimhe:

Déardaoin, an, 5th Márta ó 10am go 1pm, beidh Aonach Earcaíochta ar siúl in Ionad Siopadóireachta na Gaillimhe.

Tá Pennys agus Bluebird Homecare i measc na bhfostóirí a bheidh i láthair ag an ócáid seo, agus beidh soláthraithe oiliúna ar nós an Líonra Foghlama Náisiúnta, Employability, EURES agus an BOO i láthair chomh maith.

Imeacht Earcaíochta Il-earnála Lú:

Chomh maith leis sin, ar an Déardaoin, 5 Márta, beidh imeacht Earcaíochta Il-earnála ar siúl in Ionad Siopadóireachta Marshes ó 11am go 1pm.

Beidh fostóirí ar nós Suretank, Ohk energy, Prometric, Óglaigh na hÉireann, HHCI Healthcare, National Tile, Early Day Foods agus Staffline Recruitment i láthair.

Aonach Earcaíochta na hUaimhe:

Dé hAoine, an 6 Márta, ó 11am go 1pm, beidh aonach earcaíochta ar siúl in Ionad Siopadóireachta na hUaimhe.

I measc na bhfostóirí atá ag earcú ar an lá tá Feirm Prátaí Meade, Ohk energy, MyHomeCare, agus Park Rí.

Imeacht Earcaíochta Bhaile Bhlainséir:

Dé hAoine, an 13 Márta ó 10am go 12:30pm, beidh Aonach Earcaíochta agus Oiliúna Il-Earnála ar siúl in Ionad Siopadóireachta Bhaile Bhlainséir i mBaile Átha Cliath.

I measc na bhfostóirí a bheidh ag earcú ar an lá tá Bidvest Noonan, BMC Manufacturing, Bus Éireann, Comfort Keepers, CPM Ireland, Dovida, Excel Aviation, Musgraves, Nua Healthcare agus Publicjobs.

Beidh Ceardlann CV ar fáil dóibh siúd a bheidh i láthair mar chuid den ócáid freisin.

Imeacht Rannpháirtíochta Míchumais agus Cúramóirí Bhéal an Átha:

Dé Luain, an, 2 Márta, beidh ócáid Rannpháirtíochta do Dhaoine faoi Mhíchumas agus do Chúramóirí ar siúl in Óstán Mór Náisiúnta, Béal an Átha ó 10am go 1pm.

Tá sé mar aidhm ag an ócáid seo bealaí praiticiúla isteach san fhostaíocht a thaispeáint do dhaoine faoi mhíchumas agus dóibh siúd a bhfuil freagrachtaí cúraim orthu, agus faisnéis á cur ar fáil faoi na tacaíochtaí atá ar fáil, faoi dheiseanna oiliúna agus faoi roghanna fostaíochta cuimsitheacha.

Beidh thart ar 40 eagraíocht i láthair ar an lá, ina measc AsIAm, Down Syndrome Mayo, JAM Card, SICAP agus Employability. Beidh dhá chuideachta nuálacha atá lonnaithe i Maigh Eo a tháirgeann táirgí tacaíochta do dhaoine faoi mhíchumas i láthair ag an ócáid chomh maith.

Tabharfaidh an ócáid deis do lucht freastail líonrú a dhéanamh, deiseanna a iniúchadh, nascadh le seirbhísí tacaíochta, agus nascadh le heagraíochtaí atá tiomanta do chabhrú leo dul chun cinn.

Imeacht ‘Neartaigh do Ghnó’ i gCorcaigh - Déan Streachailt ar son na Cuimsithe:

Dé hAoine, an 6th Márta, beidh Ócáid Eolais maidir le Comhionannas, Éagsúlacht agus Cuimsiú (EDI) d’Fhostóirí ar siúl in Óstán Kingsley i gCorcaigh ó 12.30pm go 2pm.

Tá an ócáid seo á reáchtáil i gcomhar le Turas Nua agus is fóram iontach é d’fhostóirí chun eolas a fháil faoin raon deontas agus tacaíochtaí atá ar fáil dóibh.

Tá eolas faoin raon iomlán imeachtaí atá oscailte don phobal agus conas clárú le freastal orthu ar fáil ag www.Gov.ie/WorkandSkills.

Tá na himeachtaí uile curtha in oiriúint do dhaoine atá ag lorg fostaíochta agus do chuardaitheoirí poist agus níl siad do dhaoine atá ag fáil íocaíocht cuardaitheora poist amháin.

Is é Intreo seirbhís fostaíochta phoiblí Rialtas na hÉireann, a sholáthraíonn an Roinn Coimirce Sóisialaí mar phointe teagmhála aonair do gach tacaíocht fostaíochta agus ioncaim. Soláthraíonn sé seirbhísí agus tacaí fostaíochta praiticiúla, saincheaptha do chuardaitheoirí poist agus d’fhostóirí araon.

Réigiún an Oirthir