An Scéim Tacaíochta um an Geilleagar Oíche 2022 (STGO) Treoirlínte

Níltear ag glacadh le hiarratais ar an Scéim Tacaíochta um Gheilleagar Oíche a thuilleadh.

Tá an ciste don Scéim seo ídithe anois.

Go raibh maith agaibh as an spéis a chuir sibh sa Scéim seo.

Léigh na treoirlínte seo a leanas go cúramach sula gcomhlánóidh tú d’fhoirm iarratais.

• tugtar cuireadh anois iarratais a chur ar aghaidh maidir le híocaíocht a fháil faoin scéim seo

• beifear in ann iarratais a dhéanamh ar an scéim seo ó 1 pm an 21 Meitheamh 2022 go dtí 1pm Dé hAoine an 22 Iúil 2022 nó go dtí go mbeidh an ciste caite, cibé acu a tharlaíonn ar dtús.

• ní féidir le gnóthaí ach aon iarratas amháin a dhéanamh faoin scéim seo

Is éard atá i gceist leis an ngeilleagar tráthnóna agus oíche (GTO) an ghníomhaíocht éagsúil shóisialta, chultúir gheilleagair a tharlaíonn sa tráthnóna agus san oíche.

Is í Catherine Martin T.D., an tAire Turasóireachta, Cultúir, Ealaíon, Gaeltachta, Spóirt agus Meán, a bhunaigh an Tascfhórsa Geilleagair Oíche an 30 Iúil 2020 a bhí ar cheann de na príomhthosaíochtaí don Roinn agus de bhun gealltanas a leagtar amach i gClár an Rialtais.

D’fhéach an Tascfhórsa ar an nGeilleagar Oíche ar bhealach iomlánaíoch arb é ab aidhm leis éagsúlacht in imeachtaí a mhéadú, deiseanna cultúir sa tráthnóna a mhéadú do theaghlaigh agus d’aoisghrúpaí eile agus chun féachaint freisin ar bhealaí nua chun nuálaíocht agus cruthaitheacht a chur chun cinn sa Gheilleagar Oíche.

Foilsíodh an Tuarascáil Tascfhórsa Geilleagair Oíche an 15 Meán Fómhair agus tá sí le fáil ar: Report of the Night-Time Economy Taskforce

Mhol an Tascfhórsa gur cheart Scéim nua a fhorbairt chun tacú le hionaid, amhail tithe tábhairne, caiféanna, agus ionaid nach gcuireann alcól ar fáil, chun imeachtaí nua, gníomhaíochtaí agus tionscnaimh san oíche a thástáil, agus béim ar leith a chur ar uaireanta seachbhuaice, chun tuilleadh éagsúlachta in imeachtaí siamsaíochta san oíche a chur chun cinn, chun líon na gcustaiméirí a bhíonn sna bailte agus sna cathracha sa tráthnóna a mhéadú agus chun fostaíocht a chruthú d’ealaíontóirí/ do thaibheoirí, agus béim ar leith a chur ar thaibheoirí nua agus ar thaibheoirí atá ag teacht chun cinn. Aithníonn an Tascfhórsa freisin go bhfuil gá ann tuilleadh éagsúlachta agus uileghabhálachta a bheith i nGeilleagar Oíche na tíre seo agus nuair a bhíonn cothromaíocht ann idir imeachtaí ag a mbíonn alcól ar fáil agus imeachtaí nach gcuirtear alcól ar fáil acu, cinntítear gur féidir le déimeagrafach níos leithne páirt a ghlacadh sa Gheilleagar Oíche.

Táthar ag súil go gcuideoidh an Scéim seo leis an earnáil seo i nGeilleagar Tráthnóna agus Oíche atá gníomhach, rathúil, agus inbhuanaithe a fhorbairt arís. Leis an scéim, beidh úinéirí ionaid in ann imeachtaí éagsúla a thástáil, le go bhfeicfidh siad na sórt imeachtaí a oireann dóibh, dá gceantar áitiúil agus dá mbonn custaiméirí agus le go bhféadfaí pleanáil d’imeachtaí atá níos inbhuanaithe agus atá fadtéarmach a chur ar fáil, rud a chuirfeadh le beocht láir na mbailte agus na gcathracha tríd na seachtaine ar fad agus ní amháin ag an deireadh seachtaine. Cuirfidh sí deiseanna ar fáil d’ealaíontóirí freisin, lena n-áirítear ealaíontóirí nua agus ealaíontóirí atá ag teacht chun cinn go háitiúil agus chun úsáid na n-áitreabh seo d’ealaíontóirí éagsúla le linn na bliana a chur chun cinn.

