An Scéim Fóirdheontais Pá leasaithe á seoladh ag an Taoiseach Micheál Martin agus an tAire Dara Calleary

• Dearadh an scéim leasaithe chun tacú le níos mó daoine míchumasaithe fostaíocht a fháil
• Leathnaíodh an scéim go hearnáil an phobail agus deonach agus earnáil tráchtála státurraithe
• Laghdú ar an tairseach íosta uaireanta seachtainiúla ó 21 go 15 uair an chloig
• D’fhéadfadh go mbeadh fostaithe atá ar Shochar Cumais Pháirtigh a bheith incháilithe anois don scéim
• Glactar sa scéim leasaithe le samhail shóisialta an mhíchumais

D’fhógair an Taoiseach, Mícheál Martin TD, agus an tAire Coimirce Sóisialaí, Dara Calleary TD, inniu leathnú na Scéime Fóirdheontais Pá a chabhróidh le níos mó daoine míchumasaithe fostaíocht a fháil agus a choinneáil.

Spreagann an Scéim Fóirdheontais Pá fostóirí le daoine míchumasaithe a fhostú trí thacaíocht airgeadais a sholáthar. Is féidir leis seo cabhrú leis an gcostas a ghabhann le ról a oiriúnú don fhostaí a chlúdach. Is féidir le fostóirí fóirdheontas idir €6.30 agus €9.45 san uair a fháil, ag brath ar líon na n-oibrithe atá fostaithe faoin scéim.

Labhair an tAire Leanaí, Míchumais agus Comhionannais, Norma Foley agus an tAire Stáit le freagracht as Míchumas, Hildegarde Naughton, leis na hionadaithe ón earnáil míchumais agus le hionadaithe fostóirí a bhí i láthair freisin.

D’fhoghlaim na daoine a bhí i láthair ó bhunfhoinse faoi na buntáistí a bhaineann le bheith rannpháirteach sa scéim ó dhearcadh an fhostóra agus an fhostaí, le léargais phearsanta ó Deborah Roche, Bainisteoir Airgeadais agus Oibríochtaí ag RSL agus an Dr. Jill Carey ó Festina Lente Enterprises.

Is toradh ar na moltaí ó athbhreithniú ar an Scéim Fóirdheontais Pá, a rinne an Roinn agus a foilsíodh i mí Lúnasa 2024, iad na hathruithe atá á bhfógairt inniu. Faoi Bhuiséad 2024, leithdháileadh €3.7 milliún breise le haghaidh na scéime chun í a leathnú agus a fheabhsú.

Cuireann an scéim athchóirithe anois na sé mholadh a rinneadh san athbhreithniú a chuir i bhfeidhm:

1. Laghdaigh an t-íosmhéid uaireanta atá ag teastáil don scéim. Laghdaíodh an t-íosmhéid uaireanta atá ag teastáil chun leas a bhaint as an bhfóirdheontas ó 21 uair an chloig go 15 uair an chloig ionas gur féidir daoine a bhfuil acmhainn oibre níos teoranta acu a chur san áireamh.
2. An téarma ‘easnamh táirgiúlachta’ a bhaint ón scéim. Ní dhírítear sa scéim a thuilleadh ar easnamh táirgiúlacht ach ar an ngá a bhaineann le ról a oiriúnú do dhuine míchumasaithe.
3. An scéim a leathnú thar earcaíocht chun daoine atá ag filleadh ar an obair a choinneáil a chur san áireamh. Tá tábhacht ar leith ag gabháil leis seo toisc go bhfaightear formhór na míchumais. Tá daoine a fhilleann ar an obair ar Shochar Cumais Pháirtigh agus a fuair a míchumas nó a riocht sláinte le 12 mhí anuas anois incháilithe.
4. An scéim a leathnú go hearnáil an phobail agus deonach agus earnáil tráchtála státurraithe. Méadóidh sé seo deiseanna fostaíochta do dhaoine míchumasaithe trí leathnú a dhéanamh ar an scéim thar fhostóirí san earnáil phríobháideach chuig gach fostóir nach bhfuil san earnáil phoiblí.
5. Athbhreithniú a dhéanamh ar an ráta fóirdheontais ar bhonn rialta. Cinnteofar anseo go leanfaidh an fóirdheontas le tacaíocht leordhóthanach a thabhairt d’fhostóirí. Déanfar athbhreithniú ar an ráta fóirdheontais gach trí bliana ar a laghad.
6. An scéim a chur chun cinn agus eolas a scaipeadh ina leith. Sheol an tAire feachtas poiblíochta ar fud na tíre inniu don Scéim Fóirdheontais Pá chun eolas maidir leis scéim a chur chun cinn agus a fheabhsú.

