Comóradh faoi stiúir an stáit i dTigh Mór Dhoire Fhíonáin ag marcáil 250 bliain ó bhreith Dhónaill Uí Chonaill
- Foilsithe: 6 Lúnasa 2025
- An t-eolas is déanaí: 6 Lúnasa 2025
- An tAire O’Donovan ina óstach ar an imeacht
- Príomhaitheasc ón Taoiseach Micheál Martin
Bhí an tAire Cultúir, Cumarsáide agus Spóirt, Patrick O’Donovan TD ina óstach inniu (Dé Céadaoin, 6 Lúnasa 2025) ar an gcomóradh faoi stiúir an Stáit ag Tigh Mór Dhoire Fhionáin, Cathair Dónaill, Contae Chiarraí, chun comóradh 250 bliain ó rugadh Dónall Ó Conaill, ‘An Fuascailteoir’, a chomóradh.
Thug an Taoiseach Micheál Martin TD an príomhaitheasc ag an ócáid agus i measc na gcainteoirí eile bhí Cathaoirleach Chomhairle Contae Chiarraí, an Comhairleoir Michael Foley agus an tAire Kevin Moran TD, Aire Stáit sa Roinn Caiteachais Phoiblí, Bonneagair, Athchóiriucháin Seirbhíse Poiblí agus Digitiúcháin le freagracht as Oifig na nOibreacha Poiblí.
San áireamh san ócáid bhí searmanas foirmiúil faoi stiúir an Stáit, mar aon le clár cultúrtha saibhir ina raibh an focal labhartha, ceol, agus machnaimh teaghlaigh spreagtha ag oidhreacht Uí Chonaill. Bhí Tigh Mór Dhoire Fhíonáin, teach cónaithe Uí Chonaill agus áit a bhfuil an-tábhacht siombalach ag baint leis, mar chúlra oiriúnach agus pictiúrtha don chomóradh.
Rinne an ócáid ómós do shaol, oidhreacht agus fís urghnách duine de cheannairí polaitiúla agus feachtasóirí cearta daonna is mó tionchar in Éirinn. D’fhág obair cheannródaíoch Dhónaill Uí Chonaill i ngníomhaíocht pholaitiúil neamhfhoréigneach agus a abhcóideacht gan staonadh ar son Fuascailt na gCaitliceach rian domhain ní hamháin ar stair na hÉireann, ach ar fud an domhain.
Arna labhairt dó ag an ócáid, dúirt an Taoiseach Micheál Martin:
Inniu, agus muid ag bailiú le chéile i dTigh Mór Dhoire Fhíonáin chun saol agus oidhreacht Dhónaill Uí Chonaill a chomóradh, meabhraítear dúinn ní hamháin an méid ollmhór a chuir ‘An Fuascailteoir’ le daonlathas agus cearta sibhialta na hÉireann, ach freisin le cumhacht an phobail, san am a chuaigh thart agus san am i láthair.
Is gníomhartha ríthábhachtacha cuimhneacháin iad imeachtaí comórtha mar seo, áit a dtagann muid le chéile chun onóir a thabhairt dóibh siúd a mhúnlaigh ár náisiún agus chun machnamh a dhéanamh ar na luachanna a aontaíonn sinn fós. Is trí phobal, dlúthpháirtíocht agus stair chomhroinnte a fhaighimid neart agus inspioráid don todhchaí.
Dúirt an tAire O’Donovan:
Is é an ról atá agam mar Aire le freagracht as Comóradh ná tacú le bealaí suimiúla a chruthú dúinn go léir chun dul i ngleic le himeachtaí agus le pearsantachtaí an ama atá thart. Léiríodh dúinn arís agus arís eile trí chláir chomórtha an fíorluach agus an chumhacht a thagann as cuimhneamh - ó machnamh a dhéanamh ar na daoine agus na himeachtaí a mhúnlaigh sinn agus an náisiún seo s’againne.