Fáilteofar roimh iarratais faoi dhá Shruth ar leith:

• Sruth A: Áitribh Cheadúnaithe –tithe tábhairne, bialanna agus beáir fíona, clubanna oíche agus áitribh cheadúnaithe oiriúnacha eile a oibríonn sa Gheilleagar Tráthnóna agus Oíche, ar mian leo sraith imeachtaí/gníomhaíochtaí cultúir a thástáil (ceithre imeacht ar a laghad, ach gan a bheith teoranta do 4 imeacht) i rith uaireanta seachbhuaice ón Luan go dtí an Déardaoin (gan deiridh seachtaine san áireamh) ó 6pm ar aghaidh.

• Sruth B: Áitribh Neamhcheadúnaithe – caiféanna, lena n-áirítear caiféanna a bhféadfadh sé go mbeadh a n-áitribh in ionad miondíola, beáir atá saor ó alcól, gailearaithe áitiúla agus aon áitribh neamhcheadúnaithe oiriúnacha eile, ar mian leo sraith imeachtaí/gníomhaíochtaí cultúir (ceithre imeacht ar a laghad, ach gan a bheith teoranta do 4 imeacht) níos déanaí sa tráthnóna nó sa oíche ó 6pm ar aghaidh, agus an gealltanas ann iad a bheith ar oscailt go dtí ar a laghad 9pm sa tráthnóna, ón Luan go dtí an Domhnach.

Molfar d’úinéirí ionaid dul i dteagmháil leis an Oifigeach Ealaíon atá áitiúil dóibh agus/nó le Comhordaitheoir na Foirne Cultúir (Clár Éire Ildánach) chun taibheoirí nua agus taibheoirí atá ag teacht chun cinn agus ealaíontóirí atá bunaithe sa phobal a aithint. B’fhéidir go mbeadh fonn ar iarratasóirí imeachtaí a reáchtáil mar chuid den imeacht ‘Beo sa Chathair’ de chuid Fáilte Ireland, a bheidh ar siúl i mBaile Átha Cliath i mí na Samhna i mbliana. Is féidir le hiarratasóirí a n-imeachtaí a chlárú le Fáilte Ireland, tríd an nasc seo a leanas a úsáid: Is féidir fiosruithe a chur ar aghaidh chuig NTESS@tcagsm.gov.ie chun tuilleadh eolais a fháil.

Cuspóirí Scéim Sruth A

Táthar ag cur leis na moltaí atá i dTuarascáil Tascfhórsa an Gheilleagair Oíche leis an Scéim seo, arb é is aidhm léi na nithe seo a leanas a bhaint amach:

1. Na himeachtaí siamsaíochta a chuirtear ar fáil sa Gheilleagar Oíche a leathnú d’áitribh cheadúnaithe i rith uaireanta seachbhuaice, ón Luan go dtí an Déardaoin (gan an deiridh seachtaine san áireamh), rud a chuideoidh le Geilleagar Oíche bríomhar a fhorbairt agus a éagsúlú i gcathracha agus i mbailte na tíre seo i rith na seachtaine ar fad;

2. Líon na gcustaiméirí i mbailte, i gcathracha agus i sráidbhailte na tíre seo a mhéadú sa tráthnóna agus san oíche

3. Cead a thabhairt d’úinéirí áitreabh ceadúnaithe roghanna siamsaíochta éagsúla a thástáil agus cead a thabhairt dóibh pleanáil d’imeachtaí níos inbhuanaithe a chur ar fáil san fhadtéarma;

4. Deiseanna a chur ar fáil d’ealaíontóirí, lena n-áirítear ealaíontóirí nua agus ealaíontóirí atá ag teacht chun cinn; agus

5. Úsáid áitreabh ceadúnaithe a chur chun cinn ina n-ionaid d’ealaíontóirí éagsúla ar bhealach atá níos fadtéarmaí.

