Nuashonrú ar sheachadadh an Phlean Náisiúnta Leathanbhanda - Geimhreadh 2021

Tá sé tábhachtach machnamh a dhéanamh ar an dul chun cinn a rinneadh agus aitheantas a thabhairt don dul chun cinn a rinneadh maidir le bonneagar leathanbhanda na hÉireann a fheabhsú mar a shroichimid deireadh na bliana, go háirithe le hidirghabháil an Stáit chun leathanbhanda ardluais a sholáthar do cheantair tuaithe.

Le bliain go leith anuas, thug ár mbonneagar leathanbhanda deis do na céadta míle duine leanúint ar aghaidh de bheith ag obair agus ag foghlaim tríd na srianta dianghlasála agus an scaradh sóisialta. Bheadh aistriú na hÉireann chuig an gcianobair, soláthar seirbhíse agus oideachas i bhfad ní ba dheacra, dodhéanta b'fhéidir fiú dá dtarlódh an phaindéim deich mbliana ó shin.

D'fhógair soláthraithe tráchtála amhail Eir, SIRO agus Virgin Media pleananna le déanaí chun a líonraí snáthoptaice a leathnú agus/nó a uasghrádú agus táirgí ardluais a thairiscint do na milliúin áitreabh ar fud na tíre – arb ionann é agus infheistíocht de bhreis agus €1.8 billiún.

Is é sprioc an Phlean Náisiúnta Leathanbhanda leathanbhanda ardluais iontaofa ar ardchaighdeán a sholáthar do gach teach agus gnó sa tír, is cuma cé chomh hiargúlta is atá siad. Cinnteoidh sé seo go mbeidh Éire ar thús cadhnaíochta san Aontas Eorpach ó thaobh nascacht leathanbhanda de.

Tá móiminteam á thógáil le 6 mhí anuas, in ainneoin na ndúshlán leanúnach a bhaineann le Covid-19, go háirithe sa chéad leath den bhliain seo. Tá an líonra nua leathanbhanda ardluais ar fáil anois le hordú agus le réamhordú ar fud 14 Chontae.

Tá naisc le líonra an Phlean Náisiúnta Leathanbhanda ag ardú, agus bhain NBI garsprioc shuntasach amach, agus níos mó ná 1,000 teach ceangailte acu i mí na Nollag amháin.

Ina theannta sin, baineadh amach neart príomh-gharspriocanna:

• Beidh thart ar 54,000 áitreabh ar fud na tíre in ann leathanbhanda ardluais a réamhordú nó a ordú faoi dheireadh mhí na Nollag 2021
• Tá níos mó ná 230 Pointe Nasctha Leathanbhanda beo agus ag tacú le rochtain phoiblí ar leathanbhanda i gcuid de na pobail is iargúlta in Éirinn
• Tá os cionn 160 scoil beo, nó beagnach beo, ag tabhairt seirbhís ardluais ag tús na bliana nuaí agus de réir mar a fhilleann daltaí agus múinteoirí ar na seomraí ranga.

Beidh Éire ar thús cadhnaíochta san Aontas Eorpach maidir le clúdach leathanbhanda gigighiotáin snáthoptaic-go-baile a sholáthar nuair a bheidh rolladh amach na snáthoptaice críochnaithe.

Amhail neart earnálacha, bhí tionchar ag Covid-19 ar leathadh amach an Phlean Náisiúnta Leathanbhanda sa chéad leath den bhliain. Mar sin féin, tá dul chun cinn déanta ag NBI sa dara leath de 2021. Beidh thart ar 54,000 áitreabh ar fáil le hordú nó le réamhordú ag deireadh na bliana, trí Sholáthraithe Seirbhíse Miondíola (RSPanna) chun áitreabh a nascadh le líonra ardleibhéil an Phlean Náisiúnta Leathanbhanda.

Go dtí seo, tuairiscíonn NBI gur rolladh breis agus 6,000 ciliméadar de snáthoptaic amach agus go bhfuil beagnach 25,000 cuaille réidh nó suiteáilte ag NBI mórthimpeall na tíre. Tá gach ceann acu comhordaithe ag lucht saothair de níos mó ná 1,200 fostaí agus conraitheoir de chuid NBI, líon atá ag dul i méid, agus a oibríonn ar fud na tíre – agus bíonn luas an tseachadta ag ardú i gcónaí. Is féidir tuilleadh eolais a fháil ar láithreán gréasáin NBI anseo.

Tá an líon áitreabh seo a leanas in ann nasc a réamhordú/ordú nó tá siad ceangailte cheana féin leis an líonra PNL ó lár mhí na Nollag 2021 – líon atá ag fás ar bhonn seachtainiúil:

Cheangail an t-ealaíontóir Éireannach as Contae an Chabháin, Paul Galligan, a áitreabh leis an líonra ardluais PNL le déanaí, rud a d'oscail a ghailearaí do dheiseanna agus do lucht féachana nua ar líne.

