Seolann an tAire Calleary mórfheachtas náisiúnta chun feasacht a ardú ar ‘Mo Chiste don Todhchaí’ - an Córas Uathrollaithe Coigiltis Scoir nua

• Feachtas feasachta chun aird a tharraingt ar chóras nua coigiltis scoir, ar a dtabharfar ‘Mo Chiste don Thodhchaí’
• Cabhróidh Mo Chiste don Thodhchaí leis na céadta míle oibrí chun airgead a shábháil dá dtodhchaí le tacaíocht a bhfostóirí agus an Stáit
• Tá bailiúchán ranníocaíochtaí do Mo Chiste don Todhchaí le tosú ar an 1 Eanáir 2026
• ‘Íocann tú isteach, íocann d’fhostóir isteach, agus cuireann an Stát leis’

Sheol an tAire Coimirce Sóisialaí, Dara Calleary TD, mórfheachtas feasachta náisiúnta inniu don Chóras Uathrollaithe Coigiltis Scoir, nua, ar a dtugtar ‘Mo Chiste don Todhchaí’ anois.

Tá feidhmiú céimneach Mo Chiste don Thodhchaí in Éirinn tosaithe, agus tá cumarsáid spriocdhírithe agus rannpháirtíocht dhian le príomhpháirtithe leasmhara, amhail fostóirí, i gceist leis an ullmhúchán roimh sheoladh mhí Eanáir 2026.

Cuirfidh an feachtas fógraíochta ilmheán daoine ar an eolas tuilleadh faoin gcaoi a n‑oibreoidh an córas nua, cé atá in ann páirt a ghlacadh ann, agus cad a chiallóidh sé dóibh.

Ag fógairt seoladh an fheachtais feasachta, dúirt an tAire Calleary:

“Creidim go n-athróidh Mo Chiste don Todhchaí an chaoi a sábhálfaidh daoine airgead dá scor. Cabhróidh an polasaí suntasach seo leis na céadta míle oibrithe díograiseacha in Éirinn airgead a chur i leataobh dá saol tar éis na hoibre.

“Táthar ag caint faoi Chlárú Uathrollaithe le blianta fada. Tá lúcháir orm go bhfuil sé seo ag tarlú faoi dheireadh. Ciallóidh mo Chiste don Todhchaí go bhfaighidh beirt as gach triúr fostaithe san earnáil phríobháideach nach bhfuil aon phinsean forlíontach acu faoi láthair tuiscint níos fearr ar fholláine agus ar shaoirse airgeadais amach anseo.

Is athchóiriú suntasach é Mo Chiste don Thodhchaí a fhágfaidh go mbeidh an méid a chuireann fostóirí ar fáil ag teacht leis na méideanna a shábhálann a bhfostaithe. Ansin, cuirfidh an Stát €1 le pota coigiltis gach rannpháirtí in aghaidh gach €3 a chuireann siad leis. Is dócha go dtiocfaidh méadú breise ar chistí na rannpháirtithe trí infheistíocht a dhéanamh ar an gcoigilteas sin.

Chun cabhrú le haon cheisteanna a d’fhéadfadh a bheith ag fostaithe, fostóirí nó páirtithe leasmhara eile a fhreagairt, tá réimse acmhainní faisnéise ar fáil chun tacaíocht a thabhairt ar mhol tiomnaithe ar líne (www.gov.ie/autoenrolment) in éineacht le físeáin eolais ar Youtube (Auto-enrolment explained - YouTube). Tá seimineáir ghréasáin á reáchtáil ag oifigigh na roinne ar bhonn leanúnach agus d’fhreastail os cionn 10,000 fostóir, gairmí AD, comhairleoirí airgeadais agus soláthraithe párolla orthu cheana féin.

Mar fhocal scoir dúirt an tAire Calleary:

“Teachtaireacht thábhachtach is mian linn a chur in iúl d’fhostóirí ná go bhfuil Mo Chiste don Thodhchaí deartha go sonrach chun riarachán fostóra a choinneáil chomh híseal agus is féidir. Déanfaidh comhlacht nua, an tÚdarás Náisiúnta Coigiltis Scoir um Uathchlárú (NAERSA) formhór na hoibre seo a láimhseáil. Áirítear leis sin, fostaithe incháilithe a shainaithint agus a chlárú, liostaí a bheith páirteach, liostaí diúltaithe a bheith páirteach agus fionraíochta a bhainistiú, ranníocaíochtaí a ríomh agus fógra a thabhairt d’fhostóirí faoi mhéideanna atá dlite tríd an bpárolla. Ní bheidh le déanamh ag fostóirí ach dul i dteagmháil le NAERSA nuair a bheidh sé ar bun agus ag feidhmiú, agus na ranníocaíochtaí atá dlite thar ceann a bhfostaithe a aistriú trína soláthraí párolla. Déanfaidh NAERSA an chuid eile.”

