SEOLANN AN TAIRE O’BRIEN COMHAIRLIÚCHÁN POIBLÍ D’ATHBHREITHNIÚ MEÁNTÉARMA AR AN TREOCHLÁR UM AN IONCHÚIMSIÚ SÓISIALTA
- Foilsithe: 6 Meán Fómhair 2022
- An t-eolas is déanaí: 12 Aibreán 2025
Sheol an tAire Stáit ar a bhfuil freagracht as ionchuimsiú sóisialta sa Roinn Coimirce Sóisialaí, Joe O’Brien, T.D., comhairliúchán poiblí inniu (Dé Máirt, an 6 Meán Fómhair 2022) don Athbhreithniú Meántéarma ar an Treochlár um an Ionchuimsiú Sóisialta.
Tá an comhairliúchán mar chuid den ghealltanas sa Treochlár um an Ionchuimsiú Sóisialta 2020-2025 (ar fáil thíos), a foilsíodh in Eanáir 2020, chun tabhairt faoi “athbhreithniú neamhspleách meántéarma ar an treochlár in 2022.”
Straitéis uile-rialtais atá sa Treochlár um an Ionchuimsiú Sóisialta chun dul i ngleic le bochtaineacht agus eisiamh sóisialta. Tá spriocanna uaillmhianacha sa Treochlár leis an líon daoine a laghdú atá faoi bhochtaineacht chomhsheasmhach anuas go dtí 2 faoin gcéad nó níos lú faoin mbliain 2025 agus Éire a shuíomh laistigh de na cúig thír is fearr san AE faoi roinnt de na bearta ionchuimsithe sóisialta is fearr.
Is í aidhm an chomhairliúcháin phoiblí na rudaí a n-éiríonn go maith leo a shainaithint chun spriocanna an Treochláir a bhaint amach, cén limistéir sholáthair a d’fhéadfaí a fheabhsú agus na rudaí ba cheart tús áite a thabhairt dóibh don chuid eile den straitéis. Tugtar cuireadh freisin d’fhreagróirí aon aiseolas eile ábhartha a sholáthar.
Dúirt an tAire O’Brien an méid seo a leanas agus an comhairliúchán poiblí á sheoladh aige:
“De réir mar a dhéanaimid iarracht na gealltanais a shásamh a dtugtar cuntas orthu sa Treochlár um an Ionchuimsiú Sóisialta, lorgaímid aiseolas ag a lárphointe ar a éifeachtacht orthu siúd is mó atá thíos le bochtaineacht agus eisiamh sóisialta.
”Mar Chathaoirleach Ghrúpa Stiúrtha an Treochláir um an Ionchuimsiú Sóisialta, ba mhaith liom dearcthaí an phobail a chloisteáil, grúpa stiúrtha daoine atá thíos leis an mbochtaineacht agus eisiamh sóisialta, agus na grúpaí a dhéanann ionadaíocht dóibh.
”Seo an dara céim den phróiseas comhairliúcháin, ar cuireadh tús leis ag an bhFóram um an Ionchuimsiú Sóisialta i Meitheamh 2022. Spreagfainn daoine an t-am a ghlacadh chun freagra a thabhairt. Cuirfidh na torthaí ón gcomhairliúchán poiblí seo treoir ar fáil ar conas is fearr ár n-obair a dhíriú i dtreo an bhochtaineacht agus an t-eisiamh sóisialta a laghdú d’fhad an Treochláir atá fanta – chun gur féidir leis na comhaltaí is leochailí dár sochaí na tairbhí a bhaint.”
Nótaí
Is é an Treochlár um an Ionchuimsiú Sóisialta 2020-2025: Uaillmhian, Spriocanna, Gealltanais an straitéis náisiúnta um laghdú bochtaineachta agus ionchuimsiú sóisialta feabhsaithe.
Tá mar chuspóir aige bochtaineacht chomhsheasmhach a laghdú go 2% nó níos lú agus Éire a bheith i measc ceann de na tíortha is ionchuimsithí go sóisialta san AE. Déantar seacht sprioc sa Treochlár den uaillmhian seo lena mbuntacaíonn 66 gealltanas uathúil a bhfuiltear le tabhairt fúthu chun cabhrú leis na spriocanna seo a sholáthar. Déantar tomhas i dTuarascáil Bhliantúil ar Dhul chun Cinn i dtreo spriocanna an Treochláir agus gabhann cárta tuairisce an Treochláir leis ina sonraítear dul chun cinn ar gach ceann de ghealltanais an Treochláir, agus tá na leaganacha is déanaí den Tuarascáil ar dhul chun cinn agus den Chárta Tuairisce ar fáil anseo.
Gealltar sa Treochlár go “tabharfar faoi athbhreithniú meántéarma neamhspleách ar an Treochlár in 2022.” Rinne an Roinn Coimirce Sóisialaí Ipsos a chonrú chun tabhairt faoi chéim chomhairliúcháin phoiblí an athbhreithnithe seo.
Tá nasc leis an gcomhairliúchán ar fáil ag: Item was unpublished or removed agus beidh sé ar oscailt go dtí Dé hAoine, an 7 Deireadh Fómhair 2022.
Tugtar cuireadh freisin do bhaill den phobal aighneachtaí a dhéanamh ar ríomhphost le IE-PA-Midtermreview@ipsos.com faoin 7 Deireadh Fómhair. Ní ghlacfar ach le haighneachtaí a dhéantar leis an seoladh ríomhphoist seo.