Cuspóirí Scéim Sruth B

1. Na himeachtaí siamsaíochta a chuirtear ar fáil sa Gheilleagar Oíche a leathnú d’áitribh neamhcheadúnaithe le linn na seachtaine ar fad, i rith uaireanta sa tráthnóna níos déanaí nó i rith uaireanta seachbhuaice, ón Luan go dtí an Domhnach, rud a chuideoidh le Geilleagar Oíche bríomhar a fhorbairt agus a éagsúlú i gcathracha agus i mbailte na tíre seo i rith na seachtaine ar fad. Dúnann formhór na gcaiféanna ach go háirithe idir 5 agus 6pm agus dúnann cuid díobh ag an deireadh seachtaine, agus dá bharr sin ní mór d’ionaid sa chatagóir seo a bheith oscailte go dtí 9p.m. ar a laghad.

2. Líon na gcustaiméirí i mbailte, i gcathracha agus i sráidbhailte na tíre seo a mhéadú sa tráthnóna agus san oíche

Roghanna siamsaíochta atá saor ó alcól a chur ar fáil do theaghlaigh agus do dhaoine óga sa tráthnóna

3. Cead a thabhairt d’áitribh neamhcheadúnaithe an margadh a thástáil chun iad a bheith oscailte níos déanaí san oíche agus roghanna siamsaíochta a thriail chun custaiméirí a mhealladh níos déanaí sa tráthnóna chun go mbeidís in ann pleanáil d’imeachtaí níos inbhuanaithe a chur ar fáil san fhadtéarma; agus

4. Deiseanna a chur ar fáil d’ealaíontóirí, lena n-áirítear ealaíontóirí nua agus ealaíontóirí atá ag teacht chun cinn.

Cé atá incháilithe chun iarratas a dhéanamh?

Beidh feidhm ag na critéir incháilitheachta seo a leanas:

• Ní mór don Iarratasóir a ghabháil air féin ceithre imeacht/ghníomhaíocht chultúir a thástáil ar a laghad (ach gan a bheith teoranta do cheithre imeacht/ghníomhaíocht).

• Ní mór rannpháirtíocht nó taibhiú a bheith i gceist leis na himeachtaí cultúir seo. Tabhair ar aird: Chun críocha na scéime seo, is éard atá i gceist le gníomhaíocht chultúir na cineálacha imeachtaí nó gníomhaíochtaí seo a leanas (ach gan a bheith teoranta dóibh):

- Ceol beo, lena n-áirítear ceol leictreonach, taibhiú

- Oícheanta grinn

- Damhsa a mbíonn taibhiú i gceist leis nó imeacht damhsa rannpháirteach,

- Oícheanta litríochta nó filíochta,

- Léiriúcháin amharclannaíochta nó drámaí

- Imeachtaí Ceardaíochta

- Taispeántais ealaíne/grianghrafadóireachta

• Ní mór don Iarratasóir cur síos soiléir ar na gníomhaíochtaí cultúir atá beartaithe a chur san áireamh agus an t-amlíne a leagan amach do gach imeacht cultúir atá beartaithe. Ní mór do gach imeacht cultúir a reáchtáil roimh Mhí Dheireadh Fómhair 2022. Is féidir síneadh a chur leis an dáta seo go dtí mí na Samhna 2022 más mian le hiarratasóirí a bheith cláraithe le himeacht ‘Beo sa Chathair’ Fáilte Ireland: https://www.failteireland.ie/winterindublin.aspx.

• Gnóthaí Cláraithe atá lonnaithe sa Stát agus a bhfuil áitreabh fisiciúil/áitribh fhisiciúla acu óna dtrádálann siad.

• Ní mór don ghnó/ionad a bheith lonnaithe sa Stát don scéim seo agus ní mór na himeachtaí/gníomhaíochtaí cultúir a reáchtáil sa Stát.

• Ní mór na coinníollacha ar fad maidir le cúrsaí cánach a bheith á sásamh ag an nGnó.

• Ní féidir le Gnó ach aon iarratas amháin a dhéanamh ar mhaoiniú faoin scéim seo.

Cé nach bhfuil incháilithe chun iarratas a dhéanamh?

