Iarratais oscailte ag an Aire Calleary don Liúntas Éadaí agus Coisbhirt um Fhilleadh ar Scoil 2025

• Gheobhaidh níos mó ná 114,000 teaghlach an liúntas go huathoibríoch i mí Iúil
• Thart ar €54 milliún ar fáil don scéim i mbliana

D’fhógair an tAire Coimirce Sóisialaí, Dara Calleary TD, inniu go bhfuil na hiarratais don Liúntas Éadaí agus Coisbhirt um Fhilleadh ar Scoil 2025 oscailte.

Soláthraíonn an Liúntas Éadaí agus Coisbhirt don Scoilbhliain nua íocaíocht aonuaire do theaghlaigh incháilithe chun cabhrú leo íoc as éadaí agus coisbheart scoile.

Tá an ráta íocaíochta don bhliain 2025 cothrom le €160 le haghaidh leanaí atá idir 4 - 11 bliain d’aois agus cothrom le €285 le haghaidh leanaí atá dhá bhliain déag d’aois agus níos sine agus atá ag freastal ar oideachas dara leibhéal.

Agus é ag trácht ar an scéim, dúirt an tAire Calleary:

“Tá an-áthas orm a fhógairt go bhfuil an Liúntas Éadaí agus Coisbhirt um Fhilleadh ar Scoil do 2025 oscailte d’iarratais inniu.

“Tugaim an brú a bhíonn ar thuismitheoirí maidir le costais a bhaineann le filleadh ar an scoil agus tá €54.4 milliún faighte agam le haghaidh na scéime an bhliain seo.”

Íocfar formhór na n-íocaíochtaí go huathoibríoch agus ní bheidh aon ghá le hiarratas a dhéanamh. Íocfar Liúntas Éadaí agus Coisbhirt um Fhilleadh ar Scoil go huathoibríoch le níos mó ná 114,000 teaghlach i leith tuairim is 197,000 leanbh le linn na seachtaine dar tús an 14 Iúil 2025.

I láthair na huaire, tá an Roinn Coimirce Sóisialaí ag próiseáil na n-íocaíochtaí seo agus gheobhaidh faighteoirí dearbhú ina gcuirfear in iúl dóibh go bhfuil siad i dteideal an liúntais go huathoibríoch, ar a gcuntas MyWelfare nó tríd an bpost. Íocfar thart ar €42 milliún leis na teaghlaigh seo le linn na seachtaine dar tús an 14 Iúil.

Ba chóir d’aon teaghlach nach bhfaigheann fógra ón Roinn go bhfuil íocaíocht uathoibríoch á déanamh, iarratas a dhéanamh ar líne ar www.MyWelfare.ie, fiú má rinneadh íocaíocht leo an bhliain seo caite. Is féidir iarratais ar líne a dhéanamh ón Luan, an 9 Meitheamh.

Dúirt an tAire Calleary freisin:

“Íocfar níos mó ná 75% d’íocaíochtaí faoin scéim seo gan gá le hiarratas a dhéanamh. Eiseoidh mo Roinn íocaíochtaí uathoibríocha do níos mó ná 114,000 teaghlach i mí Iúil, agus mholfainn do gach teaghlach a n-incháilitheacht don scéim thábhachtach seo a sheiceáil.”

Nótaí

Soláthraíonn an Liúntas Éadaí agus Coisbhirt don Scoilbhliain nua íocaíocht aonuaire do theaghlaigh incháilithe chun cabhrú leo íoc as éadaí agus coisbheart scoile.

Is iad na rátaí íocaíochta don scéim Liúntais Éadaí agus Coisbhirt um Fhilleadh ar Scoil 2025 ná €160 le haghaidh leanaí atá idir 4-11 bliain d’aois ar nó roimh 30 Meán Fómhair 2025 agus €285 le haghaidh leanaí atá 12-22 bhliain d’aois ar nó roimh 30 Meán Fómhair 2025. Ní mór do mhic léinn atá idir 18 - 22 bhliain d’aois a bheith ag filleadh ar oideachas lánaimseartha dara leibhéal i scoil aitheanta nó i gcoláiste aitheanta i bhfómhar na bliana 2025 chun teidlíocht ar íocaíocht a choinneáil.

Tá línte teileafóin tiomnaithe á gcur ar fáil ag an Roinn ag 071-9193318 agus
0818-11-11-13 chun ceisteanna a bhaineann leis an Liúntas Éadaí agus Coisbhirt don Scoilbhliain Nua a fhreagairt le linn gnáthuaireanta oibre ó Luan go hAoine ó 9.00am go 5.00pm. Chomh maith leis sin, tá an rogha ag daoine ríomhphost a sheoladh chuig an Roinn ag bscfa@welfare.ie má tá aon cheist acu maidir lena n-iarratas nó lena dteidlíocht.

Is é an 30 Meán Fómhair 2025 an dáta deiridh chun iarratas a dhéanamh ar Liúntas Éadaí agus Coisbhirt um Fhilleadh ar Scoil na bliana seo.

Tá tuilleadh eolais maidir leis na critéir cháilitheachta le haghaidh an Liúntais Éadaí agus Coisbhirt don Scoilbhliain Nua le fáil ag www.gov.ie/bscfa.

Briseadh Síos de réir Contae ar fhaighteoirí le fáil thíos

Baile Átha Cliath 30,454

Ceatharlach 1,906

An Cabhán 1,906

An Clár 2,572

Corcaigh 10,733

Dún na nGall 5,064

Gaillimh 5,068

Ciarraí 3,688

Cill Dara 4,676

Cill Chainnigh 1,720

Laois 2,131

Liatroim 970

Luimneach 5,067

An Longfort 1,545

Lú 4,695

Maigh Eo 3,262

An Mhí 4,020

Muineachán 1,551

Uíbh Fhailí 2,130

Ros Comáin 1,504

Sligeach 1,634

Tiobraid Árann 4,192

Port Láirge 3,601

An Iarmhí 2,446

Loch Garman 4,628

Cill Mhantáin 3,248

Iomlán 114,411