Príomhoifigeach Logainmneacha

Tá iarratais á lorg ag an Roinn Turasóireachta, Cultúir, Ealaíon, Gaeltachta, Spóirt agus Meán ó iarratasóirí oiriúnacha chun folúntas don phost Príomhoifigeach Logainmneacha bunaithe i mBaile Átha Cliath, a líonadh.

Ról an Bhrainse Logainmneacha

Is cuid den Roinn Turasóireachta, Cultúir, Ealaíon, Gaeltachta, Spóirt agus Meán é an Brainse Logainmneacha. Tugann an Brainse Logainmneacha faoi thaighde ar logainmneacha na hÉireann chun leaganacha údarásacha Gaeilge a chur ar fáil maidir leis na logainmneacha sin chun críocha oifigiúla agus d’úsáid an phobail. Cuireann sé tacaíocht ar fáil don Choiste Logainmneacha freisin. Is í an Ghaeilge teanga oibre an Bhrainse Logainmneacha.

Post an Phríomhoifigigh Logainmneacha

• Bainistiú an Bhrainse Logainmneacha.
• Foirmeacha údarásacha Gaeilge de logainmneacha a shocrú bunaithe ar obair an Bhrainse.
• Taighde maidir le logainmneacha a choimisiúnú.
• Liostaí de na foirmeacha Gaeilge a chur faoi bhráid an Choiste Logainmneacha lena ngrinnscrúdú agus faisnéis agus fianaise a thabhairt maidir leis na foirmeacha Gaeilge nuair is gá.
• Dul i gcomhairle leis an gCoiste Logainmneacha chomh maith le heolas agus tacaíocht, lena n-áirítear tacaíocht rúnaíochta, a chur ar fáil don Choiste, lena n-áirítear cruinnithe a shocrú go rialta.
• Dréachtorduithe logainmneacha a ullmhú, i gcomhar leis an gCoiste Logainmneacha agus i gcomhairle leis an mbainistíocht de réir mar is cuí, agus iad sin a chuir faoi bhráid an Aire chun críche éifeacht dlí a thabhairt do na foirmeacha Gaeilge faoi fhorálacha Achtanna na dTeangacha Oifigiúla 2003 go 2021.
• Comhairle a thabhairt don Aire maidir le saincheisteanna a bhaineann le logainmneacha Gaeilge.
• Leanúint de Logainm.ie (Bunachair Logainmneacha na hÉireann) agus Meitheal Logainm.ie (Tionscadal Bailithe Logainmneacha an Phobail) a fhorbairt mar acmhainní ar líne do chustaiméirí agus mar acmhainní taighde agus cartlainne d’fhoireann an Bhrainse Logainmneacha, i gcomhar le Fiontar (DCU).
• Feidhmíocht na foirne tuairiscithe a bhainistiú, spriocanna a aontú le gach ball foirne, agus monatóireacht a dhéanamh ar fheidhmiú na spriocanna sin.
• Plean Gnó bliantúil an Bhrainse a ullmhú, an plean sin a aontú leis an mbainistíocht agus é a chur i bhfeidhm le comhoibriú ón bhfoireann.
• A chinntiú go mbeidh fáil ag custaiméirí ar sheirbhís d’ardchaighdeán trí fhreagraí tapa a thabhairt ar iarrataí ar eolas i ndáil le logainmneacha.
• Oidhreacht logainmneacha na hÉireann chomh maith le beartas agus ról an stáit maidir le foirmeacha Gaeilge a chur chun cinn trí chuir i láthair phoiblí a thabhairt agus trí fhreastal ar chomhdhálacha de réir mar is cuí.

An tSlí le hIarratas a Dhéanamh:

Ba cheart d’iarratasóirí foirm iarratais chomhlánaithe a chur isteach chuig

personnel@tcagsm.gov.ie faoin 3.00pm 11ú Feabhra 2022.

Leabhrán Faisnéise

Déan an leabhrán faisnéise atá ceangailte leis seo a íoslódáil chun tuilleadh eolais a fháil maidir le hincháilitheacht agus riachtanais.

Foirm Iarratais

Dá mba maith leat iarratas a dhéanamh ar phost an Phríomhoifigigh Logainmneacha, íoslódáil an fhoirm iarratais atá faoi iamh.

Nuair a bheidh an fhoirm comhlánaithe agat, is féidir í a sheoladh ar aghaidh ar ríomhphost chuig personnel@tcagsm.gov.ie

Ní mór gach iarratas a bheith faighte ag an Roinn tráth nach déanaí ná 3.00pm 11ú Feabhra 2022

Mura bhfuil tú ábalta cóip den fhoirm iarratais nó den leabhrán faisnéise a íoslódáil, seol iarraidh chuig an seoladh ríomhphoist thuas agus cuirfimid cóip chugat ar ríomhphost.

Ba chóir d'iarratasóirí a thabhairt ar aird go gcuirfear iarratasóirí a n-éireoidh leo san agallamh ar phainéal ónar féidir ceapacháin a dhéanamh de réir mar a thagann siad chun cinn.

Ráiteas Príobháideachais

Féach an ráiteas príobháideachais faoi iamh maidir le sonraí pearsanta a chuirtear ar fáil i ndáil leis an gcomórtas seo.