An Scéim um Shochar Báis (faoin Scéim um Shochair Dhíobhálacha Ceirde)
- Foilsithe: 23 Iúil 2019
- An t-eolas is déanaí: 22 Lúnasa 2025
- Cad í an Scéim um Shochar Báis (faoin Scéim um Shochair Dhíobhálacha Ceirde)
- Conas cáiliú
- Rátaí íocaíochta
- Cuir iarratas isteach
- Treoirlínte Oibriúcháin
Cad í an Scéim um Shochar Báis (faoin Scéim um Shochair Dhíobhálacha Ceirde)
Má fhaigheann duine árachaithe bás mar gheall ar thimpiste ag an obair nó de bharr galair a bhaineann lena gcuid oibre, féadfar Sochar Báis (faoin Scéim um Shochair Dhíobhálacha Ceirde) a íoc lena gcéile, comhchónaitheoir cáilithe, páirtnéir sibhialta, nó leanbh cleithiúnach marthanach.
Féadfar Sochar Báis a íoc freisin má bhí Sochar Míthreorach á fháil ag an duine árachaithe tráth a mbáis a measúnaíodh ag 50% nó níos mó, beag beann ar chúis an bháis.
Áirítear leis an Scéim um Shochar Báis:
- Pinsean Páirtnéara faoi Mhéala
- Pinsean Dílleachta
- Deontas Sochraide
Conas cáiliú
Pinsean Páirtnéara faoi Mhéala
Íoctar é seo le céile marthanach, páirtnéir sibhialta marthanach nó comhchónaitheoir cáilithe marthanach an duine árachaithe a fuair bás mar thoradh ar thimpiste ag an obair, galar ceirde nó a raibh Pinsean Míthreorach á fháil acu a measúnaíodh mar 50% nó níos mó tráth a mbáis.
Is éard atá i gceist againn le páirtnéir ná d’fhear céile, do bhean chéile, do pháirtnéir sibhialta nó do chomhchónaitheoir cáilithe.
Measfar duine a bheith ina chomhchónaitheoir cáilithe chun críche Pinsean Páirtnéara faoi Mhéala más rud é gur chónaigh an lánúin le chéile i ndlúthchaidreamh tiomanta ar feadh tréimhse:
- 2 bhliain i gcás ina bhfuil leanaí ón gcaidreamh;
- 5 bliana i gcás nach bhfuil aon leanaí ón gcaidreamh;
Agus
- Níor tháinig deireadh leis an gcaidreamh níos mó ná dhá bhliain roimh bhás an duine éagtha.
Ní féidir leat an pinsean a fháil má phósann tú arís, má théann tú i bpáirtnéireacht shibhialta nó má chomhchónaíonn tú le duine eile. Níl tionchar ag aon ioncam a d’fhéadfadh a bheith agat ar an bpinsean. Íoctar méaduithe i leith leanaí cáilithe leis an bpinsean. Tá an pinsean inchánach.
Ní féidir Pinsean Páirtnéara faoi Mhéala faoin Scéim um Shochar Báis a íoc ag an am céanna le Pinsean Ranníocach Páirtnéara faoi Mhéala.
Faisnéis do Chomhchónaitheoirí Cáilithe
Ón 21 Iúil 2025 i leith, tá Comhchónaitheoirí Cáilithe atá fós beo incháilithe don Phinsean (Ranníocach) Páirtnéara faoi Mhéala.
Measfar duine a bheith ina gcomhchónaitheoir cáilithe chun críche na híocaíochta má bhí cónaí ar an lánúin chomhchónaithe le chéile mar lánúin i ndlúthchaidreamh agus tiomanta ar feadh tréimhse:
- dhá bhliain i gcás ina bhfuil leanaí ón gcaidreamh nó
- cúig bliana i gcás nach bhfuil leanaí ón gcaidreamh
Tá sonraí faoi dhátaí tábhachtacha le tabhairt faoi deara ag comhchónaitheoirí cáilithe thíos:
- éilimh i ndáil le bás a tharla roimh an 22 Eanáir 2024
- éilimh i ndáil le bás a tharla idir an 22 Eanáir 2024 agus an 20 Iúil 2025
I gcás éilimh i ndáil le bás roimh an 22 Eanáir 2024
Tá éilimh i ndáil le páirtnéir éagtha árachaithe agus inar tharla an bás roimh an 22 Eanáir 2024 incháilithe do Phinsean Páirtnéara faoi Mhéala ón 22 Eanáir 2024.