• Imeachtaí cultúir nach sásaíonn na critéir incháilitheachta. Tabhair ar aird nach mbeidh na himeachtaí seo a leanas incháilithe faoin scéim:

- Imeachtaí ar trí chuireadh amháin a bheidh siad. Ní mór don phobal trí chéile agus/nó do chuairteoirí a thagann chuig an gceantar a bheith in ann freastal ar na himeachtaí.

- Aonaigh trádála, comhdhálacha, seimineáir, lena n-áirítear cainteanna a bhfuil gné chultúir nó oidhreachta i gceist leo. Tabhair ar aird: tá líon mór sruthanna maoinithe do chainteanna cultúir/oidhreachta i bhfeidhm cheana, déan teagmháil le NTESS@tcagsm.gov.ie más mian leat tuilleadh eolais a fháil.

- Imeachtaí spóirt lena n-áirítear oícheanta ag na rásaí.

- Oícheanta Casaíne nó oícheanta Biongó.

• Ní chuirfear Carthanas Cláraithe, Coláistí tríú leibhéal, BOOnna, ná scoileanna san áireamh.

• Ní chuirfear Árais Chónaithe san áireamh.

• Ní chuirfear imeachtaí faoin aer san áireamh.

• Deontaithe atá ann cheana a fhaigheann maoiniú ó scéimeanna na Roinne Turasóireachta, Cultúir, Ealaíon, Gaeltachta, Spóirt agus Meán (DTCAGSM) nach gcomhlíonann Comhaontaithe Leibhéal Seirbhíse arna n-eisiúint agus na nósanna imeachta íostarraingthe.

Oibreoidh an scéim seo agus ciste teoranta €2.6 million aici agus d’fhéadfadh sé nach mbeifí in ann maoiniú a leithdháileadh ar gach iarratasóir incháilithe. Ceithre imeacht in aghaidh an iarratais is ea íosmhéid na n-imeachtaí a dtacófar leo sa scéim seo. Cuirfear 75% den mhaoiniú atá de dhíth ar fáil leis an Scéim seo, agus beidh ar iarratasóirí an 25% de atá fanta a chur ar fáil. Maoineofar deontas suas le €10,000 ar a mhéad in aghaidh na sraithe imeachtaí.

Breithneoidh an Roinn, faoi chúinsí áirithe, réamhíocaíocht éigin den deontas a thabhairt roimhe ré. I gcás ina lorgaítear réamh-mhaoiniú, tabharfaidh an Roinn réamh-mhaoiniú 75% den mhaoiniú a dheonaítear agus íocfar an 25% deiridh de nuair a chuirfear sonraisc agus fáltais ar aghaidh, ar cheart ráitis Bainc/doiciméid eile tacaíochta iad a chruthú freisin agus ar cuireadh ar aghaidh iad i gcomhréir leis na treoirlínte seo. Is é an tsuim uasta a dtabharfar réamh-mhaoiniú lena aghaidh €7,500 in aghaidh an iarratais.

Deonófar Réamh-mhaoiniú faoi na coinníollacha seo a leanas:

• Aon ghnó incháilithe a mbíonn láimhdeachas bliantúil níos lú ná €191,000 i gceist leo, áirítear leis sin áitribh cheadúnaithe a thagann faoi ‘Banda Ceadúnais A’

• Ní mór d’iarratasóirí ráiteas a chur ar fáil i dtaca le láimhdeachas. Ní mór é seo a dheimhniú agus úsáid á baint as Teastas ó Iniúchóir/Litir atá sínithe ag Cuntasóir.

• Ní mór d’iarratasóirí cruthúnas a thabhairt sula bhfaighfear maoiniú, a léiríonn briseadh síos na gcostas lena n-áirítear luachana foirmiúla do chostais incháilithe faoin Scéim seo.

• Ní mór d’iarratasóirí na critéir incháilitheachta a chomhlíonadh mar a leagtar amach sna treoirlínte seo.

Tabhair ar aird:

• Breithneofar iarratais go dian in ord de réir mar a fhaightear iad agus ní bhreithneofar aighneachtaí a bheidh mall.

• Ní chinntíonn incháilitheacht léi féin áfach go bhfaighidh iarratas maoiniú deontais.

• Is é polasaí na Roinne a chinntiú go gcaitear go cóir agus go cothrom le gach iarratas.