Agus é ag labhairt ag an ócáid, dúirt an Taoiseach:

“Inniu, tá lúcháir orm na feabhsuithe seo ar an Scéim Fóirdheontais Pá a sheoladh. Ní hamháin go bhfuil ról ríthábhachtach ag tacaíochtaí mar seo maidir leis an mbearna fostaíochta a dhúnadh do dhaoine míchumasaithe, bochtaineacht a laghdú agus tacú le teaghlaigh agus pobail, ach freisin d’fhostóirí chun smaointe, scileanna agus eolas nua a thabhairt chuig a ngnólachtaí.

Tá mé tiomanta do chearta daoine míchumasaithe a chur chun cinn agus saol daoine míchumasaithe a fheabhsú, lena n-áirítear bacainní ar fhostaíocht a bhaint.

Aithníonn tacaíochtaí amhail an Scéim Fóirdheontais Pá athbhreithnithe seo go gcuireann dearcadh, buanna agus ranníocaíochtaí daoine míchumasaithe ar fud na sochaí go mór le cáilíocht, saibhreas agus éagsúlacht ár saol go léir.”

Agus an scéim athchóirithe agus an feachtas poiblíochta á seoladh aige, dúirt an tAire Calleary:

“Molaim go láidir d’fhostóirí machnamh a dhéanamh ar an gcaoi a bhféadfadh an Scéim Fóirdheontais Pá a ngnó a fheabhsú agus fostaíocht shuntasach agus inbhuanaithe a thairiscint do dhaoine míchumasaithe.

Creidim go ndéanfaidh na hathruithe a rinneadh ar an Scéim Fóirdheontais Pá níos inrochtana agus níos solúbtha í d’fhostóirí agus do dhaoine míchumasaithe araon.

Tá na buanna agus na scileanna atá ag teastáil ó fhostóirí ag daoine míchumasaithe.

Tá sé mar thosaíocht amach is amach domsa, don Taoiseach agus don Rialtas seo feabhas a chur ar dheiseanna fostaíochta do dhaoine míchumasaithe.”

Agus í ag trácht ar na hathchóirithe, thug an tAire Foley faoi deara:

“Tá an ráta fostaíochta i measc daoine faoi mhíchumas i bhfad Éireann ró-íseal sa tír seo. Tá an oiread sin acmhainneachta agus tallainne ann ar féidir leas a bhaint as. Ba mhaith liom buíochas a ghabháil le thart ar 1,500 fostóir atá rannpháirteach cheana féin sa Scéim Fóirdheontais Pá. Tá súil agam go spreagfaidh na feabhsuithe seo ar an scéim níos mó fostóirí chun páirt a ghlacadh agus go gcuirfidh siad deiseanna fíor ar fáil do dhaoine míchumasaithe a gcuid tallann agus cumais a thaispeáint.”

Agus tábhacht na Scéime Fóirdheontais Pá á haithint aici, dúirt an tAire Naughton:

“Mar an tAire atá freagrach as Míchumas, is tosaíocht lárnach í daoine a chumhachtú chun rochtain a fháil ar fhostaíocht bhríoch, agus cuirim fáilte ó chroí roimh na hathruithe sa Scéim Fóirdheontais Pá atá á bhfógairt anseo inniu. Tá fís ag an Rialtas seo d’Éirinn nach mbeidh aon duine thíos le heisiamh ná idirdhealú in aon ghné den tsochaí, lena n-áirítear i gcomhthéacs na fostaíochta. Táim tiomanta do chinntiú go dtacaítear le gach duine faoi mhíchumas chun saol iomlán a chaitheamh dá rogha féin, ar bhonn cothrom le gach duine eile sa tsochaí.”

Tá tuilleadh eolais faoin Scéim Fóirdheontais Pá ar fáil ag: gov.ie/wss.

Chun cáiliú don Scéim Fóirdheontais Pá, ní mór conradh fostaíochta sé mhí ar a laghad a thairiscint d’fhostaithe. Ní mór don chonradh a bheith ar feadh 15 uair an chloig oibre ar a laghad in aghaidh na seachtaine. Ní féidir le fostóir an fóirdheontas a éileamh ach amháin ar feadh suas le 39 uair an chloig oibre in aghaidh na seachtaine. Ní mór d’fhostaithe a bheith 18 mbliana d’aois nó níos sine.

Tá trí shnáithe fóirdheontais sa scéim.

Snáithe 1: is fóirdheontas ginearálta de €6.30 san uair é.

Snáithe 2: cuireann sé méadú ar an ráta fóirdheontais suas go €9.45 san uair ar fáil bunaithe ar líon na bhfostaithe míchumasaithe atá fostaithe ag an gcomhlacht atá ar an scéim.

Snáithe 3: ar fáil d’fhostóirí a bhfuil 25 fostaí nó níos mó acu ar an scéim. Cuireann sé deontas €30,000 ar fáil i dtreo chostas Oifigeach Cúnaimh Fostaíochta a fhostú.

Tá tuarascáil athbhreithnithe na Scéime Fóirdheontais Pá ar fáil anseo: Tuarascáil ar an Athbhreithniú ar an Scéim Fóirdheontais Pá