I gcás éilimh i ndáil le bás a tharla idir an 22 Eanáir 2024 agus an 20 Iúil 2025
Tá éilimh i ndáil le páirtnéir éagtha árachaithe i gcás inar tharla an bás idir 22 Eanáir 2024 agus 20 Iúil 2025 incháilithe do Phinsean Páirtnéara faoi Mhéala ó dháta an bháis.
Sna cásanna thuas, tá 6 mhí ag comhchónaitheoir cáilithe ón 21 Iúil 2025 chun a n-iarratas a dhéanamh chun an íocaíocht a chur siar go dtí an 22 Eanáir 2024 nó dáta an bháis más déanaí é.
Mura ndéantar an t-iarratas laistigh den tréimhse seo, is é 6 mhí ó dháta an iarratais an uasmhéid siardhátaithe ar an íocaíocht.
Pinsean Dílleachta
Íoctar é seo thar ceann linbh má fuair an duine árachaithe a thacaigh leis an leanbh bás mar thoradh ar thimpiste ag an obair, galar ceirde nó má bhí Pinsean Míthreorach á fháil acu a measúnaíodh mar 50% nó níos mó tráth a mbáis.
Ba chóir do chaomhnóir an dílleachta iarratas a chur isteach ar an íocaíocht.
Deontas Sochraide
Má chomhlíonann an duine éagtha na coinníollacha, is féidir Deontas Sochraide speisialta a íoc leis an duine a íocann as costais na sochraide. Níl Deontas Sochraide inchánach.
Rátaí íocaíochta
Íoctar íocaíochtaí faoin Scéim um Shochar Báis ag rátaí níos airde ná Pinsean Ranníocach caighdeánach nó íocaíocht Caomhnóra.
Cineál íocaíochta | Ráta íocaíochta | |
---|---|---|
Pinsean Páirtnéara faoi Mhéala (faoi 66) | €274.50 in aghaidh na seachtaine | |
Pinsean Páirtnéara faoi Mhéala (os cionn 66-79) | €293.70 in aghaidh na seachtaine | |
Méadú do mhaireachtáil aonair (66 bliain d’aois agus níos sine) | €303.70 in aghaidh na seachtaine | |
Méadú ar mhaireachtáil aonair 66 bliana d’aois agus níos sine | €22.00 in aghaidh na seachtaine | |
Méadú do Leanbh Cáilithe faoi 12 mbliana d'aois | €50.00 in aghaidh na seachtaine | |
Méadú do Leanbh Cáilithe 12 bliana d'aois agus níos sine | €62.00 in aghaidh na seachtaine | |
Pinsean Dílleachta | €230.80 in aghaidh na seachtaine | |
Deontas Sochraide | €850.00 (cnapshuim aonuaire) |
Cuir iarratas isteach
Ba chóir éileamh ar aon cheann de na híocaíochtaí faoin Scéim um Shochar Báis a dhéanamh laistigh de 3 mhí ó dháta an bháis, nó d’fhéadfá cuid den sochar a chailleadh.
Comhlánaigh foirm éilimh OB 61, atá ar fáil thíos, nó ó do Oifig áitiúil Intreo nó Oifig Bhrainse Leasa Shóisialaigh.
Seol d’fhoirm éilimh críochnaithe mar aon leis na doiciméid tacaíochta ábhartha chuig Rannóg an tSochair Báis ag an seoladh seo:
Death Benefit Section
- Seoladh:
- Death Benefit Section, Department of Social Protection, Government Buildings, Ballinalee Road, Longford, Co. Longford, N39 E4E0
- Suíomh Gréasáin:
- Ríomhphost:
- Teileafón:
-
0818 927770;
043 334 0000
Treoirlínte Oibriúcháin
Déanann treoirlínte oibriúcháin cur síos ar na próisis agus na nósanna imeachta a leanann baill foirne na roinne agus iad i mbun a gcuid oibre.