Áirítear ar phríomhghnéithe scéim Mo Chiste don Todhchaí:

1) Feidhmiú de Réir a Chéile

• Déanfar gach fostaí nach bhfuil i scéim pinsin ceirde nó i socrú pinsin fhorlíontach dá samhail cheana féin, atá idir 23 agus 60 bliain d’aois, agus a thuilleann os cionn €20,000 ar fud a gcuid fostaíochta go léir, a chlárú go huathoibríoch.
• Agus na chéad chlárúcháin le tarlú ag tús na bliana seo chugainn, déanfar Mo Chiste don Todhchaí a thabhairt isteach de réir a chéile thar thréimhse deich mbliana, agus ranníocaíochtaí fostóra agus fostaithe ag tosú ag 1.5%, agus ag méadú gach trí bliana faoi 1.5% go dtí go sroichfidh siad 6% faoi dheireadh faoi Bhliain 10 (2035). Leis an gcéimniú seasta sin, tabharfar am d’fhostóirí agus d’fhostaithe araon dul i dtaithí ar an gcóras nua.

2) Tacaíochtaí Coigiltis

• Déanfaidh fostóirí ranníocaíochtaí a mheaitseáil leis na ranníocaíochtaí sin a bheidh déanta ag fostaithe.
• Leis sin, cuirfidh an Stát €1 leis na ranníocaíochtaí as gach €3 a bheidh sábháilte ag an bhfostaí.
• Ciallaíonn sé seo, in aghaidh gach €3 a shábhálann fostaí, go gcuirfear €7 san iomlán lena bpota pinsin sula n-infheisteofar é.
• Spreagfaidh na ranníocaíochtaí fostóra agus Stáit sin daoine chun fanacht i Mo Chiste don Todhchaí agus laghdófar an costas a bhaineann le coigilteas le haghaidh scoir do dhaoine aonair.
• Cuirfear deireadh le ranníocaíochtaí ón gcéad phárolla eile tar éis do thuilleamh comhlán iomlán an fhostaí dul thar €80,000 agus in aon bhliain ar leith agus cuirfear tús leo arís an bhliain dár gcionn.

3) Rogha

• Beidh an córas deonach ach oibreoidh sé ar bhonn ‘rogha gan a bheith páirteach’ seachas ‘rogha a bheith páirteach’.
• Déanfar fostaithe incháilithe a rollú go huathoibríoch/‘a roghnú a bheith páirteach’, ach, tar éis rannpháirtíochta ar feadh sé mhí, beidh an rogha acu gan a bheith páirteach a thuilleadh nó a rannpháirtíocht a chur ar fionraí ar feadh dhá bhliain ar a mhéad sula ndéanfar iad a athchlárú.
• Beidh rogha de thrí straitéis coigiltis scoir ag fostaithe, agus próifílí éagsúla riosca/toraidh ina measc sin.
• I gcás nach ndéanann an fostaí rogha ar leith, cuirfear straitéis réamhshocraithe ar fáil de réir próifíl infheistíochta ‘stíle maireachtála’/‘saolré’, ina laghdaítear an riosca de réir a chéile de réir mar a bhíonn an rannpháirtí níos gaire don scoir.

4) Simplíocht

• Tá costais agus ualaí riaracháin le coinneáil chomh híseal agus is féidir d’fhostóirí agus d’fhostaithe araon trí bhunú NAERSA chun an córas a riar.
• Ní bheidh ar fhostóirí infheistíocht a dhéanamh i mbunú ná soláthar scéime ceirde le haghaidh a ngnólachta féin. Ní bheidh orthu ach asbhaintí párolla a éascú agus an méid ranníocaíochta is infheidhme a aistriú.
• Rud atá tábhachtach, ní bheidh ar dhaoine a bhogann ó phost amháin go post eile scéim pinsin a athrú nó dul isteach i scéim nua. Fanfaidh siad ina mbaill de Mo Chiste don Todhchaí ar bhonn ‘leanann an ciste an duine’. Ina theannta sin, daoine a bhfuil níos mó na post amháin acu, déanfar a gcoigilteas pinsin a chomhdhlúthú i gcuntas amháin.
• Soláthrófar seirbhísí agus tacófar leo trí chainéal ar líne atá éasca le húsáid ina bhfeicfidh na rannpháirtithe a gcuid cistí coigiltis ag fás go tapa agus go substaintiúil.