• Ní bhreithneofar ach iarratas amháin a dhéantar ar an Scéim seo in aghaidh an ionaid/an ghnó

• Is coinníoll maoinithe é nach mór íocaíocht a thabhairt do gach ealaíontóir agus do gach taibheoir.

• Ní mór d’iarratasóirí a chinntiú, nuair is féidir, go mbeidh cothromaíocht inscne i gceist leis na taibheoirí a fhostófar.

Cad iad na costais incháilithe a gcuirfear maoiniú ar fáil ina leith?

Is samplaí iad seo a leanas den chaiteachas (ach gan a bheith teoranta dóibh) atá incháilithe do mhaoiniú a fháil freisin, ach ní liosta cuimsitheach é seo:

- Conarthaí do sheirbhísí don Ealaíontóir/ don Taibheoir/ don Cheoltóir a fhostaíonn an t-ionad.

- Seirbhísí ó Thionscail na Cruthaitheachta (lena n-áirítear seirbhísí Dearthóirí Seit/Feistis

- Costais a bhaineann le feistis do léirithe amharclannaíochta

- Costais a bhaineann le Fógraíocht, le PR, le ticéid i ndáil leis an imeacht cultúir ar leith

- Trealamh speisialta a fháil ar cíos a bheidh ag teastáil go sonrach don imeacht cultúir

- Costais a bhaineann le Sláinte agus le Sábháilteacht agus le Slándáil

- Costais Árachais an Imeachta

- Costais Mhaoine Intleachtúla

Costais nach féidir a thabhairt san áireamh:

Is samplaí iad seo a leanas den chaiteachas nach bhfuil incháilithe do mhaoiniú a fháil ach ní liosta cuimsitheach é seo:

• Trealamh a cheannach

• Uirlisí Ceoil a cheannach

• Rátaí an Údaráis Áitiúil

• Conarthaí Fostaíochta nach mbaineann leis an léiriúchán i.e. Costais bhreise foirne nuair a bhíonn ionaid ar oscailt níos déanaí sa tráthnóna

• Táillí Dlí agus Cuntasaíochta

• Costais Bhliantúla Árachais (seachas árachas in aghaidh an imeachta)

Nótaí:

- Déanfar íocaíochtaí deontais bunaithe ar na sonraisc íoctha a chuirtear ar aghaidh (bonn dliteanas aibithe) agus ní dhéanfar íocaíochtaí ach do na himeachtaí beartaithe a cuireadh ar aghaidh ar an bhfoirm iarratais bunaidh.

- Sa chás nach bhfuil iarratasóir incháilithe le CBL a éileamh ar ais ar a dtionscadail, beidh sin le forchúiteamh.

Tráthchlár na Scéime

Beifear in ann iarratais a dhéanamh ar an scéim seo ón 21 Meitheamh 2022 go dtí 1pm Dé hAoine an 22 Iúil 2022 nó go dtí go mbeidh an ciste caite, cibé acu a tharlaíonn ar dtús. Breithneofar iarratais go dian in ord de réir an dáta agus an ama a fhaigheann an Roinn iad. Ní mór gach ciste a tharraingt anuas in 2022.

Maoiniú a admháil

Beidh dlite ar iarratasóirí aitheantas a thabhairt do chabhair na Roinne:

- Sna Ráitis Airgeadais Bhliantúla i ndáil le gach bliain ina ndéantar an deontas a íoc

- I ngach ábhar poiblíochta a bhaineann le taibhithe trí lógó na Roinne Turasóireachta, Cultúir, Ealaíon, Gaeltachta, Spóirt agus Meán a chur ar a láithreán gréasáin / cláir / póstaeir / ábhar Meán Sóisialta agus aitheantas i scríbhinn a bheith i ngach tuarascáil/foilseachán agus ábhair eile fógraíochta.

- Ní mór a chur in iúl do gach Ealaíontóir agus ball den fhoireann a bheidh páirteach sna himeachtaí cultúir a bheidh maoinithe faoin scéim seo go bhfuil an t-imeacht maoinithe faoin Scéim seo.

Tá maoiniú faoi réir na gcoinníollacha seo a leanas. D’fhéadfadh iomlán an deontais nó sciar den deontas a dhiúltú, a tharraingt siar nó a choinneáil siar a theacht de thoradh ar choinníoll a fhágáil gan comhlíonadh.