Tá 385 feirm ceangailte leis an líonra freisin, rud a thugann seirbhís iontaofa do chuid de na gnólachtaí talmhaíochta is iargúlta in Éirinn. Ligeann leathanbhanda ardluais d'fheirmeoirí teicneolaíochtaí nua a uasmhéadú agus a úsáid, marglanna fíorúla a bhí ríthábhachtach do leanúnachas gnó le linn Covid-19 san áireamh.

Féadfaidh tú fanacht cothrom le dáta leis na scéalta naisc is déanaí trí chainéal YouTube NBI.

Amhail mí na Nollag 2021, tá an líon áitreabh seo a leanas ag céim na suirbhéireachta, céim an dearaidh, céim na tógála nó céim an ordaithe maidir leis an rolladh amach:

Tá oibreacha tógála snáthoptaice ag ardú, agus tá an tógáil ar siúl nó curtha i gcrích le haghaidh 150,000 áitreabh ar fud na 26 Chontae go léir.

Is féidir leat tuilleadh eolais faoi Limistéir Imscartha agus amlínte le críochnú ar shuíomh gréasáin NBI anseo.

Tabhair faoi deara go meastar na dátaí go léir a chuirtear ar fáil bunaithe ar dhearcadh reatha NBI ach d'fhéadfadh sé a bheith faoi réir athruithe sa todhchaí.

Tá feabhsuithe suntasacha déanta ag NBI ar a láithreán gréasáin, ag soláthar léarscáileanna idirghníomhacha agus faisnéis maidir le cathain a bheidh rochtain ar líonra PLN ag úinéirí tí, gnólachtaí, feirmeacha agus grúpaí pobail.

Tugann an láithreán gréasáin an fhaisnéis is fearr atá ar fáil ag NBI thar na seacht mbliana iomlána d'fhad an chonartha mar atá sé inniu. Mar thoradh ar shoiléireacht fheabhsaithe maidir le hamlínte measta suirbhéireachta agus nasctha, curtear ar chumas na saoránach cinntí gearrthéarmacha a dhéanamh maidir leis an áit ina gcónaíonn siad agus ina n-oibríonn siad agus a fhios acu go mbeidh leathanbhanda ardluais ar fáil dóibh ar fud na tíre go luath.

Aithníonn an Roinn Comhshaoil, Aeráide agus Cumarsáide (RCAC) go bhfuil imní ar na daoine a bheidh ag fanacht go ceann cúpla bliain eile go mbeidh siad nasctha leis an líonra, maidir leis an amlíne chun nascadh le seirbhís iontaofa leathanbhanda, in ionad na n-ardluasanna a bheidh ar fáil thar an líonra PNL.

Cinnteofar, le himeacht ama, go seasfaidh an tionscadal an aimsir agus nach bhfaighidh daoine atá ag cur fúthu sna limistéar idirghabhála iad féin ar an taobh mícheart de dheighilt dhigiteach arís.

Tá sraith laethanta faisnéise poiblí ar siúl ag NBI ar fud na tíre freisin, rud a thug tuilleadh deiseanna do rannpháirtíocht an phobail leis an tionscadal agus a thugann deis do thomhaltóirí labhairt go díreach le foireann tacaíochta NBI faoina stádas nasctha.

Leanann Ionad Teagmhála National Broadband Ireland (NBI) ar aghaidh ag cur seirbhís fhreagrúil ardchaighdeáin ar fáil do thomhaltóirí leathanbhanda, agus freagra á thabhairt ar 90% de na ríomhphoist laistigh de 24 uair an chloig, chun tacú leis an bpróiseas nasctha agus chun cur chuige láidir rannpháirtíochta tomhaltóirí a chinntiú.

Tá bearta déanta ag RCAC a seirbhís teagmhála do thomhaltóirí a fheabhsú, ag tabhairt isteach foirm ghréasáin ainmnithe do dhaoine aonair chun teagmháil a dhéanamh leis an Roinn le saincheisteanna maidir le soláthar leathanbhanda ardluais ag a n-áitreabh.

Tá an fhoirm seo ar fáil anseo.

Beidh 46 Sholáthraí Seirbhíse Miondíola (RSPanna) ag cur seirbhísí ar fáil ar an líonra PNL do chustaiméirí ar fud na hÉireann, ag cruthú rogha agus luach níos fearr sa mhargadh chomh maith leis na pacáistí iomaíocha leathanbhanda céanna a chinntiú do thomhaltóirí ar fud na tíre – i gceantair tuaithe agus uirbeacha araon.

Tá 30 RSP ag díol go gníomhach ar an Líonra PNL i láthair na huaire le beagnach 35,000 áitreabh ar fud 14 Chontae (Ceatharlach, an Cabhán, an Clár, Corcaigh, Gaillimh, Ciarraí, Cill Dara, Luimneach, Lú, Muineachán, Ros Comáin, Tiobraid Árann, Loch Garman, Cill Mhantáin) atá in ann naisc ardluais a ordú agus a réamhordú anois.

Is féidir leat tuilleadh eolais a sholáthar faoin nascadh agus na RSPanna atá bunaithe agus deimhnithe chun seirbhísí líonra a dhíol ar an líonra PNL anseo.

