Cumaisc sna Meáin

Déantar an próiseas reatha um chumaisc sna meáin de réir na bhforálacha a leagtar amach i gCuid 3A (Cumaisc sna Meáin) den Acht Iomaíochta 2002 (arna leasú) den Acht um Iomaíocht agus Cosaint Tomhaltóirí 2014.

Cuireadh le chéile Treoirlínte maidir le Cumaisc sna Meáin chun soiléireacht agus treoir a sholáthar do pháirtithe ábhartha. Ina theannta sin, tá leathanach eolais ar a bhfuil Achoimre Ardleibhéil, ar Phróiseas Cumaisc na Meán chomh maith le Gluais Téarmaí ar fáil ar mhaithe le soiléireacht.

Féadtar teagmháil a dhéanamh le foireann cumaisc na meán ag MediaMergers@ccs.gov.ie

Faoi alt 28B den Acht Iomaíochta 2002, (arna leasú) (an tAcht), ní mór do na páirtithe i gcumasc meán, fógra a thabhairt don Aire Cultúir, Cumarsáide agus Spóirt laistigh de 10 lá tar éis don Choimisiún um Chosaint Tomhaltóirí agus Iomaíochta an cumasc meán a imréiteach, nó i gcúinsí áirithe, don Choimisiún Eorpach.

Ní mór don fhógra agus don doiciméadacht a ghabhann leis sonraí iomlána an cháis a sholáthar agus a chur isteach i bhformáid leictreonach chuig MediaMergers@ccs.gov.ie.

Nuashonraíodh an fhoirm maidir le fógra a thabhairt an 10 Aibreán 2024 chun tabhairt isteach Nós Imeachta chun Fógra a thabhairt um Chumasc Simplithe Meán a léiriú, le haghaidh cumaisc áirithe sna meáin. Tá an leagan nuashonraithe de theimpléad na foirme fógra le fáil anseo.

Ar mhaithe le héifeachtúlacht agus an t-ualach rialála ar pháirtithe a íoslaghdú, tá an roinn seo sásta páirt a ghlacadh i rannpháirtíocht réamhfhógra leis na páirtithe, lena n-áirítear bualadh leis na páirtithe agus athbhreithniú a dhéanamh ar dhréachtfhógraí. Ní mór do pháirtithe ar mian leo leas a bhaint as an Nós Imeachta Simplithe an fhéidearthacht sin a phlé leis an Roinn sula gcuirfidh siad fógra isteach.

I mí Aibreáin 2024, thug an Roinn Nós Imeachta Simplithe maidir le Fógra a Thabhairt um Chumasc Simplithe Meán isteach, agus é beartaithe leis ualach rialála a mhaolú ar ghnólachtaí i gcásanna nach bhfuil sprioc idirbhirt gníomhach sa Stát agus, dá bhrí sin, nach dócha go mbeidh tionchar aige ar iolrachas na meán sa Stát.

Féadfaidh an Roinn Nós Imeachta Simplí maidir le Fógra a Thabhairt um Chumasc Meán a chur i bhfeidhm nuair a chomhlíontar na coinníollacha seo a leanas:

• nach bhfuil an spriocghnóthas i ngnólacht meán ar bun sa Stát agus nach bhfuil sé beartaithe go ndéanfadh sé amhlaidh;
• nach ndíríonn an spriocghnóthas ar an lucht féachana sa Stát agus nach bhfuil sé beartaithe go ndéanfadh sé amhlaidh; agus
• níl aon chúis a bheith ag súil go bhféadfadh tionchar díreach a bheith ag an idirbheart ar ghníomhaíochtaí aon ghnólacht meán a oibríonn sa Stát.

Ní mór cumaisc faoin Nós Imeachta Simplithe maidir le Fógra a Thabhairt um Chumasc Meán a chur in iúl trí úsáid a bhaint as an bhFoirm Chaighdeánach maidir le Fógra a Thabhairt um Chumasc Meán. Ní mór do na páirtithe ar mian leo leas a bhaint as an Nós Imeachta Simplithe maidir le Fógra a Thabhairt um Chumasc Meán an fhéidearthacht sin a phlé leis an Roinn sula gcuirfidh siad fógra isteach.

Tar éis fógra a fháil faoin Nós Imeachta Simplithe maidir le Fógra a Thabhairt um Chumasc Meán, cuirfidh an Roinn in iúl do na gnóthais lena mbaineann, a luaithe is féidir go praiticiúil, i dtaca le cé acu an bhfuil sé oiriúnach an Nós Imeachta Simplithe a chur i bhfeidhm nó filleadh ar an nós imeachta caighdeánach. Sa chás go gcinneann an Roinn dul ar aghaidh faoin Nós Imeachta Simplithe, déanfaidh an tAire iarracht cinneadh a dhéanamh a luaithe is féidir go praiticiúil.

Nuair a chuirtear in iúl é, déanann an tAire scrúdú tosaigh (Céim 1) ar chumasc na meán chun bonn eolais a chur faoina gcinneadh.

Tá 30 lá oibre ag an Aire ón dáta ábhartha, is é sin an dáta faoina bhfuil an fógra dlite, chun ceann amháin de thrí chinneadh fhéideartha a dhéanamh:

• go bhféadfaí an cumasc meán a chur i bhfeidhm
• go bhféadfaí an cumasc meán a chur i bhfeidhm le coinníollacha, faoi réir na gcoinníollacha sin a bheith molta mar ghealltanais ó na Páirtithe
• go bhfuil sé ar intinn acu a iarraidh ar Choimisiún na Meán scrúdú iomlán a dhéanamh ar an gcumasc atá beartaithe

I gcásanna ina scrúdaítear cumasc meán faoin Nós Imeachta Simplithe, déanfaidh an tAire a d(h)ícheall cinneadh a dhéanamh a luaithe is féidir go praiticiúil.

De réir alt 28D (7) den Acht, foilsíonn an tAire cinntí maidir le cumasc meán.

Is féidir cóipeanna de gach cinneadh go dtí seo a fháil ach an nasc thíos a úsáid.

Cinntí maidir le Cumasc Meán