- Ní mór an tIarratas Deontais a dhéanamh do 4 imeacht/ghníomhaíocht chultúir ar a laghad (ach gan a bheith teoranta do cheithre cinn).

- Ní mór don Iarratasóir togra soiléir a chur ar aghaidh ina ndéanfar achoimre ar na himeachtaí a reáchtálfar, an cineál imeachta a bheidh i gceist agus an uair a bheidh sé ar siúl.

- Ní mór gach imeacht a reáchtáil sa stát agus faoi dheireadh Mhí Dheireadh Fómhair 2022, ach amháin má reáchtáiltear an t-imeacht i gcomhar leis an imeacht ‘Beo sa Chathair’ de chuid Fáilte Ireland a bheidh ar siúl i mBaile Átha Cliath, i mí na Samhna 2022 .

- Ní mór íocaíocht a thabhairt d’Ealaíontóirí / do Thaibheoirí.

- Ba cheart d’Iarratasóirí a chinntiú go gcomhlíonann gach ealaíontóir, taibheoir agus foireann a bhaineann leis an tionscadal an tAcht um Shláinte agus Sábháilteacht ag an Obair, 2005 agus go bhfuil dualgas orthu aon iompar míchuí a chosc ar dócha go mbeadh sláinte agus sábháilteacht na bhfostaithe i mbaol dá bharr. Éilítear leis seo go nglacann an Deonaí céimeanna réasúnacha chun a chinntiú go mbeidh an timpeallacht oibre saor ó bhulaíocht, ó chiapadh, agus ó chiapadh gnéasach, agus go bhfuil polasaí maidir le dínit ag an láthair oibre a fhorbairt i bhfeidhm.

- Sa chás go ndéantar iarratas ar réamh-mhaoiniú, ní mór don iarratasóir na coinníollacha réamh-mhaoinithe a shásamh.

- Ní mór don Iarratasóir aontú le próiseas meastóireachta/ceistneoir gearr a dhéanamh i ndiaidh an imeachta chun cuidiú leis an Roinn éifeachtúlacht a thomhas agus chun an t-eolas a foghlaimíodh a roinnt leis an earnáil.

- Ní dhéanfar íocaíochtaí ach ar bhonn na bhfáltas a chuirtear ar aghaidh agus ní mór baint a bheith ag na fáltais seo leis na himeachtaí atá beartaithe ar an bhfoirm iarratais.

Ní mór d’iarratasóirí cruthúnas a choinneáil a thacaíonn leis an mbonn chun éileamh a dhéanamh faoin scéim seo mar d’fhéadfadh sé go n-éileodh an Roinn Turasóireachta, Cultúir, Ealaíon, Gaeltachta, Spóirt agus Meán air faoi sheiceálacha incháilitheachta a dhéanfar amach anseo. Ní mór don Iarratasóir:

• Gach fáltas a choinneáil agus a chur ar aghaidh do gach imeacht.

• Gach ábhar fógraíochta a bhaineann leis na himeachtaí a reáchtálfar tar éis don imeacht deireanach a bheith ar siúl a choinneáil agus a chur ar aghaidh.

Tabhair ar aird nach mór freastal ar shláinte agus ar shábháilteacht na ndaoine ar an áitreabh atá i láthair ag imeachtaí taobh istigh, lena n-áirítear sábháilteacht dóiteáin na ndaoine sin, faoin Reachtaíocht Phríomha seo a leanas agus faoi na rialacháin agus faoin treoir arna ndéanamh fúithi, áirítear orthu seo, ach gan a bheith teoranta dóibh, na doiciméid seo a leanas:

o An tAcht um Cheadúnú Ócáidí Laistigh 2003

o An tAcht um Shábháilteacht, Sláinte agus Leas ag an Obair 2005 (féach www.hsa.ie)

o Na Rialacháin um Shábháilteacht, Sláinte agus Leas ag an Obair (Feidhm Ghinearálta) 2007-2016

o Na hAchtanna Seirbhísí Dóiteáin 1989 agus 2003 (féach www.environ.ie)

o Na Rialacháin um Shábháilteacht Dóiteáin in Áiteanna Cruinnithe (Bealaí ‏Éalaithe a Éascú) 1985

o Cód Cleachtais do Shábháilteacht Dóiteáin a Bhainistiú in Áiteanna Cruinnithe

o An Treoir maidir le Sábháilteacht ag Imeachtaí (An Treoir Chorcra)

• Ní mór d’Iarratasóirí ceadúnas alcóil bailí a bheith i bhfeidhm má táthar ag déanamh iarratas faoi Scéim A.