Soláthraíonn Pointí Nasctha Leathanbhanda (BCPanna) nascacht gan sreang, a thacaíonn le cianobair agus le pobail nasctha trí rochtain phoiblí a sholáthar ar leathanbhanda ardluais saor in aisce roimh an bpríomh-imscaradh snáthoptaice faoin bPlean Náisiúnta Leathanbhanda.

Sa dara leath den bhliain seo, bhí deis ag an Aire Stáit Ossian Smyth cuairt a thabhairt ar BCPanna i gContaetha Luimnigh, an Chláir agus Chill Mhantáin chun a fháil amach conas atá daoine agus gnólachtaí áitiúla ag baint tairbhe as na seirbhísí pobalbhunaithe seo cheana féin agus chun tuiscint a fháil ar an dul chun cinn atá á dhéanamh leis an rolladh amach snáthoptaice níos leithne.

Thug an tAire cuairt freisin ar Acadamh Oiliúna KN Circet i mBaile Átha Cliath, áit a raibh an deis aige taithí a fháil ar na hionsamhlúcháin fhíorshaoil a thugann KN Circet – ceann de phríomh-chomhpháirtithe NBI i dtógáil an líonra PNL – mar chuid dá bpróiseas oiliúna, sula n-imscartar oibrithe sa réimse.

Suíomhanna Poiblí

Ó nuashonrú an tSamhraidh, tá 30 BCP poiblí eile imithe beo i gContae Cheatharlach, Contae na Gaillimhe, Contae Luimnigh, Contae na Mí, Contae Shligigh agus Contae Chill Mhantáin, rud a thugann leathanbhanda ardluais céim amháin níos gaire do shaoránaigh, do ghnólachtaí agus do chuairteoirí áitiúla sna ceantair seo.

Ar bhonn níos forleithne, ó lár mhí na Nollag 2021:

• Tá 262 BCP suiteáilte ag NBI agus iad réidh le nascadh
• Tá 234 BCP beo ar an líonra ardluais

Scoileanna Náisiúnta

Nascfar 679 Scoil Náisiúnta sa limistéar idirghabhála le leathanbhanda ardluais faoin bPlean Náisiúnta Leathanbhanda, le tacaíocht ón Roinn Oideachais agus Scileanna.

Is é uaillmhian NBI gach scoil náisiúnta a nascadh faoi dheireadh 2022, de réir thiomantas an Rialtais chun a chinntiú go mbeidh rochtain ag scoileanna ar sheirbhísí leathanbhanda a bhfuil géarghá leo.

Tá 28 scoil eile imithe beo agus tá os cionn 160 scoil réidh anois le nascadh trí RSP le sé mhí anuas.

Amhail lár mhí na Nollag 2021:

• Tá 168 scoil suiteáilte ag NBI agus iad réidh le nascadh
• Tá 99 de na 168 scoil beo ar an líonra ardluais

Tá NBI ag obair chun a chlár tógála réamh-mheasta agus a amlínte don bhliain seo chugainn a thabhairt chun críche faoi mar a leanann an tionscadal ag leathadh amach ar fud na tíre.

Fágfaidh sé sin go mbeidh sé de chumas ag níos mó tithe, gnólachtaí agus feirmeacha ar fud chontaetha uile na hÉireann tairbhe a bhaint as nascadh leis an líonra PNL in 2022.

Ní mór dár mbonneagar leathanbhanda oibriú go hiontaofa agus go cothrom, ní amháin do 2021, ach do 2051 agus níos faide i gcéin.

Léiríonn an limistéar Gorm ar léarscáil PNL limistéir atá clúdaithe cheana féin ag oibreoirí tráchtála a sholáthraíonn seirbhísí leathanbhanda ardluais.

Is limistéar dinimiciúil é limistéar idirghabhála PNL (a fheictear san Ómra) atá faoi réir athbhreithnithe ag an RCAC, mura gcomhlíonann na seirbhísí leathanbhanda atá á dtairiscint an caighdeán leathanbhanda de 30Mbps.

Ba cheart d'aon tomhaltóir i gceantar Gorm ag a bhfuil deacrachtaí maidir le leathanbhanda ardluais a sholáthar - eadhon íosluas íoslódála de 30Mbps agus íosluas uaslódála de 6Mbps - dul i dteagmháil lena soláthraí seirbhíse leathanbhanda chun imscrúdú a dhéanamh chun an cúis a bhfuil luasanna leathanbhanda malla acu a chinneadh nó an chúis nach féidir an tseirbhís sin a sholáthar.

Teagmháil a dhéanamh le NBI

Tá tuilleadh sonraí maidir le feidhmiú céimneach agus gníomhaíocht NBI ar láithreán gréasáin NBI.

Má tá aon cheist eile agat, féadtar teagmháil a dhéanamh le NBI:

Teagmháil ghinearálta ríomhphoist - contactus@nbi.ie

Teagmháil ríomhphoist le hionadaithe tofa - reps@nbi.ie

Ar an bhfón - 0818 624 624

Teagmháil a dhéanamh leis an Roinn

Is féidir leat teagmháil a dhéanamh leis an Roinn trí ríomhphost a sheoladh chuig broadband@decc.gov.ie