Is féidir leis an domhan a bheith ina áit chorraitheach, agus is cosúil scaití go bhfuil sé ag dul in olcas. Gach lá feicimid sáruithe ar chearta sibhialta, feicimid gorta agus cogaí. Is féidir linn neart a tharraingt ón am atá thart. Is féidir linn cuimhneamh ar a bhfuil sáraithe againn cheana féin, is féidir linn breathnú ar shampla Uí Chonaill – na héachtaí a bhí fear amháin in ann a bhaint amach trí mhodhanna síochánta, agus an chaoi ar spreag a ghaiscí an oiread sin daoine eile i dtóir dhomhanda ar chearta sibhialta agus ar athchóiriú daonlathach.
Dúirt Kevin ‘Boxer’ Moran TD, Aire Stáit d'Oifig na nOibreacha Poiblí:
Tá áthas orm fáilte a chur roimh gach duine atá i láthair inniu agus roimh an lucht féachana atá ag breathnú go náisiúnta agus thar lear chuig tailte pictiúrtha Thigh Mhór Dhoire Fhíonáin. Ba mhaith liom aitheantas a thabhairt don obair atá déanta ag foireann mo roinne a d’éascaigh go gairmiúil ceiliúradh an chomórtha shuntasach seo.
In Oifig na nOibreacha Poiblí, táimid mórtasach as ár ngairm mar chaomhnóirí ár n-oidhreachta náisiúnta agus ár maoine stairiúla, agus is pribhléid dúinn Doire Fhíonáin, an teach agus na tailte a spreag Ó Conaill ar feadh a shaoil, a bhainistiú agus a chaomhnú. Cinnteoimid go leanfaidh an oidhreacht inláimhsithe seo de bheith ag spreagadh agus ag oideachasú cuairteoirí faoinár laoch náisiúnta sna blianta amach romhainn.
Dúirt Cathaoirleach Chomhairle Chontae Chiarraí, an Comh. Michael Foley:
Mar Chathaoirleach ar Chomhairle Contae Chiarraí, tá sé de phribhléid agam fáilte a chur roimh an ócáid chomórtha faoi stiúir an Stáit chuig Tigh Mór Dhoire Fhíonáin mar ghníomh cuimhneacháin náisiúnta agus chun ceiliúradh a dhéanamh ar ár laoch áitiúil, Dónall Ó Conaill.
Tá sé thar a bheith tábhachtach do phobail áitiúla a bheith in ann comóradh cuí a dhéanamh ar imeachtaí stairiúla suntasacha agus ar chomóradh a bhaineann go sonrach lena gceantar féin agus lena bpobal. Inniu, i gCathair Saidhbhín, tá Coiste Uí Chonaill 250 ag óstáil clár iomlán imeachtaí le tacaíocht ó Chomhairle Contae Chiarraí agus ón Roinn Cultúir, Cumarsáide agus Spóirt. Leagann sé seo béim ar fhíorluach na gcomóradh comhoibríoch, agus an dá chlár ag comhlánú agus ag saibhriú a chéile.
Cé gur imeacht faoi stiúir an Stáit é seo, baineann sé, i gcroílár a chroí, leis an bpobal. Ba mhaith liom buíochas a ghabháil leo siúd go léir a chuir an ócáid seo ar fáil agus comhghairdeas a dhéanamh lenár dtaibheoirí agus lenár gcruthaitheoirí áitiúla a thug a gcuid tallann agus saineolais - tá an contae léirithe acu ar a dhícheall.
Tá an t-imeacht seo mar chuid de thiomantas an Stáit do chomórthaí cuimsitheacha, measúla agus samhlaíocha a théann i ngleic leis an bpobal i stair shaibhir chasta na hÉireann. Is féidir tuilleadh sonraí faoi imeachtaí eile i gClár Comórtha Dhónaill Uí Chonaill a fháil anseo nó ar chainéil meán sóisialta na Roinne sna seachtainí amach romhainn.
CRÍOCH