- Déanfar ar an gcéad dul síos gach iarratas ar mhaoiniú faoin scéim seo a thagann chuig an Roinn faoin dáta deiridh a sheiceáil maidir le gnéithe incháilitheachta.

- Breithneofar iarratais go dian in ord de réir an dáta agus an ama a fhaigheann an Roinn iad.

- Ní mór d’iarratais na coinníollacha maoinithe a shásamh.

Má tá aon fhiosraithe agat maidir leis an bpróiseas iarratais, seol ríomhphost chuig: ntess@tcagsm.gov.ie

Is féidir le hiarratasóir achomharc a dhéanamh má bhreithníonn an t-iarratasóir nár cloíodh leis an bpróiseas chun athbhreithniú a dhéanamh ar a iarratas.

Ní mór don Iarratasóir ríomhphost a bheith faighte aige ina bhfuil cinneadh atá déanta ag foireann an Gheilleagair Oíche chun achomharc a dhéanamh. Ní mór achomharc a dhéanamh laistigh de 5 bliana ón dáta a luaitear sa ríomhphost ina dtugtar an cinneadh.

Ní ghlacfar le hachomhairc a chuirfear ar aghaidh i ndiaidh an dáta sin.

Féach tuilleadh eolais maidir le próiseas achomharc STGO

Is é is aidhm leis an bhfaisnéis a chuirtear ar fáil sa doiciméad seo tuiscint a thabhairt do na hiarratasóirí ar an bpróiseas maidir le hiarratais ar chúnamh a mheas agus a cheadú agus ní ceart a mheas gur míniú dlíthiúil atá ann.

An tAcht um Shaoráil Faisnéise 2014

Faoin Acht um Shaoráil Faisnéise 2014, féadfar sonraí a luaitear in iarratais agus i ndoiciméid tacaíochta a scaoileadh le tríú páirtithe, ar iarratas. Sa chás go mbeadh faisnéis íogair san iarratas a dhéanann tú nó ábhar de chineál príobháideach, ba cheart duit sin a lua go sonrach agus míniú a thabhairt ar an gcúis nár cheart é a nochtadh. Sa chás ina bhfaightear iarratas chun faisnéis íogair faoin reachtaíocht a scaoileadh, rachfar i gcomhairle leat sula ndéanfar cinneadh maidir leis an bhfaisnéis sin a scaoileadh nó gan í a scaoileadh. Ach, sa chás nach bhfuil aon eolas ar leith sainaitheanta mar eolas atá íogair, ní gá dul i gcomhairle leat sula ndéanfar é a nochtadh.

Monatóireacht

Beidh ar dheonaithe an caighdeán is airde follasachta agus cuntasachta a chomhlíonadh mar a leagtar amach i gCiorclán 13/2104 ón Roinn Caiteachais Phoiblí agus Athchóirithe - Bainistíocht agus Cuntasacht i ndáil le Deontais ón Státchiste.

Is é is aidhm leis an bhfaisnéis a chuirtear ar fáil sa doiciméad seo tuiscint a thabhairt do na hiarratasóirí ar an bpróiseas maidir le hiarratais ar chúnamh a mheas agus a cheadú agus ní ceart a mheas gur míniú dlíthiúil atá ann.

Suirbhé Meastóireachta

Beidh ort Suirbhé Meastóireachta a chomhlánú i ndáil le do chuid rannpháirtíochta sa scéim seo, lena n-áirítear an chaoi a bhfuarthas an deontas/an tionchar a bhí ag an deontas ar do ghnó. Seolfar an suirbhé chun é a chomhlánú trí ríomhphost nuair a gheofar na sonraisc agus na fáltais deiridh atá le híoc.

Foilsiú

Féadfar sonraí maidir le deontais ar leith a fhoilsiú ar láithreán gréasáin na roinne lena n-áirítear ainm an deontaí, an contae ina bhfuil an tairbhí lonnaithe, agus suim an deontais.

