An tAire Patrick O’Donovan i gceannas ar Mhisean Trádála don Earnáil Chultúrtha go Ceanada chun naisc déthaobhacha a neartú roimh Chlár ‘Ceanada-Éire 180’
- Foilsithe: 26 Eanáir 2026
- An t-eolas is déanaí: 26 Eanáir 2026
Beidh an tAire Cultúir, Cumarsáide agus Spóirt, Patrick O’Donovan TD – i gcomhar le Fís Éireann agus an Roinn Gnóthaí Eachtracha – i gceannas ar mhisean trádála go Ceanada, ag tabhairt cuairte ar Toronto agus Ottawa chun bualadh le ceannairí cultúrtha, spóirt, oideachais agus polaitiúla.
Díríonn an chuairt ar chaidreamh déthaobhach idir Éirinn agus Ceanada a neartú roimh Cheanada-Éire 180 – an tionscnamh cultúrtha suntasach atá beartaithe do 2027 chun comóradh 180 bliain an imirce mhóir ón nGorta Mór ó 1847 a chomóradh, nuair a theith breis is 100,000 teifeach Éireannach go Ceanada. Ceiliúrfaidh Ceanada-Éire 180 oidhreacht chomhroinnte trí imeachtaí, ealaín, scannánaíocht, agus machnamh cultúrtha, faoi threoir théamaí cuimhneamh, machnaimh, agus ath-shamhlú an todhchaí. Seolfaidh an tAire O’Donovan Ceanada-Éire 180 i gcomhar le hAire Céannachta agus Cultúir Cheanada, an MP Marc Millar, in Ottawa le ceannairí cultúrtha agus diaspóra ó gach cearn de Cheanada.
Le linn a chuairte, beidh cruinnithe déthaobhacha ag an Aire O’Donovan lena chomhghleacaí Ceanadach, an tAire Marc Miller, agus Rúnaí Stáit Spóirt Adam van Koeverden MP. Buailfidh sé freisin le James Maloney MP, Cathaoirleach Ghrúpa Idirpharlaiminteach Cheanada-Éireann agus freastalóidh sé ar Thréimhse Ceisteanna i bParlaimint Cheanada.
I Toronto, buailfidh an tAire O’Donovan le hAire Turasóireachta, Cultúir agus Cluichíochta Ontario, Stan Cho, le Leas-Uachtarán Fhéile Scannán Idirnáisiúnta Toronto, chomh maith le clubanna CLG Cheanada agus ceannairí cruthaitheacha ban mar chuid de cheiliúradh Lá Fhéile Bríde. Tabharfaidh sé cuairt ar Ollscoil Toronto, ar Ardscoil Ríoga an Cheoil, agus ar Ionad Ealaíon Corleck – atá á mhaoiniú i bpáirt ag Cultúr Éireann.
In Ottawa, mar aon le toscaireacht ó Screen Producers Ireland, tabharfaidh an tAire cuairt ar chomhdháil den scoth de chuid Chumann Léiritheoirí Meán Cheanada, Prime Time Canada, a mheallann ceannairí domhanda i réimse na craoltóireachta, na teilifíse agus na scannánaíochta, áit a dtabharfaidh sé príomhóráid.
Ag labhairt dó faoin misean trádála, dúirt an tAire O’Donovan:
“Tá an Misean Trádála seo tráthúil go foirfe chun caidreamh idir Éirinn agus Ceanada a dhaingniú agus béim a chur ar na luachanna agus an oidhreacht atá againn i bpáirt. Tá diaspóra mór Éireannach i gCeanada mar is léir ó chlubanna CLG ar fud Cheanada, ó chruthaitheoirí Éireannacha agus ó ainmneacha Éireannacha i measc an phobail. Cuirfidh mo chuairt cultúr agus scéalaíocht chruthaitheach na hÉireann chun cinn ar an scáileán chomh maith. Leanfaidh mé ag obair chun an caidreamh idir tionscal scáileáin na hÉireann agus stiúideonna, ardáin sruthú agus cuideachtaí léiriúcháin an domhain a neartú tuilleadh agus teachtaireacht an Rialtais a threisiú maidir le tacaíocht láidir agus leanúnach don tionscal scáileáin agus d’ealaíontóirí Éireannacha agus comhléiriúcháin a chur chun cinn idir Éirinn agus Ceanada.”