Cosaint sonraí

Is féidir eolas maidir leis an Roinn agus cosaint sonraí a léamh ach an nasc seo a leanas a úsáid: https://www.gov.ie/en/organisation-information/df3fe-data-protection-policy

Séanadh

Ní bheidh an Roinn Turasóireachta, Cultúir, Ealaíon, Gaeltachta, Spóirt agus Meán freagrach don iarratasóir ná d’aon pháirtí eile as aon chaillteanas, damáiste ná costais de chineál ar bith a eascraíonn go díreach nó go hindíreach as iarratas nó as an ábhar atá ann nó as diúltú na Roinne don iarratas ar chúis ar bith.

Ní bheidh an Roinn, a cuid seirbhíseach ná a cuid gníomhairí freagrach ag tráth ar bith in aon imthosca as aon ní a bhaineann le forbairt, pleanáil, tógáil, feidhmiú, bainistiú agus / nó riaradh imeachtaí aonair ná aon ní a bhaineann leis an bpáirtíocaíocht a dhéanann an roinn ar shonraisc a chuireann iarratasóir ar dheontas isteach.

Tabhair ar aird: Ba cheart d’iarratasóirí teagmháil a dhéanamh leis an Údarás Áitiúil is ábhartha dóibh sula ndéanfaidh siad imeacht a phleanáil. Tá Iarratasóirí/Eagraithe freagrach as gnéithe sábháilteachta a n-imeachta, ní féidir leis an Roinn a bheith faoi dhliteanas maidir le haon imeacht nach bhfuil á eagrú aici, agus/nó mura gcuirfidh an t-eagraí aon chomhairle ná aon treoir a thugann an tÚdarás Áitiúil chun feidhme.

Breis eolais a iarraidh

Coimeádtar de cheart ag an Roinn breis eolais a iarraidh ort chun d'iarratas a mheas sa chás go mbíonn sin de dhíth.

Is í an Roinn Turasóireachta, Cultúir, Ealaíon, Gaeltachta, Spóirt agus Meán an t-Údarás a thugann cabhair deontais don Scéim agus deimhníonn sí go léireoidh sí meas ar na hoibleagáidí monatóireachta agus tuairiscithe i ndáil le Státchabhair.

Táthar ag lorg na cabhrach agus á cur ar fáil faoin Rialachán ón gCoimisiún Eorpach maidir le Cabhair De Minimis. Meastar suimeanna beaga Státchabhrach, suas le 200,000 Euro a thugtar in aon tréimhse trí bliana d’aon fhiontar amháin ar leith, a bheith róbheag chun tionchar suntasach a bheith acu ar thrádáil nó ar iomaíochas sa chómhargadh. Meastar suimeanna den sórt sin a bheith taobh amuigh de chatagóir na Státchabhrach a gcuirtear cosc air le Conradh CE agus is féidir iad a thabhairt gan fógra a chur ar aghaidh chuig an gCoimisiún Eorpach nó gan imréiteach a fháil uaidh. Éilítear ar Bhallstát meicníocht a bheith aige chun cabhair den sórt sin a rianú (ar a dtugtar ‘cabhair De Minimis’) agus chun a chinntiú go ndéantar an tsuim cónasctha d’íocaíochtaí chabhair De Minimis ó gach foinse d’fhiontar amháin in aon tréimhse trí bliana de réir uasteorainn 200,000 Euro.

Iarrfar ar iarratasóirí sonraí a thabhairt maidir le gach cineál chabhair De Minimis eile a deonaíodh ar a ngnó le trí bliana anuas. Dá ndéanfadh cuideachta bréagdhearbhú agus go sárófaí an tairseach 200,000 Euro mar thoradh air sin, d’fhéadfadh sé gurb éard a d’eascródh as níos déanaí an chabhair a fuarthas a aisghabháil agus ús a bheith léi.

Cabhair De Minimis atá i ngach maoiniú ó Scéim Tacaíochta an Gheilleagair Oíche 2022 (STGO) agus iarrfar ar iarratasóirí a aithint go bhfuiltear ag tairiscint STGO 2022 faoi Chabhair De Minimis trí dhearbhú gur mian leo iarratas a dhéanamh ar STGO faoi Rialachán De Minimis (CE) 1407/2013 an 18 Nollaig 2013.

Chun tuilleadh eolais a fháil, féach ar an leathanach ‘Freagraí ar do Cheisteanna’